ដឹងពាក្យទាំងនេះខ្លះក៏បាន កុំឲ្យពេលទៅលេងកំពតឮហើយធ្វើមុខបែបឆ្ងល់

2018-03-18 00:57:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រជាពលរដ្ឋខេត្តកំពតក៏ដូចជាប្រពលរដ្ឋនៅខេត្តផ្សេងទៀតតែងមានប្រើគ្រាមភាសារបស់ខ្លួនក្នុងការប្រាស្រ័យទាក់ទងគ្នាប្រចាំថ្ងៃ ដែលពាក្យពេចន៍មួយចំនួនធ្វើឲ្យអ្នកចំណូលពីខាងក្រៅពិបាកយល់។

បើតាមវចនានុក្រមសម្តេចព្រះសង្ឃរាជ ជួន ណាត ពាក្យថា «គ្រាម» មានន័យថា ប្រជុំភូមិ ស្រុក ឬពួក។ គ្រាមភាសា ជាភាសាអ្នកស្រុក គឺសំដីដែលអ្នកស្រុកភូមិនីមួយៗនិយាយតាមទម្លាប់ ល្អៀងពីអក្សរ ឬ ពីពាក្យដើម។ នេះបើតាមការពន្យល់ក្នុងវនានុក្រមដដែល។

សម្រាប់លោក ជឿន បូរ៉ា ជាអ្នកខេត្តកំពត និងជានិស្សិតទើបបញ្ចប់ថ្នាក់បរិញ្ញបត្រខាងអក្សរសាស្រ្តខ្មែរផងនោះលើកឡើងថាលោកធ្លាប់និយាយភាសាអ្នកខេត្តរបស់លោកជាមួយមិត្តភក្តិកាលនៅរៀនមហាវិទ្យាល័យ ហើយថាមិត្តភក្តិទាំងនោះបានសើចលោកទៀតផង។

លោកថាមិត្តភក្តិសើច ក៏ដោយសារសំនៀងខុសប្លែក ឬជាពាក្យប្លែកពីអ្នកនៅភ្នំពេញ ឬខេត្តផ្សេងមួយចំនួនទៀត។ ទោះយ៉ាងណាលោកចាត់ទុកថាពាក្យពេចន៍គ្រាមភាសានេះក៏បានបញ្ជាក់ពីអត្តសញ្ញាណរបស់អ្នកខេត្តលោកផងដែរ។

លោកពន្យល់ពាក្យខ្លះៗថា «ចៃណា» អ្នកខេត្តកំពតសំដៅដល់ ពាក្យថា «ប៊ិះ ឬវិះ» ចំណែកពាក្យថា «កុន» សំដៅលើពាក្យថា «ប្រញ៉ាប់»។ លោកបន្តថា ដូចជាពាក្យថា«ម៉ូតូអូម» គឺសំដៅលើ «ម៉ូតូឌុប» ពាក្យថា «ខែអូង» សំដៅលើ «លោកខែ ឬព្រះចន្ទ» ចំណែកពាក្យថា «មិត» លោកថាសំដៅលើពាក្យ ថា«រត់» និងពាក្យថា «គឺមិនគឺ» គឺសំដៅលើពាក្យថា «ពិតឬមិនពិត»។

ក្រៅពីពាក្យទាំងនេះ អ្នកខេត្តកំពតរូបនេះថានៅមានពាក្យមួយចំនួនទៀត ដែលលោកមិនអាចរៀបរាប់បានអស់៕

អត្ថបទដោយ៖ គីម សាយ