ប្រើធម៌ក្ដៅហើយ! មិនលើកលែងដាច់ខាតទាំងអ្នកឲ្យចូល និងម្ចាស់ឡានតទ្រុង
- 2018-02-09 06:40:40
- ចំនួនមតិ 0 | ចំនួនចែករំលែក 0
ប្រើធម៌ក្ដៅហើយ! មិនលើកលែងដាច់ខាតទាំងអ្នកឲ្យចូល និងម្ចាស់ឡានតទ្រុង
ចន្លោះមិនឃើញ
ក្រសួងសាធារណការចេញប្រកាសភ្លាមៗឲ្យដាក់វិធានការណ៍ក្ដៅ រាល់រថយន្តតទ្រុង និងដឹកលើសទម្ងន់កម្រិតកំណត់ ត្រូវចាប់ទុក និងកាត់ទ្រុងដោយគ្មានការលើកលែងឡើយ។
ចំណាត់ការនេះបានផ្សព្វផ្សាយ បន្ទាប់ពីអនុសាសន៍របស់ សម្ដេចតេជោ ហ៊ុន សែន នាយករដ្ឋមន្ត្រី ថ្លែងក្នុងពិធីបើកការដ្ឋានសាងសង់ស្ពានឆ្លងទន្លេមេគង្គ (ស្ទឹងត្រង់-ក្រូចឆ្មារ) ដែលថា «ចាប់ពីសូន្យម៉ោងយប់ឆ្លងចូលថ្ងៃទី១០ ខែកុម្ភៈ ឆ្នាំ ២០១៨ តទៅឲ្យតែមានឡានតទ្រុងខុសលក្ខណៈបច្ចេកទេស ត្រូវចាប់បញ្ចូលទ្រុងទាំងអស់ ពីព្រោះ យានយន្តទាំងនោះបានបំផ្លាញអាយុជីវិតមនុស្ស និងបំផ្លាញផ្លូវថ្នល់ដែលយើងរកលុយទាំងលំបាក លុយខ្លួនឯងផង លុយខ្ចីគេផង យកមកធ្វើផ្លូវ ហេតុអីបានមកបំផ្លាញផ្លូវដើម្បីចំណេញក្រុមហ៊ុនមួយ?»។
សម្ដេចតេជោ បន្ថែមទៀតថា បើក្រុមហ៊ុនណាមិនគោរពត្រូវប្រឈមបិទទ្វារ ហើយបើនៅតែមានវត្តមានឡានតទ្រុងចូលនៅភូមិណា តំបន់ណាមួយនោះ ចៅហ្វាយខេត្តនោះ អ្នកទទួលខុសត្រូវ។ ទន្ទឹមនឹងសម្ដេច ហ៊ុន សែន ក៏ស្វាគមន៍ឲ្យពលរដ្ឋរាយការណ៍ទៅកាន់ហ្វេសបុករបស់លោក ប្រសិនបើជួបករណីខាងលើ។
ផ្អែកតាមរបាយការណ៍ ដែលបង្ហោះដោយផេកក្រសួងសាធារណការ និងដឹកជញ្ជូន បានឲ្យដឹងថា គិតត្រឹមឆ្នាំ ២០១៧កន្លងទៅនេះ ការត្រួតពិនិត្យរថយន្តធ្វើចរាចរណ៍ចំនួន ៩២៣ ៦៥៧ គ្រឿង (មួយគ្រឿងអាចពិនិត្យុច្រើនជាងមួយដង) ក្នុងនោះមាន៖
រថយន្ត ២ ៩៥៣គ្រឿង ដឹកលើសចាប់ពី ៤តោន រហូតដល់ ៤៣តោន និងបានផាកពិន័យជាទឹកប្រាក់ជាង៥ ពាន់លានរៀល។
បានកាត់ទ្រុងចេញ ១ ២១៥គ្រឿង បានអប់រំណែនាំ ៥៤៥គ្រឿង និងដោះទ្រុងតខាងក្រោយ ៤៧៣គ្រឿង។