មហាសេដ្ឋីបច្ចេកវិទ្យា ៧ រូបដែលកម្រមានអ្នកស្គាល់បំផុត

2018-02-19 02:25:40
ចំនួនមតិ 0 | ចំនួនចែករំលែក 0

ចន្លោះមិនឃើញ

Mark Zuckerberg, Jack Ma, Elon Musk ឬ Bill Gates ជាឈ្មោះមហាសេដ្ឋីបច្ចេកវិទ្យាដែលមានមនុស្សស្គាល់ច្រើនបំផុត ប៉ុន្តែអ្នកមានបានខាងផ្នែកបច្ចេកវិទ្យាចំនួន ៧ រូបខាងក្រោម ប្រហែលជាមានអ្នកស្គាល់តិចតួចណាស់។

១. Rishi Shah

ជានាយកប្រតិបត្តិវ័យ ៣១ ឆ្នាំ របស់ក្រុមហ៊ុន Outcome Health ដែលមានទ្រព្យសម្បត្តិ ៣,៦ ពាន់លានដុល្លារ ។ បច្ចុប្បន្នក្រុមហ៊ុននេះមានលក់ Tablet និងឧបករណ៍ Touchscreen ធំៗសម្រាប់គ្លីនិក និងមជ្ឈមណ្ឌលសុខភាព ហើយក៏ជាក្រុមហ៊ុនផលិត Software មួយដែរ។ តម្លៃរបស់ Outcome Health មានប្រមាណ ៥,៦ ពាន់លានដុល្លារ ហើយលោក Rishi Shah កាន់កាប់ភាគហ៊ុន ៨០%។

២. Frank Wang

នាយកប្រតិបត្តិក្រុមហ៊ុន DJI Technology រូបនេះមានទ្រព្យសម្បត្តិ ៣,២ ពាន់លានដុល្លារ នៅវ័យ ៣៧ ឆ្នាំរបស់ខ្លួន។ DJI ជាក្រុមហ៊ុនផលិតកូនយន្តហោះ (Drone) មានបំពាក់កាមេរ៉ាដ៏ល្បីឈ្មោះមួយ ហើយនៅឆ្នាំ ២០១៧ ក្រុមហ៊ុននេះមានកាន់កាប់ទីផ្សារ Drone ចំនួន ៧០% ឯណោះ។

៣. Jan Koum

ជានាយកប្រតិបត្តិវ័យ ៤១ ឆ្នាំរបស់ WhatsApp ដែលមានទ្រព្យសម្បត្តិ ៩,៧ ពាន់លានដុល្លារ ។ នៅឆ្នាំ ២០១៤ កម្មវិធីផ្ញើសារ WhatsApp ត្រូវបាន Facebook ទិញយកក្នុងតម្លៃ ២២ ពាន់លានដុល្លារ ដែលធ្វើឲ្យលោក Jan ទទួលបានផលចំណេញជាច្រើន។

៤. Brian Acton

Brian ជាសហស្ថាបនិកមួយរូបរបស់ WhatsApp។ ក្រោយពី Facebook ទិញយកកម្មវិធីផ្ញើសារនេះ សហស្ថាបនិកវ័យ ៤៥ ឆ្នាំរូបនេះក៏ទទួលបានប្រាក់លាភមិនតិចដែរ ដោយបច្ចុប្បន្នមានទ្រព្យសម្បត្តិ ៦,៧ ពាន់លានដុល្លារ ។

៥. David Zalik

David Zalik ជានាយកប្រតិបត្តិក្រុមហ៊ុន GreenSky ដែលជាក្រុមហ៊ុនផ្គត់ផ្គង់បច្ចេកវិទ្យាដល់ធនាគារ និងពាណិជ្ជករធំៗ លើការទូទាត់ និងលើកិច្ចការផ្សេងៗទៀត។ បច្ចុប្បន្ន នាយកប្រតិបត្តិរូបនេះមានវ័យ ៤៣ ឆ្នាំជាមួយទ្រព្យសម្បត្តិ ២ ពាន់លានដុល្លារ ។

៦. John និង Patrick Collison

បងប្អូនមួយគូនេះជាស្ថាបនិកក្រុមហ៊ុន Stripe ដែលបច្ចុប្បន្នមានអតិថិជនខ្លឹមៗនៅក្នុងដៃរួមមាន Lyft, Best Buy និង Google ដោយជាក្រុមហ៊ុនផ្គត់ផ្គង់សេវាទូទាត់តាមអនឡាញ។ ទ្រព្យសម្បត្តិរបស់ John និង Patrick រួមបញ្ចូលគ្នាមានចំនួន ១,‌១ ពាន់លានដុល្លារ ។

៧. Lu Peng

Lu Peng ជាសហស្ថាបនិកមួយរូបក្នុងចំណោមសហស្ថាបនិកទាំង ១៨ នាក់របស់ក្រុមហ៊ុន Alibaba និងកាន់កាប់តួនាទីធំៗមួយចំនួន រួមមានតំណែងជានាយកប្រតិបត្តិ Alipay ផងដែរ។ Alipay បានប្ដូរឈ្មោះជា Ant Financialដោយបច្ចុប្បន្នក្រុមហ៊ុននេះមានតម្លៃ ៧៤,៥ ពាន់លានដុល្លារ ហើយលោកស្រី Lu Peng ដែលមានវ័យ ៤៤ ឆ្នាំ បានឡើងធ្វើជាប្រធានក្រុមប្រឹក្សា ដោយមានទ្រព្យសម្បត្តិ ១,១៤ ពាន់លានដុល្លារ ៕

ប្រភព៖ Zing ប្រែសម្រួល៖ សុខហេង