ក្រសួងវប្បធម៌ខ្មែរ ប្រតិកម្មយ៉ាងណា ក្រោយឡាវស្នើដាក់ក្បាច់រាំវង់ក្នុងបញ្ជីសម្បត្តិបេតិកភណ្ឌពិភពលោក?
- 2018-03-13 10:50:04
- ចំនួនមតិ 0 | ចំនួនចែករំលែក 0
ក្រសួងវប្បធម៌ខ្មែរ ប្រតិកម្មយ៉ាងណា ក្រោយឡាវស្នើដាក់ក្បាច់រាំវង់ក្នុងបញ្ជីសម្បត្តិបេតិកភណ្ឌពិភពលោក?
ចន្លោះមិនឃើញ
សារព័ត៌មាន The Laotian times ចុះផ្សាយថ្ងៃទី ១២ មីនាឆ្នាំ២០១៨ ថា ឡាវបានសម្រេចស្នើដាក់បញ្ចូល ក្បាច់រាំវង់ ដែលជាភាសាឡាវ ថា ឡាំវង់ (Lam vong ) ទៅក្នុងបញ្ជីសម្បត្តិបេតិកភណ្ឌពិភពលោក។ បញ្ហានេះការបង្កការភ្ញាក់ផ្អើលពេញបណ្តាញសង្គមហ្វេសប៊ុក ព្រោះរាំវង់ជាចង្វាក់ប្រជាប្រិយដ៏ពេញនិយមរបស់ខ្មែរ។
ឆ្លើយតបទៅនឹងរឿងដ៏ក្តៅគគុកនេះឯកឧត្ដម ថៃ នរៈសត្យា រដ្ឋលេខាធិការ និងអ្នកនាំពាក្យក្រសួងវប្បធម៌ និងវិចិត្រសិល្បៈថា ក្រសួងមិនដឹងជាត្រូវប្រតិកម្មចំពោះឡាវ ដែលស្នើដាក់បញ្ចូលចង្វាក់រាំវង់ ចូលជាក្នុងបញ្ជីសម្បត្តិបេតិកភណ្ឌពិភពលោកយ៉ាងម៉េចនោះទេ ព្រោះនេះជាសម្បត្តិវប្បធម៌ដែលជាតិសាសន៍ដទៃមានលក្ខណៈស្រដៀងខ្មែរ។
ឯកឧត្ដមថា វប្បធម៌នៅក្នុងប្រទេសជិតខាង តែងតែមានលក្ខណៈស្រដៀងគ្នា ប៉ុន្តែវាមានអត្តសញ្ញាណនៃជាតិសាសន៍មួយ យើងមិនអាចទៅប្រតិកម្មអ្វីជាមួយគេនោះទេ។ «បើគេគ្រាន់តែដាក់សម្បត្តិវប្បធម៌មួយដែលស្រដៀងគ្នាទៅនឹងវប្បធម៌យើង គឺយើងមិនដឹងត្រូវទៅប្រតិកម្មអ្វីនឹងការដាក់បញ្ចូលរបស់គេទេអាហ្នឹង ពិតមែនតែមានភាពស្រដៀងគ្នា យើងទៅហួងហែងក្នុងការស្នើសុំដាក់បញ្ចូលបេតិកភណ្ឌពិភពលោកនោះ វាក៏អត់ត្រឹមត្រូវដែរ»។
ជុំវិញ ប្រវត្តិក្បាច់រាំ លោក ព្រឿង ឈាង ទីប្រឹក្សាក្រសួងវប្បធម៌ និងវិចិត្រសិល្បៈ ថា តាមការស្រាវជ្រាវ របស់លោក និងយោងតាមឯកសាររបស់លោកពេជ្យ ទុំក្រវិល ក្បាច់រាំវង់មានដើមកំណើត ក្នុងពិធីសាសនារបស់ជនជាតិខ្មែរដើម គេហៅថារាំវង់ភូមិ ដែលមានអាយុកាលជាយូរលង់មកហើយ។
«ខ្មែរដើមយើងគេមានពិធីរាំដុំកង់ ដែលគេរាំជុំវិញភ្នក់ភ្លើង ក្រោយមកខ្មែរយើងក៏ចេះតែទម្លាប់រាល់ពេលរាំកម្សាន្ត តែងតែដាក់ផ្កាពណ៌ក្រហមដាក់នៅលើកតុកណ្ដាលវង់រហូតមកដល់បច្ចុប្បន្ន ចំពោះក្បាច់រាំវិញវាច្បាស់ណាស់ពិតជាមានការប្រែប្រួល» លោក ព្រឿង ឈាង ថ្លែង។
ចង្វាក់រាំវង់នេះមិនមែនមានតែប្រទេសឡាវ មួយទេ ពោលគឺកម្ពុជាក៏មានចង្វាក់មួយនេះដែលខ្មែរចាក់ទុកជាចង្វាក់ប្រជាប្រិយមួយ និយមរាំកម្សាន្ត រាល់ពេលមានកម្មវិធីជួបជុំទាំងក្រុង និងជនបទ៕