អស់ពីថៃ វៀតណាមត្រៀមមិនយកពន្ធឡាននាំចូលពីជប៉ុនវិញម្ដង

2018-03-26 07:25:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពន្ធនាំចូលរថយន្តពីប្រទេសជប៉ុន ទៅកាន់ប្រទេសវៀតណាម នឹងត្រូវបញ្ចប់ចាប់ពីឆ្នាំ២០២៩ ឬ លឿនជាងនេះ។ នេះបើតាមកិច្ចព្រមព្រៀង Trans-Pacific ដែលត្រូវបានចុះកាលពីថ្ងៃទី៨ ខែមីនា ឆ្នាំ២០១៨ ដោយសមាជិក ១១ប្រទេស រួមទាំងជប៉ុន និងវៀតណាម។

លោក Luong Hoang Thai អគ្គនាយកនៃនាយកដ្ឋានទំនាក់ទំនងពហុភាគី នៃក្រសួងឧស្សាហកម្ម និងពាណិជ្ជកម្មវៀតណាម បានឲ្យដឹងថា ការមិនយកពន្ធនេះ នឹងត្រូវអនុវត្តចំពោះរថយន្តដែលមានកម្លាំងម៉ាស៊ីនចាប់ពី ៣០០០សេសេឡើងទៅ ក្នុងរយៈពេល ១០ឆ្នាំ។

សូមបញ្ជាក់ថា កាលពីដើមខែមីនា កន្លងទៅ វៀតណាម បានមិនយកពន្ធលើរថយន្តរបស់ក្រុមហ៊ុន Honda ដែលនាំចូលពីប្រទេសថៃ ជាលើកដំបូង ប្រមាណជា ២ពាន់គ្រឿង។ បើតាមអ្នកនាំពាក្យ Honda បានឲ្យដឹងថា ការណ៍នេះបានធ្វើឲ្យតម្លៃរថយន្តចុះថោកប្រហែល ៨៨០០ដុល្លារអាមេរិក ក្នុង១គ្រឿង។

តាមច្បាប់ស្ដីពីការមិនយកពន្ធពីបណ្ដាប្រទេសក្នុងតំបន់អាស៊ានរបស់វៀតណាម រថយន្តនាំចូលពីប្រទេសនានាក្នុងតំបន់អាស៊ានអាចត្រូវបាននាំចូលវៀតណាម ដោយមិនត្រូវយកពន្ធ តាមរយៈការចុះបញ្ជី និងការចេញវិញ្ញាបនបត្រត្រួតពិនិត្យពីប្រទេសដែលជាប្រភពរបស់រថយន្ត។ លើសពីនេះ រថយន្តទាំងនោះ ត្រូវតែឆ្លងកាត់ការធ្វើតេស្តផ្នែកសុវត្ថិភាព និងការបញ្ចេញឧស្ម័នផងដែរ៕

--> Sabay ត្រូវការរើស Accounting Manager ។ បើមានចំណាប់អារម្មណ៍ដាក់ CV មក hr@sabay.com ឬចូលទៅកាន់ https://goo.gl/AsCd4N

ចុចអាន៖

ប្រភព៖ Kley Kley ប្រែសម្រួល ៖ លាភ.