iPhone X ឆ្នាំ ២០១៨ នឹងមានក្បាលឆកតូចជាងមុន
- 2018-02-17 02:32:58
- ចំនួនមតិ 0 | ចំនួនចែករំលែក 0
iPhone X ឆ្នាំ ២០១៨ នឹងមានក្បាលឆកតូចជាងមុន
ចន្លោះមិនឃើញ
Apple នឹងបញ្ចេញ iPhone ស៊េរីថ្មីចំនួន ៣ ម៉ូដែលនៅចុងឆ្នាំ ២០១៨ នេះ ដោយមានបំពាក់ប្រព័ន្ធកាមេរ៉ា TrueDepth ជំនាន់ទីពីរ ដែលធ្វើឲ្យស្នាមឆកនៃផ្នែកខាងលើមានទំហំតូចជាងមុន។ នេះបើផ្អែកតាមកំណត់ត្រាស្រាវជ្រាវបញ្ចេញដោយអ្នកវិភាគល្បីៗជាច្រើនរូបរបស់ធនាគារ Barclays។
អត្ថន័យនៃកំណត់ត្រាស្រាវជ្រាវមានដូចតទៅនេះ ៖
“ផ្អែកតាមទិន្នន័យមួយចំនួននៅក្នុងត្រីមាសទី ៤ ឆ្នាំ ២០១៧ និងជំនួបជាមួយដៃគូផ្គត់ផ្គង់នៅក្នុងកម្មវិធី CES យើងនៅតែមានការជឿជាក់ថា Apple នឹងបំពាក់ប្រព័ន្ធកាមេរ៉ា TrueDepth 3D នៅលើ iPhone ឆ្នាំ ២០១៨ គ្រប់ម៉ូដែល និងនៅលើ iPad ស៊េរីថ្មីផងដែរ។
មើលលើភាពស្មុគស្មាញ និងការចំណាយពេលរាប់ឆ្នាំដើម្បីបង្កើតប្រព័ន្ធកាមេរ៉ា TrueDepth លើ iPhone X នាពេលបច្ចុប្បន្ន គួបផ្សំនឹងការលើកឡើងរបស់ក្រុមហ៊ុនផ្គត់ផ្គង់នៅរយៈពេលប៉ុន្មានខែកន្លងមកនេះ យើងមិនអាចស្រមៃអំពីផ្លាស់ប្ដូររចនាបថរបស់ប្រព័ន្ធកាមេរ៉ានេះនៅឆ្នាំ ២០១៨ នោះទេ។ យើងរំពឹងថាប្រព័ន្ធកាមេរ៉ានេះនឹងវិវត្តន៍បន្តិចបន្តួចបំផុត ជាពិសេសលើការបង្រួមទំហំឲ្យតូច និងបង្កើនសមត្ថភាព"។
ប្រព័ន្ធកាមេរ៉ាដែលមានទំហំតូចជាងមុន អាចនឹងជាការផ្លាស់ប្ដូរមុខមាត់តែមួយគត់នៅលើ iPhone X ជំនាន់ថ្មី ប៉ុន្តែគេនៅរង់ចាំមើលថាវានឹងកើតឡើងក្នុងពេលឆាប់ៗឬយ៉ាងណា។ ចចាមអារ៉ាមនាពេលកន្លងទៅបានសន្និដ្ឋានថាប្រព័ន្ធកាមេរ៉ានេះនឹងបន្ថយទំហំនៅឆ្នាំ ២០១៩ ឬយូរជាងនេះ។
បន្ថែមពីនេះអ្នកវិភាគរបស់ Barclays ក៏បានបង្ហាញភាពជឿជាក់ថា Apple កំពុងសម្ងំផលិតប្រព័ន្ធកាមេរ៉ា TrueDepth សម្រាប់កាមេរ៉ាខាងក្រោយរបស់ iPhone នាថ្ងៃអនាគតផងដែរ ហើយបច្ចេកវិទ្យានេះអាចនឹងបង្ហាញខ្លួននៅឆ្នាំ ២០១៩៕