រសជាតិអាហារខ្មែរធ្វើឲ្យ Chakrit ត្រដរហោះមកកម្ពុជាច្រើនលើក

2018-03-17 08:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារតែចាប់ចិត្តរស់ជាតិអាហារខ្មែរបានធ្វើឲ្យតារាសម្ដែងថៃលោក Chakrit មកប្រទេសកម្ពុជាម្ដងហើយម្ដងទៀតគ្រប់ពេលដែលរូបគេនឹកចង់ទទួលទានអាហារសមុទ្រ។

ជាក់ស្ដែងម្សិលមិញនេះ Chakrit បានហោះមកពីថៃក្នុងគោលបំណងមកចូលរួមសម្ពោធភាពយន្តខ្នាតធំរឿង "អនុស្សាវរីយ៍ថ្ងៃចូលឆ្នាំ" ឆ្លៀតក្នុងឱកាសហ្នឹងលោក ក៏បានទៅទទួលទានអាហារខ្មែរជាច្រើនមុខមុនពេលត្រឡប់ទៅកាន់ប្រទេសកំណើតខ្លួនវិញ។

ក្នុងទឹកមុខសប្បាយរីករាយ Chakrit បានរៀបរាប់ថា ខ្លួនពិតជាចូលចិត្តនូវរស់ជាតិអាហារខ្មែរខ្លាំងណាស់ជាពិសេសគឺគ្រឿងសមុទ្រ ដែលចម្អិនដោយស្នាដៃប្រជាពលរដ្ឋខ្មែរ។ ក្រៅពីអាហារគ្រឿងសមុទ្រតារាថៃរូបនេះក៏ចូលចិត្តម្ហូបខ្មែរមួយចំនួនទៀតដូចជា ទឹកគ្រឿង អាម៉ុក ខ្យងចំហុយជាដើម។ លោកថា៖" ជាលើកទី១សម្រាប់ខ្ញុំមកទីក្រុងភ្នំពេញ តែវាជាលើកទី៤ ដែលខ្ញុំមកកម្ពុជា កាលពីលើកមុនខ្ញុំបានទៅលេងខេត្ត ព្រះសីហនុ កំពត់ និងកោះកុង ក្នុងគោលបំណងមកកម្សាន្ត និងភ្លក់រស់ជាតិអាហារសមុទ្រខ្មែរដែលខ្ញុំចូលចិត្ត"។

ដោយឡែកតារាសម្ដែង ខាត់ វៃហាំង ដែលជាមិត្តភ័ក្ដិស្និទ្ធស្នាលជាមួយ Chakrit ក្រោយពីថតរឿង"អនុស្សាវរីយថ្ងៃចូលឆ្នាំ" បាននិយាយថា Chakrit ពិតជាចូលចិត្តអាហារខ្មែរពិតមែនអ្វីក៏តារាសម្ដែងថៃរូបនេះទទួលទានបានដែរ។

កំលោះសង្ហាមកពីខេត្តបន្ទាយមានជ័យបញ្ជាក់ថា៖"ជាក់ស្ដែងកាលពីយប់មិញខ្ញុំបានទិញ កណ្ដូប ចង្រិត កន្តេះឡង់ កន្ទាទូក ឲ្យគាត់ញាំ ក៏គាត់អាចញាំបានដែរមិនបានរើសអើង ឬ ខ្ពើមទេផ្ទុយទៅវិញគាត់និយាយថាគាត់ចូលចិត្ត"៕

អត្ថបទ៖ ឆុង ស៊ីណាន