មិនដឹងក៏ត្រូវដឹងដែរ បើមិនចង់ឲ្យដំណើរកម្សាន្តអ្នកទៅជារឿងខកចិត្ត

2018-03-20 23:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រៅពីរក្សាសុវត្ថិភាពឥវ៉ាន់ សំបុត្រយន្តហោះ និងឯកសារផ្សេងៗ អ្នកគួរប្រាកដថាបានភ្ជាប់ជាមួយកាមេរ៉ា ឬស្មាតហ្វូនត្រៀមក្នុងពេលដំណើរកម្សាន្ត។ ខណៈពេល ដំណើរកម្សាន្តដើម្បីបន្ធូរអារម្មណ៍ ផ្លាស់ប្ដូរបទពិសោធន៍ថ្មី ពិតណាស់ អ្នកក៏គួរថតទិដ្ឋភាពទុកជាអនុស្សាវរីយ៍ ឬបង្ហាញមិត្តភក្ដិ។

កំឡុងពេលដំណើរកម្សាន្ត អ្នកមិនមែនចេះតែអាចថតរូបទិដ្ឋភាពបានគ្រប់យ៉ាងនោះទេ។ ជាអ្នកទេសចរណ៍ម្នាក់ អ្នកគួរប្រាកដថា សកម្មភាពផ្សេងៗ ពេលថតរូប មិនធ្វើឲ្យអ្នកខូចអារម្មណ៍ សម្រាប់ពេលវេលាដ៏អស្ចារ្យអ្នក។

១. កុំមើលរំលងសញ្ញាបម្រាមនានា

កន្លែងមួយចំនួន ដូចជាសារមន្ទីរ អាចមានបម្រាមមិនឲ្យថតរូប ដូច្នេះអ្នកគួរពិនិត្យមើល ឬសាកសួរ អ្នកនៅតំបន់នោះ។ កុំខកចិត្ត បើអ្នកមិនអាចថតរូបទិដ្ឋភាពខាងក្នុង ព្រោះអ្នកមានសកម្មភាពច្រើន អាចលេងសប្បាយបាន។

២. សុវត្ថិភាព

អ្នកប្រហែលជាចង់ឲ្យរូបភាពអ្នក មានអ្នកចុច Like ច្រើនលើ បណ្ដាញសង្គមនានា ដូចជា Facebook។ តែគួរគិតពីសុវត្ថិភាពជារឿងចម្បង ដោយកុំលែងដល់ថ្នាក់ ឈរជើងមួយលើកំពូលអាគារ ឬថ្មលើភ្នំ គ្រាន់តែចង់កក្រើកបណ្ដាញសង្គមនោះទេ។ នេះជាទង្វើគ្មានន័យទាល់តែសោះ។

៣. កុំ Upload រូបភាពភ្លាមៗ

ក្រោយអ្នកថតរូបបានភ្លាម ការ Upload ទៅកាន់ Facebook និងឆ្លើយតបសំនួរមិត្តភក្ដិនានា អាចជាចំណុចល្អ ក្នុងការចែករំលែកមិត្តភក្ដិ។ តែអ្នកគួរប្រាកដថា មិនចំណាយពេលច្រើន ខាតបង់ពេលវេលាដ៏ល្អ កំឡុងពេលកម្សាន្តអារម្មណ៍។ការងារនេះ អ្នកអាចធ្វើពេលទំនេរ ដូចជានៅប្រលានយន្តហោះជាដើម។

៤. កុំស្នើដៃគូថតរូប ញយៗដងពេក

ការថតរូប Selfie មិនតែងតែផលិតរូបភាពដ៏ល្អនោះទេ ដូច្នេះអ្នកអាចស្នើដៃគូដំណើរកម្សាន្ត ថតជាប់ជាមួយទិដ្ឋភាពផ្ទៃខាងក្រោយដ៏ល្អ។ តែមិនមែនគ្រប់រូបភាពសុទ្ធតែឲ្យពួកគាត់ថតឲ្យនោះទេ ព្រោះស្នើគេឲ្យថត ច្រើនដងពេក អាចជាការរំខានអារម្មណ៍។

៥. កុំថតរូប ដោយគ្មានការអនុញ្ញាត

បើអ្នកមានគម្រោងថតទិដ្ឋភាពក្នុងតំបន់ ទាក់ទងនឹងប្រពៃណីទំនៀមទម្លាប់ សកម្មភាពរស់នៅប្រចាំថ្ងៃ អ្នកគួរស្នើសុំការអនុញ្ញាតជាមុន ដើម្បីកុំឲ្យមានការជជែកដេញដោលពេលក្រោយ។ ការជជែកគ្នាលេងជាមួយអ្នកនៅតំបន់ អាចឲ្យអ្នកដឹងបានច្រើន ពីគំនិតអ្នកនៅក្នុងតំបន់ និងទីកន្លែងនានា អាចផ្ដល់ជម្រើសទិដ្ឋភាពបានកាន់តែច្រើន៕