ធ្លាយទាំងភ្នែល! លក្ខណៈសម្បត្តិ Galaxy S9/S9+ ដែលប្រកាសថ្ងៃ ២៥ កុម្ភៈ

2018-02-20 02:15:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្រឹមតែ៥ ថ្ងៃទៀត Galaxy S9/S9+ នឹងបង្ហាញខ្លួនជាផ្លូវការលើឆាកអន្តរជាតិ។ ប៉ុន្តែកាលពីម្សិលមិញនេះលក្ខណៈសម្បត្តិ រួមទាំងរូបរាងរបស់វាបានលេចធ្លាយឡើង ធ្វើឲ្យកក្រើកបណ្ដាញអ៊ីនធឺណិត។

Galaxy S9/S9+ មានប្រើអេក្រង់ប្រភេទ Infinity Display ដូចជា Galaxy S8/S8+ ដែរ ដោយទ្រនាប់ស្កេនម្រាមដៃបានប្ដូរទៅផ្នែកខាងក្រោយវិញ ហើយចំពោះ Galaxy S9+ មានកាមេរ៉ាភ្លោះ រចនាបថបញ្ឈរ។

កាមេរ៉ាកម្រិត ១២ MP របស់ Galaxy S9 រំពឹងថាជាការផ្លាស់ប្ដូរដ៏ធំមួយ ដោយមាន Aperture ដែលអាចប្រែប្រួលពី f/1.5 ទៅ f/2.4។ ប្រព័ន្ធកាមេរ៉ាភ្លោះលើ Galaxy S9+ នឹងមានកាមេរ៉ាមេសមត្ថភាពដូចកាមេរ៉ា Galaxy S9 បូករួមនឹងកាមេរ៉ាទីពីរមានកម្រិត ១២ MP ដែលមាន Aperture f/2.4 ដូចគ្នានឹងកាមេរ៉ាភ្លោះរបស់ Galaxy Note8។

Galaxy S9 មានអេក្រង់ AMOLED ទំហំ ៥,៨ អ៊ីញ អាចបង្ហាញរូបភាពក្នុងកម្រិត ២៩៦០ x ១៤៤០ និង Galaxy S9+ មានអេក្រង់ទំហំ ៦,២ អ៊ីញ។ ស្មាតហ្វូនទាំងពីរប្រើបន្ទះឈីប Snapdragon 845 ល្បឿន ២,៦ GHz និង Exynos 9810 ល្បឿន ២,៩ GHz។

Samsung នឹងផ្ដល់ជូនជម្រើសទំហំ RAM ពីរប្រភេទដោយប្រភេទតូចមាន RAM ៤ GB និង ប្រភេទធំមាន RAM ទំហំ ៦ GB។ អង្គផ្ទុកទិន្នន័យក្នុងម៉ាស៊ីនមានទំហំ ៦៤ GB ដូចគ្នា ដែលអាចបន្ថែមទំហំបានតាមមេមូរីកាត។

ចំណែកថាមពលថ្មវិញនៅតែមានទំហំ ៣០០០ mAh និង ៣៥០០ mAh ដូចជា Galaxy S8/S8+ ដដែល។ ចំពោះតម្លៃមិនទាន់មានការបញ្ជាក់ជាផ្លូវការនៅឡើយទេ ប៉ុន្តែការចុះផ្សាយកន្លងមកបង្ហាញ S9/S9+ ថ្លៃជាង S8/S8+ ប្រមាណ ៧០ ដុល្លារ៕