ថ្ងៃនេះខែក្រោយ Man Utdអាចក្លាយជាភ្ញៀវទីមួយដែលមើល Man City លើកពាន
- 2018-03-07 12:23:08
- ចំនួនមតិ 0 | ចំនួនចែករំលែក 0
ថ្ងៃនេះខែក្រោយ Man Utdអាចក្លាយជាភ្ញៀវទីមួយដែលមើល Man City លើកពាន
ចន្លោះមិនឃើញ
ក្លឹប Manchester City អាចនឹងលើកពាន Premier League រដូវកាលនេះ នៅក្រោយជំនួប Manchester ថ្ងៃទី ៧ មេសាខាងមុខ ។
ការឈ្នះ ១-០ ទៅលើ Chelsea កាលពីថ្ងៃអាទិត្យកន្លងទៅ ខណៈក្លឹបបិសាចក្រហម បានយកឈ្នះ Crystal Palace កាលពីម្សិលមិញនេះ បានធ្វើឲ្យគម្លាតរវាងក្លឹបទាំងពីរបន្តស្ថិតនៅ ១៦ ពិន្ទុ ក្រោយលេងក្នុងលីគបានចំនួន ២៩ប្រកួត។ ដោយនៅក្នុងលីគកំពូលអង់គ្លេស មួយរដូវកាល លេង ចំនួន ៣៨ប្រកួត នេះមានន័យថា បើសិនជាគម្លាតបែបនេះនៅបន្តរយៈពេល ៤ប្រកួតទៅមុខទៀត ក្លឹប Manchester City នឹងលើកពាន Premier League រដូវកាលនេះ។
អ្វីដែលគួរឲ្យចាប់អារម្មណ៍នោះ គឺថា ប្រកួតទី ៤នោះ គឺចំថ្ងៃទី ៧មេសា ពេលក្លឹបយក្សមេឃខៀវ នឹងត្រូវប៉ះជាមួយក្លឹប Manchester United ដែលជាក្លឹបគូប្រជែងរួមក្រុង និងជាក្លឹបកំពុងឈរលេខ ២នាពេលបច្ចុប្បន្នតែម្ដង។ ដូច្នេះ បើគិតតាមចំនួនពិន្ទុ Manchester City នឹងលើកពាន ក្នុងករណីក្លឹបអាចយកឈ្នះក្លឹប Manchester United ក្នុងជំនួបខាងមុខ (ភ្ជាប់ជាមួយលក្ខខណ្ឌបើសិនគម្លាត ១៦ ពិន្ទុនៅតែបន្ត រហូតដល់ជំនួបនេះ)។
ទោះជាយ៉ាងណា ដោយបាល់មានសភាពមូល ដូច្នេះមានតែចាំតាមដានទម្រង់លេងរបស់ក្លឹបទាំងពីរនៅ ៤ប្រកួត Premier League ទៅមុខទៀត។
ក្លឹប Manchester City នឹងត្រូវប៉ះជាមួយក្លឹប Stoke City, Brighton& Hove Albion, Everton និង Manchester United។
ក្លឹប Manchester United វិញនឹងត្រូវប៉ះជាមួយក្លឹប Liverpool, Brighton& Hove Albion, West Ham និង Swansea មុននឹងប៉ះជាមួយ Manchester City ។
តើក្លឹបយក្សមេឃខៀវ អាចនឹងលើកពានក្រោយលេងជំនួប Manchester ថ្ងៃទី ៧ មេសាខាងមុខឬទេ? មានតែចាំមើលទាំងអស់គ្នា៕