សួរ​​ Fan iPhone ហេតុ​អ្វី​មិន​ប្ដូរ​ប្រើ​ iPhone X ចេញ​ចម្លើយ​ខុសៗ​គ្នា

  • 2018-03-06 03:17:07
  • ចំនួនមតិ

ចន្លោះមិនឃើញ

​អ្នក​វិភាគ​មួយ​រូប​ឈ្មោះ​ Michael Olson បាន​បង្កើត​ការ​ស្ទង់មតិ​មួយ​ចំពោះ​អ្នក​ប្រើ​ប្រាស់​ iPhone ចំនួន​ ១ ៥០០ នាក់​ក្នុង​សហរដ្ឋអាមេរិក​ ដែល​​មិន​បាន​​ប្ដូរ​ប្រើ​ iPhone X។

ក្នុង​ចំណោម​​អ្នក​កំពុង​ប្រើ​ iPhone ទាំង​ ១ ៥០០ នាក់​ មាន​ ៤៤% និយាយ​ថា​​មិន​ប្ដូរ​ប្រើ​ iPhone X ព្រោះ​តែ​ iPhone របស់​ពួក​គេ​នៅ​​ប្រើ​បាន​ធម្មតា​ ដែល​ជា​ការ​សន្និដ្ឋាន​ថា​ iPhone X មិន​មាន​មុខងារ​ពិសេស​ដែល​អាច​ទាក់​ចិត្ត​ពួក​គេ​បាន។ ចំណែក​ឯ​ ៣១% និយាយ​ថា​ iPhone X មាន​តម្លៃ​ថ្លៃ​ពេក​ ដោយ​មាន​តម្លៃ​ចាប់​ផ្ដើម​ពី​ ៩៩៩ ដុល្លារ។

មាន​ ៨ ភាគរយ​ក៏​បាន​និយាយ​ថា​អេក្រង់​ iPhone X មិន​ទាន់​ធំ​គ្រប់​គ្រាន់​ ហើយ​ ១៧% ទៀត​មាន​មូលហេតុ​ផ្សេង​ពី​នេះ។

គេ​ជឿ​ថា​ iPhone ចេញ​ឆ្នាំ​ ២០១៨ នឹង​ដោះ​ស្រាយ​បញ្ហា​ទាំង​នេះ​បាន​ ដោយ​ចចាមអារ៉ាម​កន្លង​មក​ផ្សាយ​ថា​ Apple នឹង​ប្រកាស​ចេញ​ iPhone ស៊េរី​ថ្មី​ចំនួន​ ៣​ម៉ូដែល។ ទី​មួយ​គឺ​ជា​ការ​អាប់ដេត​ចេញ​ពី​ iPhone X អេក្រង់​ OLED​ ទំហំ​ ៥,៨ អ៊ីញ ទីពីរ​ iPhone ដែល​មាន​អេក្រង់​ OLED ទំហំ​ ៦,៥ អ៊ីញ និង​ទីបី​ iPhone ប្រើ​អេក្រង់​ LCD ទំហំ​ ៦,១ អ៊ីញ​ដែល​មាន​តម្លៃ​ធូរ​ថ្លៃ៕

​​​​


ប្រភព៖ macrumors   ប្រែ​សម្រួល៖ សុខហេង