គាំទ្រខ្លាំង Tiger Street មណ្ឌលប៉ោយប៉ែត ក្រុមចូលរួមកើនពី៣២ដល់៥០ក្រុម

2018-02-17 09:49:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតពានរង្វាន់ Tiger Street Footbal Festival 2018 នៅមណ្ឌលប៉ោយប៉ែត មានការកើនឡើងខ្លាំង ដោយដំបូងឡើយរំពឹងថាមានត្រឹម៣២ក្រុម តែជាក់ស្ដែងកើនឡើងដល់៥០ក្រុមឯណោះ។

នេះជាមណ្ឌលថ្មីដែល Tiger ទើបតែចាប់ផ្ដើមបំបែកពីខេត្តបាត់ដំបង ខណៈដែលកាលពីរដូវកាលមុនៗ មណ្ឌលប៉ោយប៉ែតឬនៅខេត្តបន្ទាយមានជ័យនេះ ត្រូវលេងនៅបាត់ដំបង។ លោក ប៉ិច នី តំណាងក្រុមហ៊ុនស្រាបៀ Tiger បានឲ្យដឹងថា ការកើនឡើងនេះគឺអាចបញ្ជាក់ពីភាពជោគជ័យកាន់តែខ្លាំងពីមួយឆ្នាំទៅមួយឆ្នាំ ដោយមានក្រុមចូលរួមកើនឡើងឥតឈប់ឈរ។ ជាមួយគ្នានោះលោកក៏សូមសំណូមពរឲ្យកីឡាករចូលរួមទាំងអស់ គោរពគោលការណ៍ច្បាប់របស់គណៈកម្មការប្រកួត។

ដោយឡែកលោកស្រី ថោង បវរលក្ខិណា ជា Brand Manager របស់ក្រុមហ៊ុនស្រាបៀ Tiger ក៏បានបង្ហាញចំណាប់អារម្មណ៍រីករាយពេលឃើញក្រុមចូលរួមច្រើនយ៉ាងនេះដែរ។ មួយវិញទៀតអ្នកស្រីរំពឹងថានៅថ្ងៃប្រកួតស្អែកនេះ នឹងមានការចូលរួមពីអ្នកគាំទ្រឱ្យកាន់តែច្រើនថែមទៀត។ ក្រៅពីការប្រកួតបាល់ទាត់ទៅ នៅពេលយប់ក៏មានការប្រគំតន្ត្រីយក្សមួយដែរ ដោយមានការចូលរួមពីតារាចម្រៀងល្បីៗដូចជា Zono ឳក សុគន្ធកញ្ញា ណុប បាយ៉ារឹទ្ធ Step និងរ៉េត ស៊ូហ្សាណា ។

ដោយសារតែមានការចូលរួមពីក្រុមកើនឡើងដល់៥០ក្រុម បានធ្វើឱ្យលោក ទុយ វិច្ឆិកា ប្រធានផ្នែកបច្ចេកទេសនៃការប្រកួត កែប្រែពេលវេលាបន្តិច ដោយប្ដូរពីលេង១២នាទី១ប្រកួតមកលេង១០នាទីក្នុងមួយប្រកួតវិញ។ ខណៈ ដែលក្រុមកើនឡើងខ្លាំងយ៉ាងនេះក្ដី ប៉ុន្តែការប្រកួតនៅលេង១ថ្ងៃដដែល ហើយជ្រើសរើសយកក្រុមទៅលេងនៅវគ្គផ្ដាច់ព្រ័ត្រតែ៣ក្រុមទេ។

សម្រាប់មណ្ឌលប៉ោយប៉ែតនេះប្រាក់រង្វាន់មាន ចំណាត់ថ្នាក់លេខ១នឹងទទួលបាន ១ ០០០ដុល្លារ ក្រុមលេខ២ទទួលបាន៧០០ដុល្លារ ក្រុមលេខ៣ទទួលបាន ៣៥០ដុល្លារនិងក្រុមលេខ៤ទទួលបាន១៥០ដុល្លារ។ ចំពោះក្រុមបានលេខ៤ ទទួលបានប្រាក់រង្វាន់ ប៉ុន្តែមិនអាចទៅលេងវគ្គផ្ដាច់ព្រ័ត្របានទេ៕