ផ្កាយរណបវៀតណាម ត្រៀមឡើងទៅលំហអាកាសក្នុងឆ្នាំនេះ

2018-02-17 03:28:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្កាយរណបផលិតដោយវៀតណាមឥឡូវនេះត្រៀមរួចជាស្រេចដើម្បីចូលទៅក្នុងលំហអាកាសនៅឆ្នាំនេះ។

ផ្កាយរណប MicroDragon បង្កើតឡើងដោយក្រុមអ្នកស្រាវជ្រាវមកពីមជ្ឈមណ្ឌលអវកាសជាតិវៀតណាម (VNSC) ត្រូវបានរំពឹងថានឹងត្រូវបាញ់បង្ហោះដោយរ៉ុក្កែត Epsilon របស់ជប៉ុនក្នុងឆ្នាំ ២០១៨ នេះ។

បន្ទាប់ពីផ្កាយរណប PicoDragon ដំបូងបង្អស់របស់វៀតណាមទទួលបានជោគជ័យ លោកបណ្ឌិត ផាំ អាញ់ តួន អគ្គនាយកមជ្ឈមណ្ឌល VNSC និងដៃគូរបស់គាត់បានសម្រេចចិត្តអនុវត្តគម្រោងផ្កាយរណបមួយទៀតដែលមានទំហំធំជាងមុន គឺផ្កាយរណប MicroDragon ។

ផ្កាយរណប PicoDragon មានទម្ងន់ ១ គីឡូក្រាមហើយត្រូវបានដាក់ចូលក្នុងគន្លងគោចរជុំវិញផែនដីនៅឆ្នាំ ២០១៣។

ដើម្បីដំណើរការគម្រោងថ្មីនេះ VNSC បានបញ្ជូនវិស្វករវ័យក្មេងរបស់ខ្លួនចំនួន ៣៦ នាក់ទៅសាកលវិទ្យាល័យកំពូលៗ ចំនួន ៥ នៅប្រទេសជប៉ុនសម្រាប់កម្មវិធីអនុបណ្ឌិតជំនាញបច្ចេកវិជ្ជាផ្កាយរណប។

ក្រុមនេះក៏មានឱកាសក្នុងការរចនា ផលិត និងសាកល្បងផ្កាយរណប MicroDragon ក្រោមការណែនាំរបស់សាស្ត្រាចារ្យជប៉ុនផងដែរ។

ផ្កាយរណប ដែលមានទំហំ ៥០x៥០x៥០ សង់ទីម៉ែត្រនិងមានទម្ងន់ ៥០ គីឡូក្រាមនេះត្រូវបានបង្កើតឡើងដើម្បីតាមដានគុណភាពទឹកនៅតាមឆ្នេរសមុទ្រ កំណត់ទីតាំងធនធានជលផល និងតាមដានបម្រែបម្រួលនៅមហាសមុទ្រដើម្បីជួយដល់វារីវប្បកម្មរបស់ប្រទេសនេះ៕

ប្រភព ៖ rasmeinews.com