អនាគតក្លាយជាចៅហ្វាយ ឬនៅតែកូនចៅគេមួយជីវិត មើលលើ៦ចំណុចនេះ

2018-02-07 03:58:49
ចំនួនមតិ 0 | ចំនួនចែករំលែក 0

ចន្លោះមិនឃើញ

អនាគតក្លាយជាអ្នកដឹកនាំ ឬនៅតែជាកូនចៅគេនៅកន្លែងការងារ គឺអាស្រ័យលើសមត្ថភាព និងការអនុវត្តទទួលបានផ្លែផ្កាប៉ុណ្ណា? ខាងក្រោមជាចំណុចឆ្លុះបញ្ចាំងពីទម្លាប់ខុសគ្នា រវាងបុគ្គលិកមានភាពជាអ្នកដឹកនាំ និងបុគ្គលិកធម្មតាៗ៖

អនាគតជាចៅហ្វាយគេ

តែងភាពជឿជាក់លើខ្លួនឯង៖ កត្តាសំខាន់របស់មេដឹកនាំ គឺផ្ដើមពីចំណុចភាពជាគំរូ។ ដើម្បីក្លាយជាមេដឹកនាំគំរូក៏ត្រូវផ្ដើមចេញពីការជឿជាក់លើខ្លួនឯង ហើយការជឿជាក់អាចកើតមានបានលុះត្រាតែមេដឹកនាំ មានគោលបំណង និង គោលដៅច្បាស់លាស់នៅក្នុងក្រុម។ ដូច្នេះ ចង់មិនចង់ធ្វើឲ្យក្រុមការងារធ្វើដំណើរទៅមុខមានភាពរលូន និងច្បាស់លាស់រួមគ្នា។

អនាគតនៅតែជាកូនចៅគេ

មិនដែលមានជឿជាក់លើខ្លួនឯង តែងគេចវេសការងារសំខាន់ដែលថ្នាក់ដឹកនាំដាក់ឲ្យ។

អនាគតជាចៅហ្វាយគេ

តែងមានការតស៊ូ និង ព្យាយាម៖ មានគោលដៅ ឬផែនការច្បាស់លាស់ហើយ ប៉ុន្តែមិនមានឆន្ទៈនៅក្នុងការធ្វើក៏ចាត់ទុកថាពុំមានន័យអ្វីនោះដែរ។ ការចាប់ផ្ដើមអ្វីមួយជៀសមិនផុតពីជួបព្យុះ-ភ្លៀង ដូច្នេះក្នុងនាមជាមេដឹកនាំម្នាក់ និងជាមនុស្សគំរូម្នាក់ក្នុងក្រុម ត្រូវតាំងចិត្តតស៊ូ ព្យាយាមធ្វើកិច្ចការនោះឲ្យបានសម្រេចទើបធ្វើឲ្យមនុស្សគ្រប់គ្នាគោរពស្រឡាញ់។

អនាគតនៅតែជាកូនចៅគេ

តែងបង្ហាញភាពទន់ខ្សោយ ឫរារែកក្នុងស្ថានភាពកំពុងលំបាកខ្លាំង។

អនាគតជាចៅហ្វាយគេ

សុខភាព និងស្មារតីរឹងមាំ៖ ការងារមិនអាចជោគជ័យបានឡើយ ប្រសិនបើសុខភាពចុះខ្សោយ។ សុខភាពចុះខ្សោយចង់មិនចង់ ធ្វើឲ្យស្មារតីរវើរវាយមិនច្បាស់លាស់ ឬបាត់បង់ការគ្រប់គ្រងខ្លួនឯង ដូច្នេះ ដើម្បីសម្រេចកិច្ចការក៏ត្រូវរក្សាសុខភាព ហើយត្រូវពង្រឹងស្មារតីត្រៀមដោះស្រាយរាល់កិច្ចការលំបាកនៅចំពោះមុខ។

អនាគតនៅតែជាកូនចៅគេ

មិនចេះស្រលាញ់សុខភាព មិនចំណាយពេលហាត់ប្រាណចូលចិត្តធ្វើតែរឿងណាមិនសូវមានប្រយោជន៍។ ចំណែកស្មារតីទន់ខ្សោយជួបបញ្ហាតិចតួច គិតថាធំប៉ុនមេឃដី។

