បង្ហាញវិធីធ្វើឲ្យ iPhone ដើរលឿន ឬ យឺត លើ iOS 11.3

2018-02-07 04:11:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ដូចជាការសន្យា Apple បានបន្ថែមនូវផ្ទាំងថ្មីនៅលើ iOS 11.3 ជំនាន់ Beta 2 (សាកល្បង) ដែលមានឈ្មោះថា Battery Health (Beta) នៅលើគ្រប់ iPhone ចាប់ពី iPhone 6 ឡើង។ ផ្ទាំងថ្មីនេះមានបន្ថែមព័ត៌មានអំពីសមត្ថភាពផ្ទុកថ្មរបស់ iPhone និងមានបង្ហាញថាថ្មរងការខូចខាតដល់ដំណាក់កាលដែលវាត្រូវកាត់បន្ថយល្បឿន iPhone ឬអត់។

គ្រប់ iPhone ដែលប្រើ iOS 11.3 នឹងចាប់ផ្ដើមដោយមិនមានដំណើរការមុខងារគ្រប់គ្រងដំណើរការ (Performance Management) នោះទេ។ ប៉ុន្តែមុខងារនេះនឹងដំណើរការដោយស្វ័យប្រវត្តិនៅពេលដែល iPhone ជួបបញ្ហារលត់ដោយខ្លួនឯង។ យ៉ាងណាក្ដីអ្នកប្រើប្រាស់អាចបិទមុខងារនេះបាន ដោយចូលទៅកាន់ Settings → Battery → Battery Health រួចចុចលើ Disable។

នៅលើផ្ទាំងថ្មីនេះដែរនឹងបង្ហាញចេញព័ត៌មាន ៤ ប្រភេទខុសៗគ្នាសម្រាប់ iPhone ៖

ប្រសិនបើថ្មមានសុខភាពល្អអាចធ្វើឲ្យ iPhone រត់ដល់ល្បឿនលឿនបំផុតបាន នោះវានឹងបង្ហាញផ្ទាំងដូចខាងក្រោម។

ប្រសិនបើ iPhone ស្រាប់តែរលត់ដោយខ្លួនឯងពេលប្រើ ដោយសារមិនរត់ដល់ល្បឿនលឿនបំផុតបាន iPhone នឹងដំណើរការមុខងារ Performance Management ដោយស្វ័យប្រវត្តិ។ ការដំណើរការមុខងារនេះនឹងកាត់បន្ថយល្បឿន CPU ដើម្បីអាចឲ្យថ្មទ្រាំទ្រនឹងដំណើរការផ្សេងៗបាន ដោយមិនរលត់ដោយខ្លួនឯងដូចមុន។

ប្រសិនបើអ្នកមិនចង់បានការបន្ថយល្បឿននេះ អ្នកអាចប្ដូរថ្មថ្មី ឬ ចុចបិទមុខងារ Performance Management ដោយចុចលើអក្សរពណ៌ខៀវ។ ពេលនោះនឹងមានលោតផ្ទាំងដូចខាងក្រោម បង្ហាញថាមុខងារត្រូវបានបិទរួចរាល់។

ចំណាំថាប្រសិនបើបិទមុខងារនេះហើយ អ្នកប្រើប្រាស់មិនអាចបើកវាវិញបាននោះទេ។ Apple និយាយថាមុខងារនេះនឹងបើកដោយស្វ័យប្រវត្តិឡើងវិញ នៅពេល iPhone សុខៗស្រាប់តែរលត់។

ករណីដែលសុខភាពថ្មស្ថិតនៅក្រោម ៨០% Apple នឹងបង្ហាញសារណែនាំថាឲ្យប្ដូរថ្មីចេញដើម្បីទទួលបានដំណើរការល្អប្រសើរ ដូចជាបង្ហាញខាងក្រោម។