ប្លែកភ្នែក Rolls-Royce Cullinan បំពាក់កន្លែងអង្គុយទស្សនាទេសភាព

2018-02-22 23:18:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Rolls-Royce បានផ្តល់ឱកាសឲ្យបានឃើញកន្លែងអង្គុយដ៏ល្អបំផុតរថយន្ត Cullinan មុនការបង្ហាញខ្លួនជាផ្លូវការ។ គ្រឿងបំពាក់ប្រណីតពិតៗដំបូង គឺកន្លែងអង្គុយទស្សនាទេសភាព (Viewing Suite) របស់រថយន្ត Rolls-Royce Cullinan។

កន្លែងអង្គុយរបស់រថយន្ត Rolls-Royce ត្រូវបានរចនា និងផលិតឡើងនៅរោងចក្រក្នុងទីក្រុង Goodwood ហើយកន្លែងអង្គុយនេះនឹងដំណើរការដោយស្វ័យប្រវត្តិ ដោយគ្រាន់តែចុចលើប៊ូតុងមួយប៉ុណ្ណោះ។ ពូកចំនួនពីរដែលបែរទៅក្រោយ ធ្វើពីស្បែកប្រណីតមានលក្ខណៈទំនើប ព្រមជាមួយនឹងតុដាក់ស្រា នឹងបង្ហាញខ្លួនសន្សឹមៗយ៉ាងសមសួនចេញពីផ្នែកខាងក្រោយរបស់រថយន្ត Cullinan។

អគ្គនាយកប្រតិបត្តិរបស់ក្រុមហ៊ុនរថយន្ត Rolls-Royce លោក Torsten Müller-Ötvös បានថ្លែងថា គំនិតការអភិវឌ្ឍរថយន្ត Cullinan ផ្ដោតលើការផ្ដល់រថយន្តប្រណីតពិតៗ ដល់អតិថិជនតាមរយៈគ្រឿងបំពាក់ដ៏គួរឲ្យរំភើប។ សម្រស់កន្លែងអង្គុយគយគន់ទេសភាពរបស់រថយន្ត Cullinan ដែលដំណើរការដោយពុំបាច់ប្រឹង ផលិតឡើងដោយការផ្ចិតផ្ចង់ពីស្បែក ស៊ីគ្នានឹងផ្ទៃខាងក្នុងរបស់រថយន្ត Cullinan ។

ដំណើរការនេះហាក់បីដូចជាការនាំយកគ្រឿងសង្ហារិមស្រស់ស្អាតទៅកាន់ទីកន្លែងឆ្ងាយៗបំផុត ជាតឹកតាងបង្ហាញពីសមត្ថភាពរបស់អ្នករចនាម៉ូត និងសិប្បករ ផ្នែកច្នៃកុម្ម៉ង់បែប Bespoke នៅឯរោងចក្ររថយន្ត Rolls-Royce៕