ល្បិចបោកប្រាស់តាមអនឡាញ នៅកើតមានទៀតទេរហូតមកដល់ពេលនេះ?
- 2018-03-15 02:12:05
- ចំនួនមតិ 0 | ចំនួនចែករំលែក 0
ល្បិចបោកប្រាស់តាមអនឡាញ នៅកើតមានទៀតទេរហូតមកដល់ពេលនេះ?
ចន្លោះមិនឃើញ
ល្បិចអូសទាញឲ្យធ្វើការងារក្រៅម៉ោងតាមប្រព័ន្ធអនឡាញ ដែលល្បីល្បាញកាលពី៣ឆ្នាំឬ៤ឆ្នាំមុនត្រូវបានយុវជនមួយចំនួនកត់សំគាល់ឃើញថាថមថយមិនជាងមុន។ ថមថយដោយសារអ្នកប្រើប្រាស់ប្រព័ន្ធអ៊ីនធឺណេតកាន់តែច្រើន បានដឹងពីល្បិចឆបោករបស់ក្រុមទាំងនោះ។
យុវជន ថន សម្បត្តិ និស្សិតសាកលវិទ្យាល័យជាតិគ្រប់គ្រងឱ្យដឹងថា ជាច្រើនដងខ្លួនតែងបានទទួលសារតាមរយៈបណ្តាញសង្គម Facebook ឲ្យធ្វើការងារក្រៅម៉ោង ដោយទទួលបានប្រាក់ចំណូលច្រើន និងមិនចាំបាច់មានបទពិសោធន៍ការងារ និងសញ្ញាបត្រអ្វីទាំងអស់។ ប៉ុន្តែលោកថាអ្វីទាំងនេះលែងជាការចាប់អារម្មណ៍សម្រាប់លោក និងយុវជនផ្សេងទៀតហើយ ព្រោះជាល្បិចដដែលៗ។ លោកបន្តថា៖«ពេលខ្លះសារបែបនេះគឺជាទម្រង់តែមួយ ដែលបានផ្ញើទៅមនុស្សច្រើនគ្នា មិនត្រឹមមិនជឿទេ ពេលខ្លះខ្ញុំមានអារម្មណ៍ថារំខានទៅវិញ»។
ចំណែកកញ្ញា ឡុង សម្ផស្ស និស្សិតសាកលវិទ្យាល័យភូមិន្ទភ្នំពេញឱ្យដឹងដែរថា ការប្រើប្រាស់សារបែបនេះលែងជាចំណាប់អារម្មណ៍ប្រាកដមែន ប៉ុន្តែរឿងមួយដែលយុវជននៅតែអាចធ្លោយបានគឺល្បិចឆបោកតាមរូបភាពផ្ញើលុយដ៏ច្រើនសន្ធឹកពីក្រៅប្រទេស ពីមនុស្សស្គាល់គ្នានៅលើបណ្តាញសង្គម Facebook ដែលនេះគឺជាល្បិចបោកប្រភេទថ្មីមួយ ។
កញ្ញថា មិត្តភក្កិរបស់កញ្ញាម្នាក់បានចាញ់បោកប្រាក់អស់ជាង ៥០០ដុល្លារ ដោយសារល្បិចបោកពីអ្នកប្រើប្រាស់បណ្តាញសង្គមម្នាក់ ដែលអះអាងថា ជាអនិកជនខ្មែរពីក្រៅប្រទេសអត់មានសាច់ញាតិ និងបងប្អូន ដោយសារស្លាប់ ក្នុងសម័យប៉ុលពត។ គាត់ជាមនុស្សចូលចិត្តធ្វើបុណ្យ និងការងារសង្គម។
