ការប្រកួតសម្រស់មួយ ស្ត្រីខ្មែរអាចមានឱកាសឈ្នះប្រាក់ជាង៦ម៉ឺនដុល្លារ

2018-02-27 03:34:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសកម្ពុជាគ្រោងនឹងនាំស្ត្រីខ្មែរចំនួន១៥រូបទៅចូលរួមការប្រកួតអន្តរជាតិមួយមានឈ្មោះថា Queen Of The Spa ដោយរង្វាន់ជើងឯកនៃការប្រកួតនេះមានទឹកប្រាក់សុទ្ធ៦ម៉ឺនដុល្លារ បូកនិងមកុដពេជ្រមានតម្លៃជាង៣ម៉ឺនដុល្លារ។ នេះបើតាមការឲ្យដឹងពីលោកជំទាវបណ្ឌិត ហង្ស បូរី គណៈកម្មការមួយរូបក្នុងចំណោមគណៈកម្មការជាច្រើនរូបទៀតនៃការប្រកួតនេះ ។

តាមការឲ្យដឹងពីលោក ជំទាវបណ្ឌិត ហង្ស បូរី នេះជាលើកទី១ហើយដែលប្រទេសកម្ពុជា បានបញ្ជូននារីខ្មែរទៅចូលរួមកម្មវិធី Queen of The Spa នេះ ដោយក្នុងនោះស្ត្រីខ្មែរចំនួន១៥រូបទៅចូលរួមការប្រកួតអន្តរជាតិមួយនេះ។ កម្មវិធីគ្រោងនឹងធ្វើការប្រកួតនៅប្រទេសកូរ៉េខាងត្បូងថ្ងៃទី៩ ដល់ ថ្ងៃទី១៣ ខែ មេសា ឆ្នាំ ២០១៨។ ប្រទេសដែលនឹងត្រូវចូលរួមការប្រកួតនេះមាន ប្រទេសចិន តៃវ៉ាន់ កម្ពុជា និងកូរ៉េខាងត្បូង។

លោកជំទាវដដែល បានមានប្រសាសន៍ថា បេក្ខនារីដែលចូលរួមការប្រកួតនេះមិនសំដៅទៅលើកញ្ញាឡើយ អ្នកដែលមានស្វាមីរួចហើយ ក៏អាចចូលរួមបានដែរ ប៉ុន្តែត្រូវបានអាយុចាប់ពី១៨ឆ្នាំ រហូតដល់៣៥ឆ្នាំ។ បេក្ខនារី មិនត្រឹមតែត្រូវមានរូបសម្រស់ស្អាតប៉ុណ្ណោះទេ ប៉ុន្តែក៏ត្រូវមានកិរិយាមាយាទល្អផងដែរ។ ជាមួយគ្នានោះដែរ ក្រៅពីអាចមានឱកាសបានឈ្នះរង្វាន់ពីកម្មវិធី បេក្ខនារីនឹងបានយល់ដឹងពីបទពិសោធ គន្លឹះនៃបច្ចេកវិទ្យាទំនើប ពាក់ព័ន្ធនឹងស្ត្រី ការផ្ដល់សេវាកម្មផ្នែកកែសម្ផស្សលើពិភពលោកផងដែរ។

សម្រាប់ប្រទេសកម្ពុជាបេក្ខនារី ដែលបានចូលរួម ការប្រកួតមានចំនួន៤៥រូប ក្នុងនោះគណៈកម្មការ ជ្រើសរើសយកតែ១៥រូបទេ។ បេក្ខនារីទាំង១៥រូបដែលត្រូវបញ្ជូនទៅនោះ នៅមិនទាន់ត្រូវបានគណៈកម្មការសម្រេចជ្រើសរើសនៅឡើយទេ គឺរង់ចាំការបោះត្នោតតាមអនឡាញបន្ថែមទៀត។

អ្វីដែលជាការចាប់អារម្មណ៍នោះ កញ្ញា ធី សុវណ្ណថា ដែលត្រូវបានគេស្គាល់យ៉ាងច្បាស់ថា ជាសកម្មជននយោបាយនោះ ក៏ត្រូវបានចូលរួមនៃការប្រកួតកម្មវិធីនេះផងដែរ ហើយកញ្ញាត្រូវបានគណៈកម្មការសម្រេចជ្រើសរើសយកទៅប្រកួតនៅប្រទេសកូរ៉េ ដោយស្វ័យប្រវត្តិតែម្ដង។

ចំពោះទឹកប្រាក់ជយលាភីក្នុងកម្មវិធីលោកជំទាវបណ្ឌិត ហង្ស បូរី ប្រាប់ថា ពានរង្វាន់ជើងឯកទទួលបានទឹកប្រាក់៦ម៉ឺនដុល្លារ និងមកុដពេជ្រមានតម្លៃជាង៣ម៉ឺនដុល្លារ។ លេខទី២ ទទួលបានទឹកប្រាក់៣ម៉ឺនដុល្លារ។ លេខ៣ទទួលបាន ១៥ ០០០ ដុល្លារ និង លេខ៤ ទទួលបាន ៥ ០០០ ដុល្លារ។ ទោះយ៉ាងណាលោកជំទាវ បានសម្ដែងសុទិដ្ឋិនិយមថា ប្រទេសកម្ពុជា ច្បាស់ជាអាចដណ្ដើមពានរង្វាន់ណាមួយក្នុងកម្មវិធីជាក់ជាមិនខាន៕

អត្ថបទ៖ ដេត ធន្នី