ផ្តាំមួយ អ្នកប្រើបណ្ដាញសង្គមច្រើន អាចមានជំងឺផ្លូវចិត្ត

2018-02-13 03:08:05
ចំនួនមតិ 0 | ចំនួនចែករំលែក 0

ចន្លោះមិនឃើញ

វត្តមានបណ្ដាញសង្គម ជួយដល់ការងារជាច្រើន ក្នុងការទំនាក់ទំនងជាមួយមិត្តភក្ដិ សាច់ញាតិ ទីជិតទីឆ្ងាយ។ ការអភិវឌ្ឍន៍ជាបន្តបន្ទាប់លើមុខងារ និងល្បឿនលើប្រព័ន្ធ បានជំរុញឲ្យមានអ្នកប្រើប្រាស់ជាច្រើន។

បណ្ដាញសង្គមមានច្រើនប្រភេទរួមមាន Facebook, YouTube, Twitter, Google Plus, Instagram, Snapchat, Reddit, Tumblr, Pinterest, Vine និង LinkedIn ។

ការសិក្សាមួយលើឥរិយាបថមនុស្សតាមបណ្ដាញអ៊ីនធឺណិត ពីយុវជនប្រហែល ១ ៧៨៧ នាក់ ចេញនៅថ្ងៃទី ១០ ខែធ្នូ ឆ្នាំ ២០១៦ ឲ្យដឹងថា ការប្រើបណ្ដាញសង្គមច្រើនប្រភេទមានកម្រិតប៉ះពាល់ផ្លូវចិត្តច្រើនជាង ការប្រើត្រឹមអ៊ីនធឺណិតធម្មតា។

កត្តាចំណាយពេលច្រើនម៉ោងលើបណ្ដាញសង្គម ក៏បន្ថែមកម្រិតប៉ះពាល់ផងដែរ នេះដោយសារព័ត៌មានមួយចំនួនលើនោះ រួមមាន ការទំនាក់ទំនង ស្នេហា ភាពស្រស់ស្អាត ចំណេះដឹង ជីវភាពរស់នៅ បង្ហាញដោយអក្សរ ឬរូបភាព ឬវីដេអូ។ ម្យ៉ាងវិញទៀត កាន់តែអាក្រក់បើអ្នកយកព័ត៌មានទាំងនោះប្រៀបធៀបនឹងខ្លួនឯង។

លោក Brian Primack ជានាយកសកលវិទ្យាល័យ Pittsburgh Center បានបញ្ជាក់ពីបញ្ហានេះដែរថា ការប្រើបណ្ដាញសង្គមច្រើនប្រភេទ ឬកម្មវិធីច្រើនប្តូរទៅប្តូរមកក្នុងពេលប្រើប្រាស់ (Multitasking) អាចធ្វើឲ្យចុះថយលើការយកចិត្តទុកដាក់ ការស្វែងយល់ និងអារម្មណ៍។

អ្នកស្រី Joanne Davila ជាសាស្ត្រាចារ្យផ្នែកចិត្តវិទ្យានៅសកលវិទ្យាល័យ Stony Brook បានស្ទង់មតិមនុស្សមួយចំនួន បង្ហាញថាការទទួលសារណាមួយពីអ្នកមិនស្គាល់ អាចបង្កើនកម្រិតហានិភ័យដល់ផ្លូវចិត្ត ដោយយល់ថាគ្មានសុវត្ថិភាព ឬគិតបែបអវិជ្ជមានលើសង្គម។

អ្នកស្រី Samantha Rosenthal ជាអ្នកស្រាវជ្រាវផ្នែករោគរាតត្បាត (Epidemiology) នៅសកលវិទ្យាល័យសុខភាពសាធារណៈ Brown បានស្ទង់មតិយុវជន ២៦៤ នាក់បង្ហាញថា ៨០% អ្នកចូលរួមមានបទពិសោធន៍អវិជ្ជមានយ៉ាងហោចណាស់មួយ លើ Facebook ហើយ ៦០% មាន ៤ ឬច្រើនជាងនេះ ដែលសុទ្ធសឹងតែបង្កើនហានិភ័យដល់ផ្លូវចិត្ត។

ដូច្នេះ អ្នកគួរប្រើប្រាស់បណ្ដាញសង្គមក្នុងកម្រិតមួយអាចគ្រប់គ្រងបាន ទាំងចំនួនប្រភេទបណ្ដាញសង្គម ចំនួនម៉ោងចំណាយពេលលើនោះ ព្រមទាំងប្រើព័ត៌មានឲ្យបានត្រឹមត្រូវ៕