ទិដ្ឋភាពផ្ទះក្រោមដីប្រពៃណីរាប់សតវត្សរបស់ទុយណេស៊ី បង្កប់ដោយរឿងរ៉ាវគួរឲ្យចាប់អារម្មណ៍
- 2018-02-24 04:24:46
- ចំនួនមតិ 0 | ចំនួនចែករំលែក 0
ទិដ្ឋភាពផ្ទះក្រោមដីប្រពៃណីរាប់សតវត្សរបស់ទុយណេស៊ី បង្កប់ដោយរឿងរ៉ាវគួរឲ្យចាប់អារម្មណ៍
ចន្លោះមិនឃើញ
នៅជ្រលងភ្នំដែលស្ងួតហែងភាគខាងត្បូងនៃតំបន់ Djebel Dahar ក្នុងប្រទេសទុយណេស៊ី ប្រជាជនបានរស់នៅអស់រាប់សតវត្សមកហើយក្នុងផ្ទះក្រោមដីដើម្បីការពារពួកគេពីកម្តៅខ្លាំងនារដូវក្តៅ និង ខ្យល់ត្រជាក់ខ្លាំងនារដូវរងា។ នេះបើតាមទីភ្នាក់ងារព័ត៌មាន Reuters ចុះផ្សាយកាលពីថ្ងៃសុក្រ។
លំនៅឋានក្រោមដីចម្លែកទាំងនេះត្រូវបានគេចោះពីចន្លោះរូងថ្ម ឬ ជីករណ្តៅដីឲ្យមានស្រទាប់ជញ្ជាំងហើយយកជញ្ជាំងដីនោះលុងធ្វើផ្ទះ ឬ ម្យ៉ាងទៀត ដោយសារតំបន់នោះជាខ្ពង់រាបដែលមានដីពូនដូចកូនភ្នំតូចៗ ប្រជាជនទុយណេស៊ី អាចធ្វើផ្ទះក្រោមដីរបស់ពួកគេដោយលុងដីដំបូកនោះឲ្យធំទូលាយល្មមដែលអាចរស់នៅបាន។
មកទល់បច្ចុប្បន្ន មិនមានប្រជាជនច្រើនទៀតទេដែលនៅក្នុងផ្ទះក្រោមដីនោះ។ គ្រួសារជាច្រើនបានចាកចេញពីផ្ទះក្រោមដីនៅពេលដែលទីក្រុង និង ភូមិថ្មីត្រូវបានសាងសង់នៅទសវត្សឆ្នាំ ១៩៦០ និង ១៩៧០ ជាផ្នែកមួយនៃការធ្វើទំនើបកម្មដោយលោកប្រធានាធិបតី Habib Bourguiba ។ ប៉ុន្តែប្រជាជនមួយចំនួនទៀតដែលមិនមានលទ្ធភាពរើទៅនៅភូមិថ្មីនឹងគេ ត្រូវបន្តរស់នៅតាមបែបប្រពៃណីនេះមកទល់បច្ចុប្បន្ន។
ម្ល៉ោះហើយ តំបន់នោះមិនត្រឹមតែជាកន្លែងរក្សារបៀបរបប និង ប្រពៃណីនៃការរស់នៅដ៏យូរលង់របស់ពួកគេប៉ុណ្ណោះទេ ថែមទាំងជាតំបន់ទេសចរណ៍សម្រាប់ភ្ញៀវដែលចង់ទៅមើលទៀតផង ប៉ុន្តែចំនួនភ្ញៀវទេសចរណ៍នៅទូទាំងប្រទេសទុយណេស៊ីធ្លាក់ចុះយ៉ាងគំហុកគិតចាប់តាំងពីឆ្នាំ ២០១១ នៅពេលមានបដិវត្តន៍អារ៉ាប់ស្រ្ពីង ( Arab Spring)៕