អាចបាក់ស្រឹប បើឃើញរូបរាងខាងក្រៅរបស់ Vivo V9 ទើបចេញក្ដៅៗ (វីដេអូ)

2018-03-23 04:10:40
ចំនួនមតិ 0 | ចំនួនចែករំលែក 0

ចន្លោះមិនឃើញ

Vivo V9 បានប្រកាសចេញជាផ្លូវការហើយ ដោយមានរូបរាងដូចជារូបភាពលេចធ្លាយកន្លងមក ពោលមានអេក្រង់ដែលមានក្បាលឆកដូចជា iPhone X។

V9 មានបំពាក់អេក្រង់ LCD ទំហំ ៦,៣ អ៊ីញ អាចបង្ហាញរូបភាពក្នុងកម្រិត ២២៨០ x ១០៨០ ភីកសែល ដែលមានមាត្រដ្ឋាន 19:9។ មាត្រដ្ឋានរវាងអេក្រង់ និង ផ្ទៃខាងមុខគឺមានដល់ ៩០%។ នេះបើតាមការលើកឡើងរបស់ Vivo។

នៅផ្នែកខាងក្នុង V9 មានប្រើបន្ទះឈីប Snapdragon 626, RAM ទំហំ ៤ GB, ថ្មទំហំ ៣២៦០ mAh, អង្គផ្ទុកទិន្នន័យទំហំ ៦៤ GB មានរន្ធសម្រាប់ដោតមេមូរីកាត និង មានរន្ធដោតកាស 3.5 mm ផងដែរ។ ស្មាតហ្វូននេះដំណើរការដោយប្រព័ន្ធប្រតិបត្តិការ Android 8.1 Oreo។

ចំពោះកាមេរ៉ាវិញជាប្រព័ន្ធកាមេរ៉ាភ្លោះដោយមានកាមេរ៉ាមេកម្រិត ១៦ MP មាន Aperture f/2 ផ្សំគ្នានឹងកាមេរ៉ាទីពីរមានកម្រិត ៥ MP ជំនួយដល់ការថតរូបច្បាស់មុខ ព្រាលក្រោយ។ ចំណុចខ្លាំងរបស់ស្មាតហ្វូននេះនៅលើកាមេរ៉ា Selfie ដែលមានកម្រិត ២៤ MP មាន Aperture f/2។

កាមេរ៉ាខាងមុខមានប្រើនូវបច្ចេកវិទ្យា AI ដោយមានមុខងារមួយឈ្មោះ AI Face Beauty ដែលប្រើភាពវៃឆ្លាតរបស់ម៉ាស៊ីនដើម្បីដឹងពីអាយុ, ភេទ, សម្បុរ ដើម្បីអាចផលិតរូបភាព Selfie មួយបានស្អាតបំផុត។

មុខងារ AI ដទៃទៀតដែលមានលើ V9 មានដូចជា "AI Face Access” ដែលធ្វើឲ្យមុខងារស្កេនមុខដោះសោដំណើរការបានកាន់តែល្អ និង "AI Attention Sensing” ដែលអាចដឹងថាពេលណាអ្នកប្រើប្រាស់សម្លឹងមើលអេក្រង់។

V9 នឹងជាស្មាតហ្វូនកំពូលថ្មីរបស់ Vivo សម្រាប់លក់នៅប្រទេសឥណ្ឌា និង ទីផ្សារដទៃទៀត ដោយមានជម្រើសពណ៌ខ្មៅ និង ពណ៌មាស។ ចំពោះតម្លៃ Vivo មិនទាន់បង្ហាញចេញនៅឡើយទេ ប៉ុន្តែមានការប៉ាន់ស្មានថាតម្លៃអាចចន្លោះពី ៣០០ ទៅ ៣៥០ ដុល្លារ៕

ទស្សនាវីដេអូបង្ហាញពីរូបរាង V9 ខាងក្រោម ៖