កញ្ញាបន្តថា៖ «ពេលមួយម្នាក់នោះបានសុំអាសយដ្ឋានមិត្តភក្កិខ្ញុំដូចជា ឈ្មោះពេញ លេខទូរសព្ទ លេខផ្ទះ និងលេខផ្លូវ ដើម្បីងាយស្រួលផ្ញើរបស់មក អាសយដ្ឋានទាំងអស់នេះ ត្រូវបានជនបោកប្រាក់ម្នាក់នោះ ព្រីនយកទៅបិតនៅលើកេសឥវ៉ាន់មួយ ដែលមើលទៅឃើញលុយដ៏ច្រើន។ ប៉ុន្តែដើម្បីអាចទទួលលុយ ម្នាក់នោះតម្រូវឱ្យចេញសេវាដឹកជញ្ជូនមានទឹកប្រាក់ជាង ៥០០ដុល្លារ»។
ទាក់ទងនឹងបញ្ហានេះអ្នកស្រី អាវ វឌ្ឍនា ប្រធានការិយាល័យប្រឆាំងបទល្មើសបច្ចេកវិទ្យាបានឱ្យដឹងថា ផ្នែកពាក់ព័ន្ធកំពុងត្រៀមរៀបចំឯកសារជាវីដេអូ និងសំឡេង ដើម្បីធ្វើការផ្សព្វផ្សាយបន្តតាមវិទ្យុ ទូរទស្សន៍ និងតាមបណ្តាញសង្គមជាការពញ្ញាក់ស្មារតីដល់អ្នកប្រើប្រាស់បណ្តាញសង្គមឬប្រព័ន្ធអនឡាញឱ្យមានការប្រុងប្រយ័ត្ន។
អ្នកស្រីថា កន្លងមកការិយាល័យប្រឆាំងបទល្មើសបច្ចេកវិទ្យាធ្លាប់ទទួលបានពាក់បណ្តឹងស្រដៀងគ្នានឹងករណីខាងលើដែរ។ អ្នកស្រីបន្តថា៖ «ជនបោកប្រាស់ច្រើនបន្លំខ្លួនជាអនិកជននៅអាមេរិក ឬអង់គ្លេស និងបានសាសងសុំស្រលាញ់ បន្ទាប់មកតម្រូវឱ្យផ្ញើឈ្មោះលេខទូរសព្ទ និងអាសយដ្ឋានថានឹងផ្ញើរបស់ឱ្យ បន្ទាប់មកដល់ព្រលានយន្តហោះភូតថា គយតម្រូវឱ្យបង់ពន្ធឥវ៉ាន់ប៉ុណ្ណេះប៉ុណ្ណោះ ឬឥវ៉ាន់ត្រូវផ្ញើមកតាមព្រលានយន្តហោះអន្តរជាតិភ្នំពេញបែរជាផ្ញើទៅព្រលាននៅសៀមរាប ហើយជួបនឹងឧបសគ្គផ្សេងៗតម្រូវឱ្យផ្ញើលុយទើបបានរបស់នោះមក»។
អ្នកស្រីបន្ថែមទៀតថា អ្នកប្រើប្រាស់បណ្តាញសង្គម Facebook គួរប្រុងប្រយ័ត្ន និង មើល Profile ក្នុង Facebook ឱ្យបានច្បាស់លាស់ និងរកជំនួយដើម្បីប្រឹក្សាយោបល់មុនសម្រេចចិត្តជឿ ឬអាចទាក់ទងមក នាយកដ្ឋានប្រឆាំងបទល្មើសបច្ចេកវិទ្យា ពេលជួបប្រទះបញ្ហាដូចជា ការបោកប្រាស់តាមប្រព័ន្ធបណ្ដាញសង្គម ការលួច(hack) ឬយក Facebook Account ផ្សេងៗ ដោយអាចមកដាក់ពាក្យបណ្ដឹងនៅ នាយកដ្ឋានប្រឆាំងបទល្មើសបច្ចេកវិទ្យារៀងរាល់ម៉ោងធ្វើការ នៅក្រសួងមហាផ្ទៃ។ អ្នកស្រីថាប្រជាពលរដ្ឋក៏អាចទាក់ទងទៅកាន់លេខ 023 726 822 ឬករណីទាន់ហេតុការណ៍អាចទាក់ទងលេខរបស់អគ្គស្នងការនគរបាលជាតិគឺ ១១៧ ឬ១១៨ បានផងដែរ៕