ទីបំផុត ប្រធានាធិបតីចិន នឹងអាចកាន់អំណាចអស់មួយជីវិត

2018-03-12 01:33:35
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅថ្ងៃទី១១ ខែមីនា ឆ្នាំ២០១៨នេះ សភាប្រជាជនចិន បានបោះឆ្នោតធ្វើវិសោធនកម្មរដ្ឋធម្មនុញ្ញ ដោយប្រធានាធិបតីអាចកាន់តំណែងអស់១ជីវិត ប្រសិនបើត្រូវបានជ្រើសតាំងក្នុងការបោះឆ្នោតជារៀងរាល់ ៥ឆ្នាំម្តងនោះ។ នៅក្នុងច្បាប់បច្ចុប្បន្ន គឺប្រធានាធិបតីចិន អាចកាន់តំណែងជាប់ៗគ្នា បានត្រឹមតែ ២អាណត្តិតែប៉ុណ្ណោះ។

សម័យប្រជុំសភានេះ ធ្វើឡើងនៅវិមាន Great Hall ក្នុងក្រុងប៉េកាំង ដោយមានសមាជិកសភាសរុបចំនួន ២៩៦៤រូប បានចូលរួម។ ក្នុងនោះគឺមានតែ ២រូបប៉ុណ្ណោះ ដែលបោះឆ្នោតប្រឆាំងចំពោះការធ្វើវិសោធនកម្មនេះ និង៣រូបបានបោះឆ្នោតអនុបវាទ។ ការកែប្រែច្បាប់នេះ គឺតម្រូវឲ្យមានការបោះឆ្នោតគាំទ្រដោយសំឡេង ២ភាគ៣។

ការបោះឆ្នោតនេះធ្វើឡើងបន្ទាប់ពីគណៈកម្មាធិការមជ្ឈិមនៃបក្សកុម្មុយនីស្ដចិន បានប្រកាសពីគម្រោងលុបកថាខណ្ឌដែលចែងថា "ប្រធានាធិបតី និងអនុប្រធានាធិបតី នៃសាធារណរដ្ឋប្រជាមានិតចិន អាចកាន់អំណាចមិនលើសពី ២អាណត្តិ" ចេញពីរដ្ឋធម្មនុញ្ញរបស់ចិន កាលពីថ្ងៃទី២៥ ខែកុម្ភៈ ឆ្នាំ២០១៨។

ការកែប្រែច្បាប់នេះ ត្រូវបានសារព័ត៌មានអន្តរជាតិធំៗ អះអាងថាជាការបើកផ្លូវឲ្យប្រធានាធិបតីចិន លោក ស៊ី ជីនភីង អាចកាន់តំណែងអស់១ជីវិត។ លោក ស៊ី ជិនភីង បានចូលកាន់តំណែងប្រធានាធិបតីជាលើកដំបូង កាលពីខែមីនា ឆ្នាំ២០១៣។ បន្ទាប់មកលោកត្រូវបានជ្រើសរើសឲ្យកាន់តំណែងនេះជាបន្តទៀតក្នុងអាណត្តិទី២របស់លោក ចាប់ពីឆ្នាំ២០១៨ រហូតដល់ឆ្នាំ២០២៣៕