Asus និយាយថា Apple ចម្លងពី Essential Phone មិនបានល្អដូចខ្លួន

2018-03-12 04:00:19
ចំនួនមតិ 0 | ចំនួនចែករំលែក 0

ចន្លោះមិនឃើញ

មានមតិភាគច្រើនយល់ថា ZenFone 5 និង 5Z ស្មាតហ្វូនថ្មីរបស់ Asus បានចម្លងរូបរាងខាងមុខតាម iPhone X។ យ៉ាងណាក្ដី Asus មិនយល់ឃើញដូចនេះឡើយ។

មុននឹងការបង្ហាញចេញ ZenFone ស៊េរីថ្មីមួយថ្ងៃនៅកម្មវិធី MWC លោក Marcel Campos នាយកទីផ្សារសកលរបស់ Asus បានលើកឡើងថា ៖

"ប្រសិនបើនិយាយពីរឿងនេះ អ៊ីចឹងសំនួរដែលត្រឹមត្រូវគឺគួរសួរថា «អ្នក (Asus) ចម្លងរចនាបថ Essential Phone មែនទេ?» ព្រោះប្រសិនបើនិយាយអំពីអេក្រង់ឆក Essential Phone ជាអ្នកចាប់ផ្ដើមមុន ហើយ Apple អ្នកចម្លងពួកគេ។ ប៉ុន្តែ Apple ចម្លងពីគេមិនបានល្អនោះទេ យើងធ្វើបានល្អជាង។ យើងបានបំពាក់ Sensor, រន្ធបញ្ចេញសំឡេងបែប Stero ដែលឮជាងមុន ៤០% និងកាមេរ៉ា ហើយមានស្នាមឆកតូចជាង iPhone X ទៅទៀត"។

Essential Phone និង iPhone X

អ្នកតំណាង Asus រូបនេះបានបន្ថែមទៀតថា ៖

“ក្រុមហ៊ុននីមួយៗមានការសម្រេចចិត្តខុសៗគ្នា ហើយខ្ញុំគ្មានបញ្ហានឹងនាំយកអ្វីដែលអ្នកប្រើប្រាស់ចង់បាននោះទេ។ តាមពិតទៅ នេះជាអ្វីដែលក្រុមហ៊ុនមួយចំនួនគួរធ្វើ «ផ្ដល់ជូននូវអ្វីដែលអ្នកប្រើប្រាស់ចង់បាន»។ ខ្ញុំនិយាយពីក្រុមហ៊ុនពីរ។ មួយនិយាយថាពួកគេនឹងមិនបោះបង់ក្ដារចុច និងមួយទៀតនិយាយថានឹងមិនខ្ចីប្រើប្រព័ន្ធប្រតិបត្តិការ Android លើទូរសព្ទរបស់គេ។ មើលទៅចុងក្រោយពួកគេយ៉ាងម៉េច? ប្រសិនបើយើងមិនធ្វើតាមការចង់បានរបស់អ្នកប្រើប្រាស់ លទ្ធផលនឹងដូចក្រុមហ៊ុនពីរនេះអ៊ីចឹង"។