ទិដ្ឋភាពប្រកបដោយអត្ថន័យពីកម្មវិធីសិល្បៈសប្បុរសធម៌ជួយជនពិការ

2018-02-25 02:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃទី១៤ កុម្ភៈកន្លងទៅ នៅសាកលវិទ្យាល័យមេគង្គកម្ពុជាបានប្រារព្ធកម្មវិធីតន្ត្រីសិល្បៈសប្បុរសធម៌នៃសេចក្ដីស្រឡាញ់លើកទី៥ ដើម្បីស្វែងរកមូលនិធិជួយដល់ជនពិការ និងកុមារកំព្រាគថ្លង់ នៅមណ្ឌលកុមារកំព្រាភ្នំពេញថ្មីនៃអង្គការគ្រួសារថ្មី និងសមាគមតន្ត្រីសំនៀងជនពិការ។

កម្មវិធីសប្បុរសធម៌នេះ រៀបចំឡើងដោយក្លឹបសិល្បៈ និងផ្ទាំងទស្សនីយភាពមេគង្គក្រោមអធិបតីភាព ឯកឧត្តម ឯម ច័ន្ទមករា អគ្គលេខាធិការនៃក្រុមប្រឹក្សាសកម្មភាពជនពិការ និងជាតំណាង ឯកឧត្តម វង សូត្រ រដ្ឋមន្ត្រីក្រសួងសង្គមកិច្ចអតីតយុទ្ធជន និងយុវនីតិសម្បទា។

កញ្ញា ថៅ ពេជ្រអម្រិត ប្រធានក្លឹបសិល្បៈ និងផ្ទាំងទស្សនីយភាពមេគង្គ ហើយក៏ជាប្រធានគណកម្មការរៀបចំកម្មវិធីតន្ត្រីសប្បុរសធម៌នេះ បានឲ្យដឹងថា ៖« ក្រៅពីដើម្បីស្វែងរកជំនួយជួយជនពិការហើយ យើងក៏ចង់បណ្តុះស្មារតីយុវជនដែលតែងតែគិតថាថ្ងៃ១៤កុម្ភៈជាថ្ងៃនៃក្តីស្រឡាញ់ដែលមានសម្រាប់សង្សារ មកជាទិវានៃក្តីស្រឡាញ់ដែលយុវជនមានចំពោះសង្គមជាតិខ្លួន រំលឹកគុណជូនគ្រូ និងពិធីសុំខមាលទោសចំពោះលោកគ្រូអ្នកគ្រូ ផ្សព្វផ្សាយវប្បធម៌តាមរយៈការស្លៀកពាក់បុរាណ ហើយក៏ឆ្លៀតឱកាសនេះចែកលិខិតសរសើរដល់យុវជនដើម្បីវប្បធម៌ជាតិពានរង្វាន់សម្តេចតេជោឆ្នាំ២០១៥ ២០១៦ និង ២០១៧»។

លើកឡើងដោយមោទនភាព កញ្ញាបន្តថា៖«ឆ្នាំនេះក្រុមការងារផ្នែករៀបចំកម្មវិធីមាន៩០%ជាស្ត្រី ពួកគេមានការទទួលខុសត្រូវខ្ពស់ចំពោះតួនាទី ដែលធ្វើកម្មវិធីដំណើរការទៅបានយ៉ាងល្អ។ កាន់តែគួរឲ្យកោតសសើរទៀតនោះ គឺលះបង់ពេលវេលា កម្លាំងកាយចិត្តចូលរួមរបស់ក្រុមការងារយុវជនស្ម័គ្រចិត្ត នៃក្លឹបសិល្បៈ និងផ្ទាំងទស្សនីយភាពមេគង្គ នៃសាកលវិទ្យាល័យមេគង្គកម្ពុជា និងការចូលរួមគាំទ្ររបស់ភ្ញៀវកិត្តិយសទាំងអស់»៕

តោះ ! មើលទិដ្ឋភាពនៃកម្មវិធីប្រកបដោយអត្ថន័យមួយនេះ ៖