មកមើល Drone យក្សដែលមានសមត្ថភាពលើសពីអ្វី ដែលអ្នកធ្លាប់ដឹង

2018-03-27 08:38:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិត Drone ធុនធ្ងន់របស់ប្រទេសឡាតវី (Latvia) Aerones បានបង្ហាញនូវ Drone ស៊េរីថ្មី ដែលអាចមានសមត្ថភាពបាញ់រំលាយទឹកកកពីតួប៊ីនខ្យល់បាន។

Drone នេះមានស្លាបចក្ររហូតដល់ទៅ ៣៦ ហើយអាចយោងវត្ថុនានាបានដល់ទៅ ២០០ គីឡូក្រាម។ វាខុសប្លែកពី Drone ទូទៅ ដោយសារតែវាអាចហោះហើរប៉ុន្មានម៉ោងក៏បានតាមចិត្តចង់ ព្រោះ Drone នេះមានខ្សែភ្លើងដ៏វែងដើម្បីភ្ជាប់ជាមួយម៉ាស៊ីនភ្លើងជាប្រភពអគ្គីសនី។ មិនត្រឹមតែប៉ុណ្ណោះ វាក៏មានទុយយោទឹក ភ្ជាប់ពី Drone មកដល់ដីតែម្ដង ផ្តល់ភាពងាយស្រួលមិនចាំបាច់ត្រូវច្រកទឹកចុះឡើង។ ដើម្បីដំណើរការ Drone នេះបាន គឺត្រូវមានឡានធំមួយដើម្បីធ្វើជាកន្លែង ដាក់សម្ភារៈចាំបាច់នានា និងជាកន្លែងដែល Drone ចុះចតផងដែរ។

វាមិនត្រឹមតែជា Drone ដែលអាចបាញ់រំលាយទឹកកក បានតែមួយមុខនោះទេ ប៉ុន្តែវាអាចជួយពន្លត់អគ្គីភ័យ លាងសម្អាតកញ្ចក់ ដឹកជញ្ជូនឥវ៉ាន់ធ្ងន់ៗ និងអាចយកមកស្រោចដំណាំផងដែរ។ ដូច្នេះហើយ យើងអាចប្រើទឹកស្អាតក៏បាន ទឹកពពុះសាប៊ូក៏បាន ស្រេចតាមស្ថានភាពជាក់ស្ដែង។

បើនិយាយពីសុវត្ថិភាពវិញ Drone នេះគឺពិតជាអស្ចារ្យណាស់ ដោយវាផ្ដាច់បង្គំម៉ូទ័រស្លាបចក្រទាំង ៣៦ ចេញពីគ្នាទាំងអស់តែម្ដង។ ដូច្នេះហើយ ពេលម៉ូទ័រណាគាំងលែងដំណើរការ Drone នេះនៅតែអាចចុះចត ដោយសុវត្ថិភាព។ មួយវិញទៀត ប្រសិនបើម៉ាស៊ីនភ្លើងលែងដំណើរការ អ្នកមិនចាំបាច់បារម្ភថា Drone នឹងធ្លាក់មកឡើយ ព្រោះ Drone នោះក៏មានថ្មបម្រុង អាចឲ្យចុះចតបាន សម្រាប់ពេលហេតុការណ៍ នោះកើតឡើងផងដែរ។

និយាយរួមមក Drone នេះពិតជាមានប្រយោជន៍ច្រើនណាស់ ហើយសម្រាប់ប្រទេសកម្ពុជា វាជារឿងចាំបាច់មួយ ដែលអង្គភាពពន្លត់អគ្គីភ័យគួរតែមាន Drone ប្រភេទនេះ ព្រោះវាអាចជួយគ្រប់គ្រងស្ថានការណ៍បានទាន់ពេល និងមិនបាច់ឲ្យអ្នកពន្លត់អគ្គីភ័យត្រូវផ្សងគ្រោះថ្នាក់ច្រើនផង៕

ចុចអាន៖

ប្រភព៖ The Verge ប្រែសម្រួល៖ ផាត សុវត្ថិ