FIFA ប្រជុំថ្ងៃមុន ចាត់ចែងយ៉ាងណា រឿងកាលវិភាគប្រកួតរញ៉េរញ៉ៃ ជម្រើសជាតិជាន់លីគ

2018-02-13 01:29:04
ចំនួនមតិ 0 | ចំនួនចែករំលែក 0

ចន្លោះមិនឃើញ

កិច្ចប្រជុំកំពូល FIFA Executive Football Summit 2018 ដែលមាន២០ប្រទេសចូលរួមកាលពីសប្ដាហ៍មុន ក៏មានលើកយកបញ្ហាកាលវិភាគប្រកួតជម្រើសជាតិ ការដោះដូរកីឡាករ និងបញ្ហាកីឡាករផ្ទាល់ផងដែរ។

ទាក់ទងទៅនឹងបញ្ហានេះ ដែលកម្ពុជាផ្ទាល់ក៏កំពុងជួបប្រទះដែរនោះ គឺប្រធាន FIFA លោក Gianni Infantino និយាយក្រោយចប់ការប្រជុំថា នៅមិនទាន់រកឃើញដំដោះស្រាយល្អនៅឡើយទេ។ ប្រធានសហព័ន្ធបាល់ទាត់អន្តរជាតិរូបនេះបន្ដថារឿងនេះ ត្រូវការពេលវេលាបន្ដទៀត ខណៈដែលសហព័ន្ធគ្រប់ប្រទេសទាំងអស់ត្រូវធ្វើតាមកម្មវិធីចាស់សិន ដែលបានរៀបចំទុក ហើយធ្វើយ៉ាងណាមិនត្រូវឱ្យជាន់គ្នាជាមួយជម្រើសជាតិ និងការប្រកួតលីគឡើយ។

បុរសវ័យ៤៧ឆ្នាំខាងលើបន្ដថា កាលវិភាគចាស់នេះត្រូវបានធ្វើឡើងតាំងពីប្រធានចាស់មកម្ល៉េះ ខណៈដែលពេលលោកឡើងកាន់តំណែងនៅមិនទាន់មានការកែប្រែឡើយ ព្រោះសុពលភាពមិនទាន់អស់។ ដូច្នេះហើយ គ្រប់សហព័ន្ធត្រូវតែរៀបចំកម្មវិធីឱ្យបានរលូន កុំឱ្យខាងក្លឹប ឬលីគមានការប្រែប្រួលច្រើន។

កម្មវិធី FIFA Executive Football Summit ឆ្នាំ២០១៨នេះ ត្រូវធ្វើឡើង១២ដង ដោយត្រូវឆ្លាស់ប្រទេសគ្នាធ្វើជាម្ចាស់ផ្ទះ ។ ខណៈដែលការប្រជុំនេះ នឹងលើកយកចំណុចផ្សេងៗជាច្រើនដើម្បីអភិវឌ្ឍបាល់ទាត់ឱ្យកាន់តែល្អថែមទៀត៕

អត្ថបទ៖ មុន្នីរម្យ