មេ Apple ដៀមដាមចុកៗដាក់មេ Facebook ទាក់ទងរឿងអាស្រូវ

2018-03-29 04:30:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងកិច្ចសម្ភាសន៍ជាមួយទូរទស្សន៍ MSNBC លោក Tim Cook នាយកប្រតិបត្តិ Apple បានឆ្លើយតបជាហូរហែនឹងសំនួរដែលអ្នកសម្របសម្រួលកម្មវិធីចោទសួរទាក់ទងនឹងរឿងអាស្រូវ Facebook។

អ្នកសម្របសម្រួលបានសួរថា លោក Tim Cook នឹងធ្វើបែបណាប្រសិនបើខ្លួនលោកជា Mark Zuckerberg នាយកប្រតិបត្តិក្រុមហ៊ុន Facebook។ លោក Tim Cook បានតបថា ៖ "ខ្ញុំនឹងធ្វើបែបណា? ខ្ញុំនឹងមិនអាចស្ថិតក្នុងស្ថានភាពបែបនេះនោះទេ”។

លោកបន្តថា ៖ "យើងមិនចង់ឲ្យមាន មាតិកាអាសអាភាសលើ App Store របស់យើង។ យើងមិនចង់មានមាតិកាទាក់ទងនឹងការស្អប់លើ App Store។ យើងមិនចង់មានលទ្ធភាពរើសភេរវករលើ App Store។ យើងត្រួតពិនិត្យកម្មវិធីមួយៗដោយដិតដល់បំផុត ដើម្បីមើលថាកម្មវិធីនោះធ្វើតាមអ្វីដែលខ្លួនបានរៀបរាប់ឬអត់"។

"តាមពិតទៅ យើងអាចរកលុយបានច្រើនមហាសាលប្រសិនបើយើងយកអតិថិជនធ្វើជាផលិតផលរបស់ពួកយើង"។ ប៉ុន្តែយើងសម្រេចថាមិនធ្វើបែបនេះ"។ ត្រង់ចំណុចនេះលោក Tim Cook ចង់និយាយពីក្រុមហ៊ុនមួយចំនួនដូចជា Google និង Facebook។

នាយកប្រតិបត្តិក្រុមហ៊ុនផលិត iPhone រូបនេះ យល់ថាវាពិតជាគួរឲ្យខ្លាចណាស់ នៅពេលដែលលោកមើលអ្វីមួយ ហើយវាតាមលោកជាប់នៅគ្រប់វិបសាយទាំងអស់ ដូចជាប្រព័ន្ធ Targeted Ads របស់ Facebook។ លោកថា ៖ "យើងនឹងមិនតាមដានជីវិតឯកជនរបស់អ្នកនោះទេ។ ខ្ញុំយល់ថាវាជាការបំពានសិទ្ធឯកជន។ សិទ្ធឯកជនចំពោះយើង គឺស្មើនឹងសិទ្ធមនុស្ស។ វាជាសេរីភាពស៊ីវិល ហើយវាជាចំណុចប្លែកពីគេមួយចំពោះសហរដ្ឋអាមេរិក”។

ទាក់ទងនឹងវិធីការពារទិន្នន័យសម្ងាត់ នាយកប្រតិបត្តិរូបនេះនិយាយថាវិធីតែមួយគត់គឺ Encrypt ទិន្នន័យទាំងនោះ និងត្រូវពិចារណាលើច្បាប់ទាក់ទងនឹងទិន្នន័យសម្ងាត់លើកម្មវិធី ឬ វិបសាយដែលអ្នកប្រើ ហើយគួរណាប្រើប្រាស់អ៊ីនធឺណិតតាមរយៈ Private Mode ដូចជា Incognito Window ជាដើម៕

--> Sabay ត្រូវការរើស Accounting Manager ។ បើមានចំណាប់អារម្មណ៍ដាក់ CV មក hr@sabay.com ឬចូលទៅកាន់ https://goo.gl/AsCd4N

ចុចអាន៖

ប្រភព៖ macrumors ប្រែសម្រួល៖ សុខហេង