ស្អាតណាស់! ខ្ទរខ្ទារ ស្រីស្អាតវ័យ១៨ឆ្នាំនេះ នឹងក្លាយជា សៀវឡុងនី ជំនាន់ថ្មី

2018-03-25 07:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តរឿង "យុទ្ធសិល្បិ៍ឥន្ទ្រីទេព" បានប្រកាសផលិតជាថ្មីម្ដងទៀត ក្រោយទទួលបានជោគជ័យយ៉ាងសម្បើមពីគ្រប់វគ្គមុនៗ ហើយជំនាន់ថ្មីនេះ ក្រុមផលិតក៏កំពុងដំណើរការប្រមាញ់រើសតួសម្ដែងជាលក្ខណៈអន្តរជាតិយ៉ាងសស្រាក់សស្រាំ។

ជាមួយគ្នានេះ ស្រីស្អាតស្បែកខ្ចីវ័យ១៨ឆ្នាំម្នាក់ ឈ្មោះ Eleanor Lee ត្រូវបានគេខ្សឹបខ្សៀវថា នាងទំនងអាចទទួលបានតំណែងជាបុត្រីនាគ សៀវឡុងនី។ នាងជាយុវតីជនជាតិសិង្ហបុរី ដែលកំពុងសិក្សាជំនាញសម្ដែងនៅសាលា Beijing Film Academy។ នារីជំទង់រូបនេះត្រូវបានគេស្គាល់ដែរថាជាកូនស្រីរបស់តារាសម្ដែងប្រុសលោក Yu Hongrong និងពិធីការិនី Quan Yifeng តែឪពុកម្ដាយរបស់គេបានចែកផ្លូវគ្នា ក្រោយមានជម្លោះផ្ទៃក្នុង។

ត្បិតមានវ័យក្មេងក្ដី Eleanor ត្រូវបានគេសម្គាល់ថាធ្លាប់លេចមុខក្នុងរឿងខ្នាតខ្លី និងរឿងភាគមួយចំនួនដែរ ហើយដោយសារសម្រស់ នៅវ័យដ៏ស្រស់បំព្រងនេះអំណោយផលផង ទើបនាងអាចមានឱកាសច្រើនក្ដោបតំណែងតួនេះ។ អ្វីដែលកត់សម្គាល់នោះ គឺភាពយន្តខ្នាតធំខាងលើទើបតែប្រកាសរើសតួសម្ដែងដែលមានវ័យចាប់ពី១៨ឆ្នាំឡើង ស្រាប់តែធ្លាយរូបភាព Eleanor ស្លៀកសម្លៀកបំពាក់តួវីរនារីក្នុងរឿងនេះ។ ដោយសារតែផ្ទៃខាងក្រោយមានសភាពពណ៌ខ្មៅ ទើបធ្វើឲ្យអ្នកគាំទ្រភាគច្រើនយល់ថានាងកំពុងថតរឿងខ្មោចទៅវិញ។

យ៉ាងណាក៏ដោយការធ្វើតេស្តសមត្ថភាពសម្រាប់ស៊េរីរឿងដ៏ល្បីមួយនេះមិនទាន់បញ្ចប់ទេ ដោយកាលពីថ្ងៃទី២៣ ខែមីនាកន្លងទៅ តំណាងក្រុមការងារផលិតបានឲ្យដឹងថា៖ "តួឯកស្រីនៃរឿងមិនទាន់ចម្រាញ់បាននៅឡើយ ត្បិតតួនាងនាគតូចនេះត្រូវតែពូកែ និងមានភាពទាក់ទាញខ្លាំងសម្រាប់មហាជនគ្រប់ៗគ្នា។ សម្រាប់ពត៌មានដែលចេញផ្សាយលើបណ្ដាញអ៊ីនធឺណិតជាហូរហែនេះ សុទ្ធតែជាពាក្យចចាមអារ៉ាម។ យើងនៅតែបន្តដំណើរការរើសតួ ហើយយើងក៏មិនទាន់ដឹងដែរថាអ្នកណានឹងក្លាយជាបានតំណែងនេះពិតប្រាកដ"៕

ប្រភព៖ jaynestars ប្រែសម្រួល៖ សុខណា