ខ្លាំងដៃណាស់! Nokia ចេញស្មាតហ្វូនថ្មីម្ដង ៤ គ្រឿង ប្រភេទម៉េចក៏មានដែរ

2018-02-26 02:59:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងព្រឹត្តិការណ៍ MWC ឆ្នាំ ២០១៨ កាលពីយប់មិញនេះ ក្រុមហ៊ុន HMD Global បានបង្ហាញចេញស្មាតហ្វូនម៉ាក Nokia ដល់ទៅ ៤ ស៊េរី រួមមាន Nokia 1, Nokia 7 Plus, Nokia 8 Sirocco និង Nokia 6 (ឆ្នាំ ២០១៨) ដែលប្រកាសចេញម្ដងរួចមកហើយ។

Nokia 7 Plus

មានបំពាក់ដោយអេក្រង់ដែលមានមាត្រដ្ឋាន 18:9 ដែលមានទំហំ ៦ អ៊ីញ អាចបង្ហាញរូបភាពក្នុងកម្រិត 2160 x 1080p។ តួខ្លួនផលិតឡើងពីសារធាតុអាលុយមីញ៉ូម ដែលមានជម្រើសពណ៌ខ្មៅ និង ស។

វាដំណើរការដោយបន្ទះឈីប Snapdragon 660 ដែលមាន RAM ទំហំ ៤ GB និងមានអង្គផ្ទុកទិន្នន័យទំហំ ៦៤ GB ហើយមានរន្ធសម្រាប់ដោតមេមូរីកាតបាន។ មានជាប្រភេទស៊ីមមួយ និងស៊ីមពីរ ដែលមានតម្លៃចាប់ពី ៤៩១ ដុល្លារឡើងទៅ (តម្លៃទីផ្សារអឺរ៉ុប)។

ជាស្មាតហ្វូនធន់កណ្ដាលមែនពិត ប៉ុន្តែមានបំពាក់ដោយប្រព័ន្ធកាមេរ៉ាភ្លោះដែលកាមេរ៉ាមេមានកម្រិត ១២ MP ជាមួយ Aperture f/1.75 និងទីពីរជាប្រភេទ Telephoto មានកម្រិត ១២ MP ជាមួយ Aperture f/2.6 អាចបង្កើតរូបភាពច្បាស់ខាងមុខព្រាលផ្ទៃខាងក្រោយបាន។ កាមេរ៉ាខាងមុខមានកម្រិត ៥ MP ដែលមាន Aperture f/2.0 អាចថតរូបភាពបានក្នុងទំហំ ៨៤ ដឺក្រេឯណោះ។

Nokia 8 Sirocco

Nokia 8 Sirocco ជាប្រភេទ Premium នៃ Nokia 8 ធម្មតា ប៉ុន្តែបើមើលឲ្យជាក់ទៅ ប្រៀបដូចជាស្មាតហ្វូនម៉ូដែលថ្មីមួយអ៊ីចឹង។ Nokia 8 Sirocco ប្រើអេក្រង់ p-OLED មានទំហំ ៥,៥ អ៊ីញ ដែលអាចបង្ហាញរូបភាពក្នុងកម្រិត QHD ខុសពី Nokia 8 ធម្មតាដែលប្រើអេក្រង់ LCD។

បន្ទះឈីបនៅតែជាប្រភេទ Snapdragon 835 មាន RAM ទំហំ ៦ GB។ តួខ្លួនផលិតឡើងពីសារធាតុអាលុយមីញ៉ូម និងមានការពារដោយកញ្ចក់ Gorilla Glass 5 ទាំងផ្ទៃខាងមុខ និងខាងក្រោយទៀតផង។ ការប្រើកញ្ចក់នៅខាងក្រោយនេះ អាចឲ្យ Nokia 8 Sirocco ទ្រាំទ្រនឹងមុខងារសាកថ្មឥតប្រើខ្សែបាន។

Nokia 8 Sirocco ក៏មានកម្រិតការពារទឹក IP67 ខ្លាំងជាង Nokia 8 ធម្មតាមានកម្រិតការពារត្រឹម IP54។ ចំពោះប្រព័ន្ធកាមេរ៉ាភ្លោះលើ Nokia 8 Sirocco ដូចគ្នានឹង Nokia 7 ដែរ ដោយមានទំហំ ១២ MP + ១២ MP។ Nokia 8 Sirocco នឹងមានចេញលក់នៅខែមេសា ក្នុងតម្លៃ ៩២២ ដុល្លារ (តម្លៃទីផ្សារអឺរ៉ុប)។

Nokia 1

ជាស្មាតហ្វូនលំដាប់ក្រោមគេ ដែលដំណើរការដោយបន្ទះឈីប MediaTek ល្បឿន ១,១ GHz មាន RAM ទំហំ ១ GB និងអង្គផ្ទុកទិន្នន័យ ៨ GB។ អេក្រង់មានទំហំ ៤,៥ អ៊ីញ បង្ហាញរូបភាពក្នុងកម្រិត 854x480p។

Nokia 1 មានកាមេរ៉ាទំហំ ៥ MP ដំណើរការដោយប្រព័ន្ធប្រតិបត្តិការ Android Oreo (Go Edition) ដែលនឹងដាក់លក់ទូទាំងសកលលោកក្នុងតម្លៃ ៨៥ ដុល្លារ។

Nokia 6 (2018)

Nokia 6 (2018) ដែលបានចេញលក់នៅប្រទេសចិននាខែមករា នឹងបញ្ចេញលក់នៅទីផ្សារអឺរ៉ុបនាខែមេសា ក្នុងតម្លៃ ៣៤៣ ដុល្លារ។

Nokia 6 (2018) មានអេក្រង់ទំហំ ៥,៥ អ៊ីញ អាចបង្ហាញរូបភាពក្នុងកម្រិត 1080p ជាមួយមាត្រដ្ឋាន 16:9។ វាដំណើរការដោយបន្ទះឈីប Snapdragon 630 ដែលមាន RAM ទំហំ ៣ GB/អង្គផ្ទុកទិន្នន័យ ៣២ GB និង RAM ទំហំ ៤ GB/អង្គផ្ទុក ៦៤ GB។

កាមេរ៉ាក្រោយទំហំ ១៦ MP មាន Aperture f/2.0 និងកាមេរ៉ា Selfie មានកម្រិត ៨ MP។ Nokia 6 (2018) ក៏មានមុខងារថតរូបបែប Bothie ផងដែរ។ ប្រព័ន្ធប្រតិបត្តិការជា Android 7.0 Nougat ប៉ុន្តែថ្មីៗនេះអាចទទួលបានការអាប់ដេតឡើងទៅ Android 8.0 Oreo៕

ប្រភព៖ The Verge | GSMarena | Androidauthority ប្រែសម្រួល៖ សុខហេង