ដឹងយ៉ាងណាខ្លះ? ពីតម្លៃខ្លួនរបស់ប្រុសស្អាត ទ្រី ដារ៉ាវុធ ទៅតាមប្រភេទការងារ

2018-03-01 03:55:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយចាប់ផ្ដើមពីតួ Background តារាសម្ដែង និងពិធីករ ទ្រី ដារ៉ាវុធ បានវិវត្តខ្លួនមកជាតារាល្បីឈ្មោះមួយរូប ដែលធ្លាប់គ្រងតំណែងតួឯក និងថតស្ប៉តពាណិជ្ជកម្មជាច្រើនណាស់មកហើយ ហើយតម្លៃខ្លួនរបស់លោក ក៏ត្រូវបានបែងចែកទៅតាមនោះដែរ។

ត្បិតថា ជាតារាស្រករក្រោយ ទើបហក់ឡើង ប៉ុន្តែតារាសម្ដែងមកពីទឹកដីព្រែកតាមាក់រូបនេះ មានតម្លៃខ្លួន ឬតម្លៃពលកម្មមិនចាញ់រៀមច្បងប៉ុន្មានឡើយ។ បញ្ហានេះ សាមីខ្លួន ប្រាប់ថា សម្រាប់ការថតរឿងដុំ គឺលោក ទទួលថ្លៃពលកម្មចាប់ពី ២០០០ដុល្លារ ឡើងទៅ។ តម្លៃនេះ គឺប្រើប្រួលទៅតាមចំនួនថ្ងៃថត តិច ឬច្រើនទៀត។

ដោយសម្រាប់រឿងភាគ ដារ៉ាវុធ បញ្ចេញឲ្យដឹងថា លោកយកថ្លៃពលកម្មចាប់ពី ៣០០០ដុល្លារឡើង។ បន្ថែមពីនេះ តម្លៃក៏ប្រែប្រួលតាមចំនួនភាគថា តិចឬច្រើនដូចគ្នា។ ដោយឡែកសម្រាប់ការថតស្ប៉តពាណិជ្ជកម្មនានាវិញ លោកប្រាប់ថា មានចាប់ពី ៧០០ដុល្លារ ឡើងទៅ។

"ចំពោះការថតពាណិជ្ជកម្ម ខ្ញុំយកចាប់ពី ៧០០ដុល្លារឡើងទៅ ហើយស្ប៉តខ្លះ ក៏មានដល់ជាង ១០០០ដុល្លារក៏មានដែរបង អាស្រ័យទៅតាមប្រភេទស្ប៉ត និង Budjet ម្ចាស់ស្ប៉តនីមួយ បើរបស់អង្គការអី យើងអាចយោគយល់ទៅតាមហ្នឹងណាបង!”។ ទ្រី ដារ៉ាវុធ បន្ថែម។

រូបភាព៖ហ្វេសប៊ុក ដារ៉ាវុធ

ដារ៉ាវុធ ចូលសិល្បៈនាពាក់កណ្ដាលឆ្នាំ ២០១៥ ដោយដំបូងឡើយ គ្រាន់ជាតួ Background(តួអម) ប៉ុណ្ណោះ។ ប៉ុន្តែក្រោយលោកជាប់ជយលាភីលេខ១ក្នុងកម្មវិធី Freshie Girls & Boys ជំនាន់ទី១៦ មក អ្វីៗក៏បានផ្លាស់ប្ដូរ ដោយលោកអាចឈានមកចាប់បានតំណែងតួឯកបន្តបន្ទាប់ក្នុងខ្សែភាពយន្តសម្រាប់រោងកុន វីដេអូភាគសម្រាប់ទូរទស្សន៍។ ក្រៅពីអាជីពសិល្បៈ ទ្រី ដារ៉ាវុធ ក៏ជាថៅកែហាងកាហ្វេមួយកន្លែងឈ្មោះ "Artist Coffee” នៅលើទឹកដីកំណើតព្រែកតាមាក់ទៀតផង៕

អត្ថបទ៖ ទារិកា