ចេន សាយចៃ បង្ហើបមហិច្ឆតា ក្រោយទទួលបានសញ្ញាប័ត្រអនុបណ្ឌិត

2018-03-16 06:25:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃនេះ តារាចម្រៀងខ្មែរសុរិន្ទ អ្នកនាង ចេន សាយចៃ ទទួលសញ្ញាប័ត្រ ថ្នាក់អនុបណ្ឌិតលើជំនាញសិល្បៈ ក្នុងការស្រាវជ្រាវ អភិវឌ្ឍ សហគមន៍ កម្មវិធីសិល្បៈទស្សនីយភាពបុរាណ ពីសាកលវិទ្យាល័យ Surindra Rajabhat ក្នុងខេត្តសុរិន្ទ។ បន្ទាប់ពីទទួលសញ្ញាប័ត្រនេះ អ្នកនាងបានបង្ហើបក្ដីបំណងលើជំនាញដែលខ្លួនរៀននេះ ថា ខ្លួនចង់ក្លាយទៅជាសាស្ត្រាចារ្យសិល្បៈ ដើម្បីបណ្ដុះបណ្ដាលលើជំនាញ សិល្បៈដែលខ្លួនមានទៅក្មេងជំនាន់ក្រោយខ្លាំងណាស់ នៅថ្ងៃអនាគត។

អ្នកនាង ចេន សាយចៃ បានចំណាយពេល៥ឆ្នាំ ដើម្បីសិក្សាលើជំនាញខាងលើ បន្ទាប់តារាចម្រៀងស្រីល្បីឈ្មោះរូបនេះ បានបញ្ចប់ថ្នាក់បរិញ្ញាបត្រជំនាញផ្នែកកសិកម្ម នៅសាកលវិទ្យាល័យ Surindra Rajabhat ដដែលនោះ។ តារាចម្រៀងវ័យ៤២ឆ្នាំរូបនេះបានឲ្យដឹងថា ការសិក្សារបស់ខ្លួនបានធ្វើឡើងជា២ភាសា គឺភាសាថៃ និង ភាសាអង់គ្លេស ក្នុងនោះការសិក្សានៅថ្នាក់បរិញ្ញាបត្រ នាងក៏បានប្រើពេល៥ឆ្នាំដូចថ្នាក់អនុបណ្ឌិតផងដែរ។

នៅថ្នាក់អនុបណ្ឌិតនេះ អ្នកនាង ចេន សាយចៃ បានជ្រើសរើសថ្ងៃចុងសប្ដាហ៍ ក្នុងនោះអ្នកនាងបានរៀបរាប់ឲ្យដឹងថា ខ្លួនត្រូវសិក្សានៅសាកលវិទ្យាល័យ២ឆ្នាំ និង ការចុះស្រាវជ្រាវ សរសេរនិក្ខេបបទ៣ឆ្នាំ ។ អ្នកនាងទើបតែការពារសារណាបញ្ចប់ ប្រហែល៥ខែមុននេះ ហើយថ្ងៃនេះអ្នកនាងទទួលសញ្ញាប័ត្រ។

តាមការបញ្ជាក់ពី ចេន សាយចៃ តារាចម្រៀងរូបនេះ មិនទាន់មានបំណងបន្តយកថ្នាក់បណ្ឌិតទៀតនោះទេ ដោយរង់ចាំមើលសិន ។

ព្យាយាមសិក្សារហូតដល់ទទួលបានសញ្ញាប័ត្រកាន់ក្នុងដៃរហូតដល់ទៅ២នេះ អ្នកនាង ចេន សាយចៃ បញ្ជាក់ថា ខ្លួនមិនមានបំណងចង់ក្លាយជាមន្ត្រីរាជការឡើយ ព្រោះគ្មានពេលចូលបម្រើការងារពេញម៉ោង ដូចដឹងស្រាប់ ជាអ្នកសិល្បៈបែបនេះ គឺរវល់ខ្លាំង។

បំណងចម្បងនោះ គឺអ្នកនាង ចង់ចេះចង់ដឹងនូវជំនាញដែលខ្លួនស្រលាញ់ និងកំពុងតែដើរលើអាជីពមួយនេះ ជាច្រើនឆ្នាំមក។ ដូចបានលើកឡើងខាងលើ ប្រសិនបើថ្ងៃអនាគត អ្នកនាងមានពេលហើយ សាកលវិទ្យាល័យចង់ឲ្យអ្នកនាងបង្រៀន អ្នកនាង ចេន សាយចៃ បញ្ជាក់ថា ខ្លួនស្វាគមន៍ក្នុងការចូលរួមបណ្ដុះបណ្ដាល ដើម្បីចែកចំណេះដឹងទៅដល់ក្មេងជំនាន់ក្រោយ៕

អត្ថបទៈ ស៊ុនហួត