សុខៗ Sanchez ស្រាប់តែទម្លាយពីទុក្ខលំបាក កីឡាករបាល់ទាត់អាជីពដែលមនុស្សភាគច្រើននឹកមិនឃើញ

2018-02-12 12:41:21
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ ខ្សែប្រយុទ្ធ Alexis Sanchez បានបង្ហើបពីទុក្ខលំបាកមួយចំនួនក្នុងការលេងជាកីឡាករបាល់ទាត់អាជីព។

កីឡាករស៊ីលីបានថ្លែងប្រាប់សារព័ត៌មាន Sky Sports ថា៖ "ពិតណាស់ ដែលថាបាល់ទាត់អាចផ្ដល់មកឲ្យពួកយើងនូវជីវិតមួយដ៏ឡូយឆាយ ប៉ុន្តែមនុស្សភាគច្រើនមិនបានឃើញពីការប្រឹងប្រែងរបស់ពួកយើងនៅពីក្រោយឆាកនោះឡើយ"។

Sanchez បានគូសបញ្ជាក់ទៀតថា៖ "ការប្រឹងប្រែងនៅខាងក្រោយឆាកនោះ អាចស្ថិតក្រោមរូបភាពដូចជា មិនបានឧស្សាហ៍នៅជុំគ្នាជាមួយក្រុមគ្រួសារ ឬក៏មិនបានចូលរួមខួបកំណើតរបស់អ្នកម្ដាយជាដើម។ កន្លងមក មានកីឡាករច្រើនណាស់ ហ្វឹកហាត់ និងផ្ដោតអារម្មណ៍ខ្លាំងពេក រហូតដល់ភ្លេចថ្ងៃកូនរបស់ខ្លួនកើត"។

ខ្សែប្រយុទ្ធបិសាចក្រហមរូបនេះ បានបន្ត៖ "កីឡាករខ្លះថែមទាំងយំទៀតផង ពេលចាញ់វគ្គផ្ដាច់ព្រ័ត្រ ពីព្រោះពួកគេចង់ឈ្នះខ្លាំងណាស់។ ទោះជាយ៉ាងណា មិនមានមនុស្សជាច្រើនទេ ដែលមើលឃើញពីទុក្ខលំបាកទាំងអស់នេះ"។

សូមបញ្ជាក់ផងដែរថា នៅបណ្ដាលីគធំៗនៅអឺរ៉ុប ជាពិសេសនៅ Premier League កីឡាករមានប្រាក់ឈ្នួលច្រើនៗណាស់។ តួយ៉ាង Sanchez ខ្លួនឯងផ្ទាល់ ត្រូវបានគេរាយការណ៍ថា មានប្រាក់នឿយហត់ដល់ទៅ ៤០ ម៊ឺនផោន (ជាង ៥៥ម៊ឺនដុល្លារសហរដ្ឋអាមេរិក) ក្នុងមួយសប្ដាហ៍ នៅក្លឹប Manchester United៕

ប្រភព៖ Sky Sports | 90min ប្រែសម្រួល៖ ហ៊ីម រស្មី