តូតា បោះទុនជាង១០ម៉ឺន បើកហាងទី៣ ខណៈគម្រោងអនាគតបើករហូត១២ ខណ្ឌនៅភ្នំពេញ

2018-04-03 03:45:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ទើបតែបើកហាងផឹកស៊ី រហូតដល់ទៅ២កន្លែង មិនបានប៉ុន្មានខែផង ម្សិលមិញនេះ តារាសម្ដែង និងជាពិធីការិនី ម៉ាក សែនសូនីតា និងគូស្នេហ៍ ដែលគេស្គាល់យ៉ាងច្បាស់ថា ជាថៅកែផលិតកម្ម "អង្គរPicture “ បានសម្ពោធបើកសាខាថ្មី១ទៀតហើយ ដោយតាមមហិច្ឆតាពួកគេ មានគម្រោងរហូតបើកដល់ទី១២ ខណ្ឌ ក្នុងរាជធានីភ្នំពេញតែម្ដង។

ហាងផឹកស៊ីជាសាខាទី៣ ដែល តូតា បើកសម្ពោធម្សិលមិញនេះ ក្រោមវត្តមានអ្នកសិល្បៈជាច្រើននាក់នោះ គឺស្ថិតនៅតាមបណ្ដោយផ្លូវព្រះមុនីវង្ស ជិតផ្លូវភ្លោះអូរឫស្សី ដោយនាងប្រាប់ថា បានបោះទុនច្រើនជាងហាងពីរផ្សេងទៀតដែលនាងបានបើកកន្លងមក ត្បិតអីទីតាំងនោះនៅលើផ្លូវធំ ហើយចំកណ្ដាលក្រុងតែម្ដង។

តូតា បានឲ្យដឹងថា ខ្លួនបានចំណាយយ៉ាងតិចជាង១០ម៉ឺន ដុល្លារ ក្នុងការបើកហាង"ផែសមុទ្រ" ដែលជាសាខាទី៣ នេះ ហើយតាមផែនការ ខ្លួននិងម្ចាស់ភាគហ៊ុនម្នាក់ទៀត មានគម្រោងបើករហូតដល់ទី១២ ខណ្ឌ ក្នុងរាជធានីភ្នំពេញតែម្ដង ។

តាមការវាយតម្លៃ ប្រសិនបើ តូតា បើកសាខា ហាង "ផែសមុទ្រ"របស់នាង រហូតដល់ទី១២ទីតាំង គ្រប់ខណ្ឌទាំងអស់ ក្នុងរាជធានីភ្នំពេញ តាមការគ្រោងទុកពិតមែននោះ ជំនួញរបស់នាងត្រូវប្រើដើមទុន មិនក្រោយ១លានដុល្លារឡើយ។

តារាស្រីដែលមានម្ដាយជាអ្នកលក់មាសរូបនេះបានលើកឡើងថា ជំនួញដែលប្រើដើមទុនច្រើនសន្ធឹកសន្ធាប់ខាងលើនេះ មានភាគហ៊ុនតែ២ ប៉ុណ្ណោះ គឺនាង និងមិត្តភ័ក្ដិម្នាក់ទៀតដែលជា អ្នកចាំមើលផ្ទាល់តែម្ដង ចំណែកនាង ដោយជាប់រវល់ការងារសិល្បៈ មិនសូវមានពេលគ្រប់គ្រាន់មើលផ្ទាល់ឡើយ។

នាងបានបន្ថែមថា ជំនួញខាងលើកក្រៅពីគោលដៅរកប្រាក់ចំណេញ នាងមានបំណងចង់បង្កើតស្លាកយីហោ មានលក្ខណៈស្តង់ដារ ដែលមានភាពល្បីល្បាញមួយ ប្រចាំប្រទេសកម្ពុជា។ ទន្ទឹមគ្នានោះដែរ ក្រៅពីទីតាំងភ្នំពេញ នាងមានគម្រោងបើកសាខាតាមបណ្ដាខេត្តជាបន្តបន្ទាប់ទៀត ដោយបច្ចុប្បន្នកំពុងតែរៀបចំបើកទីតាំងមួយទៀត នៅខេត្ត កំពត។

នេះគឺជាភាពជោគជ័យធំមួយដែលធ្វើឲ្យមានការចាប់អារម្មណ៍ក្នុងពិភពសិល្បៈបន្ទាប់ពី តារាស្រីខាងលើ ទំនាក់ទំនង ជាមួយ ប៉ុល វិបូ ហៅនីត ថៅកែផលិតកម្ម"អង្គរPicture “ និងជាបុរស ដែលមានឥទ្ធិពលម្នាក់។ ទោះបីជាពួកគេបានបើកចំហជាសាធារណៈនៃស្នេហារបស់ខ្លួនឲ្យមហាជនដឹងច្រើនឆ្នាំហើយក្ដី អ្នកទាំង២នៅ មិនទាន់សម្រេចថ្ងៃចូលរោងជ័យនៅឡើយនោះទេ៕

អត្ថបទៈ ស៊ុនហួត