ទឹកចិត្តលោកគ្រូ! តស៊ូមកបង្រៀន ទោះបីមានសិស្សតែម្នាក់ ធ្វើឲ្យគ្រប់គ្នារំជួលចិត្ត

2018-03-20 02:15:55
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកគ្រូបង្រៀនម្នាក់ កំពុងធ្វើឲ្យមនុស្សរាប់លាននាក់រំជួលចិត្តជាខ្លាំង ក្រោយតស៊ូមកបង្រៀននៅសាលាដាច់ស្រយាលក្នុងប្រទេសចិន ដោយមិនសិស្សតែម្នាក់គត់។

លោក Xu Zefeng គឺជាគ្រូបង្រៀនចុងក្រោយគេបង្អស់ដែលនៅសល់ក្នុងសាលាបឋម Youcheng ហើយតស៊ូមកបង្រៀនសិស្សអាយុ ១១ឆ្នាំម្នាក់ឈ្មោះ Xu Jiaqi។ ដោយសារតែមានការអភិវឌ្ឍនៅទីប្រជុំជន និងសាលារៀនថ្មីៗត្រូវបានសាងសង់ឡើង ឪពុកម្ដាយក្នុងភូមិចាប់ផ្ដើមបញ្ជូនកូនទៅទីក្រុងដើម្បីទទួលបានការអប់រំល្អប្រសើរ។ ទោះបីជាពួកគេភាគច្រើនចាកចេញពីភូមិក៏ដោយ ក្មេងប្រុស Jiaqi មិនបានចាកចេញនោះទេ។

តាមពិតទៅ Jiaqi គឺជាក្មេងប្រុសម្នាក់ក្នុងចំណោមក្មេង ៩ លាននាក់ផ្សេងទៀតដែលត្រូវបានឪពុកម្ដាយបោះបង់ចោល។ ម្តាយរបស់គេបានបោះបង់តាំងពីគេនៅជាទារកមកម្ល៉េះ ហើយឪពុករបស់គេ បានទៅធ្វើការនៅទីក្រុង។ ក្មេងប្រុស Jiaqi ត្រូវបានចិញ្ចឹមដោយជីតា ដោយរកប្រាក់បានបន្ដិចបន្ដួចតាមការរើសអេតចាយប៉ុណ្ណោះ។

Jiaqi បានប្រាប់អ្នកកាសែតថា គេមិនចង់ចាកចេញពីជីតា និងលោកគ្រូ Xu នៅក្នុងភូមិនោះទេ ព្រោះគេព្រួយបារម្ភគ្មាននរណាម្នាក់ថែរក្សាពួកគាត់។ចាប់តាំងពីពេលនោះមក សាលាបឋមសិក្សា Youcheng បានក្លាយទៅជាសាលារៀនដ៏ឯកោដែលមានតែលោកគ្រូ Xu និងក្មេងប្រុស Jiaqi ប៉ុណ្ណោះ។

ទោះជាយ៉ាងណាក៏ដោយ លោកគ្រូវ័យ ៥៤ ឆ្នាំខាងលើនិយាយថា "ខ្ញុំជឿជាក់ថា វាជាទំនួលខុសត្រូវរបស់គ្រូបង្រៀន ដែលត្រូវតែមកបង្រៀនដាច់ខាតដរាបណានៅតែមានសិស្ស មិនថាសិស្សតែម្នាក់ក៏ដោយ៕"