Apple បង្កើតគ្លីនិក ដើម្បីផ្ដល់សេវាសុខភាពដល់បុគ្គលិករបស់ខ្លួន

2018-03-03 06:49:34
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple កំពុងរៀបចំបើកដំណើរការគ្លីនិកដើម្បីផ្ដល់សេវាថែរក្សាសុខភាពដល់បុគ្គលិករបស់ខ្លួន នៅអំឡុងនិទាឃៈរដូវខាងមុខ (ខែមីនា - ខែឧសភា)។ ក្រុមហ៊ុនយក្សនេះបានបើកដំណើរការវិបសាយសម្រាប់គ្លីនិករួចរាល់ហើយ ដោយនឹងដំណើរការក្រោមឈ្មោះ AC Wellness។

បច្ចុប្បន្ននេះ Apple មានមជ្ឈមណ្ឌលសុខភាពមួយកន្លែងក្នុងទីស្នាក់ការនាទីក្រុង Cupertino រដ្ឋ California ដែលមាននូវវេជ្ជបណ្ឌិត, គ្រូចាប់សរសៃ, អ្នកជំនាញខាងចំណីអាហារ និង អ្នកព្យាបាលរាងកាយ។

ផ្អែកតាមសារព័ត៌មាន CNBC ឲ្យដឹងគ្លីនិកពីរកន្លែងនឹងបើកនៅតំបន់ Santa Clara ក្នុងរដ្ឋ California ហើយ AC Wellness ក៏បានប្រកាសរើសបុគ្គលិកបម្រើការលើការងារសំខាន់ៗរួចរាល់ហើយ។ Apple ក៏កំពុងតែស្វែងរកអ្នកបង្កើតកម្មវិធីនៅគ្លីនិក ដែលអាចបង្កើតកម្មវិធីដើម្បីជួយទប់ស្កាត់កុំឲ្យកើតមានជំងឺ និងផ្សាយពីការរស់នៅដែលមានសុខភាពល្អដល់បុគ្គលិករបស់ខ្លួន។ បន្ថែមពីនេះ Apple ក៏នឹងប្រើគ្លីនិកថ្មីដើម្បីសាកល្បងផលិត និងសេវាកម្មទាក់ទងនឹងសុខភាព។

Apple ជាក្រុមហ៊ុនបច្ចេកវិទ្យាក្រោយគេ ដែលបានបោះជើងចូលការថែរក្សាសុខភាព។ ក្រុមហ៊ុន Amazon បានប្រកាសកាលពីខែមុនថាបង្កើតក្រុមហ៊ុនថែរក្សាសុខភាពសម្រាប់បុគ្គលិករបស់ខ្លួន រួមទាំងក្រុមគ្រួសាររបស់បុគ្គលិកថែមទៀតផង៕

ប្រភព៖ The Verge ប្រែសម្រួល៖ សុខហេង