យាយ យ៉យ កាន់តែតក់ស្លុត ខណៈវ័យកាន់តែចាស់

2018-04-04 04:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកសិល្បៈជើងចាស់ផ្នែកអាយ៉ៃ អ្នកស្រី យ៉យ ដែលមានវោហារសារស័ព្ទអស្ចារ្យ និងជាដៃគូសិល្បៈដ៏សាកសម ជាមួយលោកព្រហ្ម ម៉ាញ បានបង្ហាញអារម្មណ៍ ព្រួយបារម្ភខ្លាំងនៅពេលខ្លួនកាន់តែចាស់ទៅមិនទាន់ផ្តល់ចំណេះផ្នែកអាយ៉ៃឲ្យក្មេងជំនាន់ក្រោយ។

អ្នកស្រីយ៉យ បានបង្ហាញអារម្មណ៍តក់ស្លុតពេលឃើញសិល្បករចាស់ៗ លោកចេះតែចាកចេញទៅម្តងម្នាក់ដោយបាននាំយកចំណេះដឹងជាច្រើនយកទៅជាមួយមិនបានផ្តល់ចំណេះដឹងដល់ក្មេងជំនាន់ក្រោយ។ អ្នកស្រីបានបន្តថាសិល្បៈផ្នែក កំប្លែងគេចេះតែកើតមានឡើងជាបន្តបន្ទាប់ ប៉ុន្តែអាយ៉ៃគ្មានអ្នកណារៀនទេ។

អ្នកស្រីយ៉យ និង អ្នកស្រី អ៊ុក សុផា

អ្នកស្រី យ៉យ រៀបរាប់ទាំងអួលដើមក ៖«ខ្ញុំស្លុតដែរ! ព្រោះអ្វីសិល្បៈបើកំប្លែង ចេះតែកើតមកច្រើន! កើតមានបន្តបន្ទាប់គ្រាន់ថាសម្ដែង ឬមិនល្អខ្ញុំក៏អត់ដឹងដែរ។ តែបើសិល្បៈអាយ៉ៃគឺអស់ហើយនិយាយទៅគឺអស់តែម្ដង នៅតែចាស់ៗ មានខ្ញុំយាយអឿន យាយណាងតែប៉ុណ្ណឹងឯងស្រីហើយនឹងអ្នកស្រីអ៊ុក សុផា តែលោកបោះបង់យូរហើយ! ខ្ញុំមានវ័យចំណាស់ហើយខ្ញុំមានការសោកស្តាយ ចំណេះរបស់យើងដែលមាន ហើយយើងមិនទាន់បានសាបព្រោះ ដល់ក្មេងជំនាន់ក្រោយបាន បើយើងបានសាបព្រោះដល់ក្មេងជំនាន់ក្រោយបានយើងអស់មានការសោកស្ដាយទេ។ ខ្ញុំមិនអាចធានាបានទេខ្ញុំចាស់ហើយសេចក្តីស្លាប់មិនទាងទេខ្ញុំមិនមែនដង្ហោយរកសេចក្តីស្លាប់ទេ ប៉ុន្តែមនុស្សមានកើតមានស្លាប់ហើយ ។ ប៉ុន្តែបើមានអ្នកបន្តវេនសង្ឃឹមថាវប្បធម៌ចេះតែមាន យើងមិនស្ដាយទេ !»

តាមអ្នកអាយ៉ៃជើងចាស់ ដែលមានវ័យ ជិត ៦០ឆ្នាំរូបនេះ បញ្ជាក់ថាកន្លងមក លោកព្រហ្ម ម៉ាញ ប្រកាសជួយបង្រៀន ដោយឥតគិតថ្លៃក៏គ្មានអ្នកអ្នកចូលរៀនផង៕

អត្ថបទ៖ ច្រឹក ស្រីអូន