គ្រូពេទ្យក្លែងក្លាយ អួតថាចេះព្យាបាលស័ក្ដិសិទ្ធិ មានអីឆ្លងអេដស៍ព្រាតពេញភូមិ

2018-02-07 07:21:31
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជ្ញាធរឥណ្ឌា កំពុងតាមចាប់ខ្លួនគ្រូពេទ្យក្លែងក្លាយម្នាក់ ដែលអួតថាចេះព្យាបាលវេទមន្ត ក្រោយអ្នកជំងឺជាង ៣០នាក់ បានឆ្លងជំងឺអេដស៍។

ប្រធានវេជ្ជសាស្ត្រក្នុងទីក្រុង លោក Choudhary រកឃើញថា មានមនុស្ស ៣៣ នាក់បានឆ្លងជំងឺអេដស៍ ក្រោយការពិនិត្យឈាមកាលពីថ្ងៃទី ២៤, ២៥ និង ២៧។ លើសពីនេះទៀត អ្នកជំងឺរាប់រយនាក់នៅជុំវិញទីក្រុង Unnao ត្រូវបានសង្ស័យថាឆ្លងជំងឺអេដស៍ផងដែរ ក្រោយទទួលការព្យាបាលពីគ្រូពេទ្យខាងលើ។

គ្រូពេទ្យក្លែងក្លាយនេះ ត្រូវគេស្គាល់ឈ្មោះថា Rajendra Kumar ហើយតែងតែជិះកង់ជុំវិញសហគមន៍ក្រីក្រប្រទេស ឥណ្ឌា ដោយអួតថាចេះព្យាបាលវេទមន្តក្នុងតម្លៃ ១០ រូពី (៦ រយរៀល) ប៉ុណ្ណោះ។ ប៉ុន្តែការព្យាបាលក្នុងតម្លៃថោកនេះ បានក្លាយទៅជារឿងរ៉ាវដ៏អាក្រក់សម្រាប់អ្នកភូមិ ក្រោយពួកគេឆ្លងជំងឺអេដស៍ ដោយសារតែគ្រូពេទ្យក្លែងក្លាយ ប្រើប្រាស់សឺរ៉ាំងតែមួយ ចាក់អ្នកជំងឺទាំងអស់។

លោក Choudhary និយាយថា "នៅពេលយើងសួរអ្នកជំងឺទាំងនេះ ថាតើពួកគេបានប្រើសឺរ៉ាំងរួមមែនឬទេ ពួកគេមួយចំនួន ប្រាប់ថាគ្រូពេទ្យពិតជាបានប្រើសឺរ៉ាំងរួម សម្រាប់អ្នកជំងឺទាំងអស់មែន។"

តាមរបាយការណ៍ជាច្រើន ឲ្យដឹងថា គ្រូពេទ្យក្លែងក្លាយខាងលើ បានប្រើប្រាស់សឺរ៉ាំងតែមួយ សម្រាប់ចាក់ថ្នាំអ្នកជំងឺយ៉ាងហោចណាស់ ៥០នាក់ក្នុងមួយថ្ងៃ។ ក្នុងចំណោមអ្នកជំងឺទាំងអស់ ក្មេងអាយុ ៦ឆ្នាំក៏បានឆ្លងមេរោគអេដស៍ផងដែរ ក្រៅពីនេះ គឺសុទ្ធតែមនុស្សអាយុចាប់ពី ៧០ ឆ្នាំឡើងទៅ៕

ចុចអាន ៖

ប្រភព៖ RT ប្រែសម្រួល៖ រ័ត្ន