អនាគតជាចៅហ្វាយគេ

តែងរក្សាចិត្តនឹងន៖ ច្បាស់ណាស់ការងារកំពុងធ្វើប្រាកដជានឹងជួបបញ្ហា ហើយក៏មានហេតុផលជាច្រើនពីក្រុមការងារ។ ដូច្នេះ ការបង្ហាញជំហររឹងមាំ រក្សាចិត្តនឹងន នៅពេលមានបញ្ហា គឺជាគន្លឹះដ៏សំខាន់របស់មេដឹកនាំ ដើម្បីដោះស្រាយបញ្ហាទាំងនោះដោយភាពស្ងប់ស្ងាត់ និងការធ្វើឲ្យក្រុមការងារជឿជាក់។

អនាគតនៅតែជាកូនចៅគេ

ចិត្តមិននឹងន ចង់ធ្វើនេះបន្តិច ធ្វើនោះបន្តិច មិនច្បាស់លាស់ប្រាកដប្រជា រកតែការងារណាស្រួលៗ។

អនាគតជាចៅហ្វាយគេ

តែងមានការទទួលខុសត្រូវ៖ ធ្វើជាមេដឹកនាំមិនមែនទទួលយកតែលទ្ធផលប្រសើរនោះទេ ប៉ុន្តែក៏ត្រូវហ៊ានទទួលស្គាល់អំពីការបរាជ័យផងដែរ។ ការទទួលខុសត្រូវ ឬការការស្ដាប់មតិមនុស្សក្រោមឱវាទក៏ជាផ្នែកមួយសំខាន់ធ្វើឲ្យមេដឹកនាំល្អម្នាក់អាចច្នៃកំហុសទៅជាត្រូវ ប្រែក្លាយបរាជ័យទៅជាជោគជ័យ និងបុគ្គលិកគោរពស្រឡាញ់។

អនាគតនៅតែជាកូនចៅគេ

ភាពទទួលខុសត្រូវមានកម្រិតទាប ពេលមានបញ្ហាតែងទម្លាក់ឲ្យអ្នកនេះ អ្នកនោះ មិនគិតថា ជាកំហុសរបស់ខ្លួនឡើយ។

អនាគតជាចៅហ្វាយគេ

តែងមានភាពឆ្លាតវាងវៃ៖ មនុស្សកាន់តែឡើងខ្ពស់ កាន់តែជួបព្យុះ-ភ្លៀង ដែលបញ្ហាអាចមានរាប់ម៉ឺនជំពូកនៅជុំវិញខ្លួនយើង។ អ្នកដឹកនាំគឺជាមនុស្សដែលឆ្ពោះទៅមុខជានិច្ច ប៉ុន្តែរឿងមួយចំនួនមិនមែនចេះតែឆ្ពោះទៅមុខដោយពុំមានបញ្ញានោះទេ។ ភាពបត់បែន គឺជាភាពវៃឆ្លាតបំផុតរបស់មេដឹកនាំ ប៉ុន្តែកត្តាដែលអាចបត់បែនបានល្អនោះ ល្គឹកណាមេដឹកនាំចេះត្រួតពិនិត្យ តាមដាន នូវលទ្ធផល ដែលបានធ្វើកន្លងមកហើយវាយតម្លៃ និងបន្តសកម្មភាពរបស់ខ្លួនទៅខាងមុខដោយវិធីណា។ មួយទៀតអ្នកដឹកនាំត្រូវមានអ្វីថ្មីៗ និងចេះលើកទឹកចិត្តដល់ក្រុមការងារ ទើបធ្វើឲ្យក្រុមដើរទៅមុខប្រកបដោយភាពវៃឆ្លាត។

អនាគតនៅតែជាកូនចៅគេ

អត់ចេះបត់បែន មិនអាចរកដំណោះស្រាយល្អក្នុងក្រុម ពេលជួបឧបសគ្គតែងអស់សង្ឃឹម៕

ចុចអាន៖

អត្ថបទ៖ ប៊ិន ប៊ុណ្ណា