គម្លាតពិន្ទុរវាងក្លឹបលេខ ១ និងក្លឹបបាតតារាង មានសភាពឆ្ងាយកប់នៅអង់គ្លេស និងអ៊ីតាលី
- 2018-03-13 12:31:02
- ចំនួនមតិ 0 | ចំនួនចែករំលែក 0
គម្លាតពិន្ទុរវាងក្លឹបលេខ ១ និងក្លឹបបាតតារាង មានសភាពឆ្ងាយកប់នៅអង់គ្លេស និងអ៊ីតាលី
ចន្លោះមិនឃើញ
គិតមកទល់ពេលនេះ ក្នុងបណ្ដាលីគធំៗនៅអឺរ៉ុប Premier League របស់អង់គ្លេស និង Serie A របស់អ៊ីតាលី មានគម្លាតខ្លាំងជាងគេរវាងក្លឹបលេខ ១ និងក្លឹបបាតតារាង។
នៅលីគកំពូលអង់គ្លេស ក្លឹបកំពូលតារាង Manchester City មានពិន្ទុដល់ទៅ ៨១ ខណៈក្លឹបលេខ ២០ West Bromwich Albion មានត្រឹមតែ ២០ពិន្ទុប៉ុណ្ណោះ។ នេះមានន័យថា គម្លាតពីកំពូលតារាងទៅបាត មានរហូតដល់ទៅ ៦១ ពិន្ទុ ក្រោយលេងបាន ៣០ប្រកួតលីគ។
ដូចនៅអង់គ្លេសដែរ គម្លាតរវាងក្លឹបលេខ ១ និងលេខ ២០ នៅលីគកំពូលអ៊ីតាលីគឺ ៦១ ពិន្ទុ។ ក្លឹបលេខ ១ Juventus មានពិន្ទុចំនួន ៧១ ចំណែកឯក្លឹបដែលកំពុងស្ថិតនៅបាតតារាងលីគវិញគឺ Benevento មានត្រឹម ១០ ពិន្ទុ។
ដោយឡែក លីគកំពូលអេស្ប៉ាញស្ថិតនៅលេខរៀងបន្ទាប់។ គម្លាតរវាងក្លឹបលេខ ១ និង ក្លឹបលេខ ២០ គឺ ៥៩ ពិន្ទុ ពោលគឺ ២ពិន្ទុប៉ុណ្ណោះ តិចជាងលីគធំៗទាំងពីរដែលបានរៀបរាប់ខាងលើ។ ក្លឹបអ្នកមានបុណ្យ Barcelona ឈរកំពូលតារាង La Liga ជាមួយនឹងពិន្ទុដល់ទៅ ៧២។ ឯ Malaga ដែលកំពុងឈរនៅបាតតារាងវិញ មានត្រឹម ១៣ពិន្ទុ។
ងាកមកមើល Ligue 1 របស់បារាំងវិញ គម្លាតរវាង ក្លឹបលេខ ១ PSG (៧៧ពិន្ទុ) និង ក្លឹបលេខ ២០ Metz (២០ពិន្ទុ) គឺ ៥៧ ពិន្ទុ។
ចំណែកឯ Bundesliga របស់អាល្លឺម៉ង់វិញ គម្លាតពិន្ទុហាក់មានតិចជាងគេ បើធៀបនឹងលីគកំពូលទាំង ៤ខាងលើ។ ក្លឹបលេខ ១ Bayern Munich (៦៦ ពិន្ទុ) បានឃ្លាតពីក្លឹបបាតតារាង FC Koln (១៧ ពិន្ទុ) ចំនួន ៤៩ ពិន្ទុ។ ទោះជាយ៉ាងណា ខុសពីបណ្ដាលីគខាងលើដែលមាន ២០ ក្រុម លីគកំពូលអាល្លឺម៉ង់មានតែ ១៨ក្រុមប៉ុណ្ណោះ ដែលនេះអាចជាកត្តាមួយដែលធ្វើឲ្យលីគមួយនេះ មានពិន្ទុឃ្លាតតិចជាងលីគធំៗដទៃ៕