បាត់មុខប៉ុន្មានឆ្នាំ នេត សុចរិយា ត្រឡប់មកវិញប្រកាសជំនួញធំពាក់ព័ន្ធនឹងសូត្រខ្មែរ

2018-02-28 03:21:34
ចំនួនមតិ 0 | ចំនួនចែករំលែក 0

ចន្លោះមិនឃើញ

អស់រយៈពេលជាង២ឆ្នាំមកហើយដែល នេត សុចរិយា បានបន្សាត់ខ្លួនចេញពីសិល្បៈជាមួយមិត្តប្រុស ដោយទើបតែពេលនេះ នាងក៏បានប្រកាសពីការវិលត្រឡប់ជាមួយនឹងផែនការជំនួញធំដុំមួយ ពាក់ព័ន្ធនឹងសូត្រខ្មែរ។

នៅលើបណ្ដាញសង្គម នេត សុចរិយា បានប្រាប់ថា ឥឡូវនាងបានត្រឡប់មកវិញហើយ។ បន្ថែមពីលើនេះ តារាស្រីតូចច្រឡឹង បានប្រាប់ Sabay បន្ថែមថា នាងនឹងវិនិយោគជំនួញមួយឆាប់ៗ គឺរង្វង់ប៉ុន្មានថ្ងៃខាងមុខប៉ុណ្ណោះ បន្ទាប់ពីបានរៀបចំផែនការរយៈពេលយូរមកហើយ។

ជំនួញនោះ គឺនាងគ្រោងបើកហាងលក់របស់ប្រើប្រាស់ក្នុងផ្ទះធ្វើពីសូត្រខ្មែរ ដែលមានជាអាថ៌ ខ្នើយ ភួយ ជាដើម ជាប្រភេទប្រើសម្រាប់ការតុបតែងក្នុងផ្ទះ (Home Decor)។ ហាងនេះមានឈ្មោះថា “NATRIYA HOMESILK” និងមានទីតាំងនៅម្ដុំវិមានឯករាជ្យ។ យ៉ាងនេះក្ដី ចរិយា បានបដិសេធបញ្ចេញពីទុនប្រើសម្រាប់ចំណាយលើមុខជំនួញដំបូងរបស់ខ្លួននេះ។

ជុំវិញការបើកមុខរបរប្លែកក្នុងរង្វង់សិល្បករខ្មែរនេះ អតីតពិធីការិនីទូរទស្សន៍រូបនេះ ប្រាប់ថា ជាអ្វីដែលនាងស្រឡាញ់ និងចង់ប្រើចំណែកខ្លះដែលខ្លួនអាចធ្វើបាន ជួយលើកស្ទួយផលិតរបស់ខ្មែរ។ "និយាយទៅខ្ញុំស្រឡាញ់មុខរបរនេះយូរហើយ កាលខ្ញុំនៅរៀនមហាវិទ្យាល័យ ក៏ខ្ញុំធ្វើការខាងហ្នឹងដែរ អីចឹងខ្ញុំស្រឡាញ់តាំងពីហ្នុងមក ម្យ៉ាងក៏ចង់លើកកម្ពស់សូត្រខ្មែរយើងដែរ ព្រោះឃើញថា ឥឡូវគេបានងាកសូត្របរទេសចង់អស់ហើយ តែតាមពិតសូត្រខ្មែរយើងល្អណាស់ បើទោះថ្លៃបន្តិចក៏ដោយ!”។

ចរិយា បន្តថា ទន្ទឹមនឹងខ្មែរយើងងាកទៅប្រើផលិតបរទេសមាន សូត្ររបស់ចិន សូត្រជប៉ុន វៀតណាម ថៃជាដើម នាងកត់សម្គាល់ឃើញថា បរទេសបែរជាចូលចិត្តប្រើសូត្រខ្មែរទៅវិញ បើទោះជាមានតម្លៃថ្លៃបន្តិច ប៉ុន្តែគុណភាពល្អជាង។ "សំខាន់ពួកគេឲ្យតម្លៃលើសូត្រយើង ព្រោះខ្មែរយើងល្បីខាងសូត្រនេះ សំខាន់របស់យើងធ្វើពីដៃផ្ទាល់មួយសរសៃៗ ទម្រាំបាន ពួកគេឲ្យតម្លៃលើការព្យាយាម និងអត់ធ្មត់។ អីចឹងហើយ ខ្ញុំតែចង់ឲ្យមានសូត្រខ្មែរច្រើនលើទីផ្សារចឹងណាបង!”។

នេត សុចរិយា បានឃ្លាតឆ្ងាយពីសិល្បៈស្រុកអំឡុងឆ្នាំ ចុងឆ្នាំ២០១៥ បន្ទាប់ពីនាងបើកចំហទំនាក់ទំនងជាមួយមិត្តប្រុសជនជាតិសិង្ហបុរី ម៉ាឡេស៊ី និងអូស្ត្រាលីមក។ រយៈពេលបាត់មុខនេះ តារាស្រីរូបនេះ បញ្ជាក់ថា នាងបានទៅរស់នៅប្រទេសឥណ្ឌូណេស៊ីជាមួយគូស្នេហ៍២ឆ្នាំមកហើយ។ នាងទើបតែវិលចូលស្រុកវិញថ្មីៗ ដើម្បីធ្វើជំនួញផ្ទាល់ខ្លួនខាងលើ។ ដោយឡែកគូស្នេហ៍របស់នាង នៅទីក្រុងហ្សាកាតា ប្រទេសឥណ្ឌូណេស៊ីនៅឡើយ ដោយសារតែមិត្តប្រុសរូបនោះ ជាប់កិច្ចការការងារនៅទីនោះដែរ៕

អត្ថបទ៖ ទារិកា