តារាជើងចាស់ឥណ្ឌា Salman Khan ត្រូវជាប់ពន្ធនាគារដោយសារសម្លាប់សត្វព្រៃ

2018-04-06 02:01:08
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿងរ៉ាវមួយកំពុងផ្ទុះឡើងក្នុងប្រទេសឥណ្ឌាទាក់ទងនឹងតារាបូលីវូដដ៏ល្បី Salman Khan ដែលត្រូវប្រឈមមុខជាប់ពន្ធនាគារដល់ទៅ ៥ឆ្នាំ។

តុលាការទីក្រុង Jodhpur បានពិន័យ Salman នូវទឹកប្រាក់ចំនួន ១៥៤ដុល្លារ នូវករណីដែលលោកបានព្យាយាមប្រមាញ់សត្វព្រៃដ៏កម្រមួយប្រភេទកាលពីឆ្នាំ ១៩៩៨។ អ្វីដែលធ្ងន់ធ្ងរពីលើនេះទៅទៀតនោះគឺ លោកត្រូវជាប់ពន្ធនាគារដល់ទៅ ៥ឆ្នាំឯណោះ។

ដើមហេតុដំបូង កើតឡើងនៅពេលដែល លោក Khan បានសម្លាប់សត្វប្រើសម្យ៉ាងនៅឥណ្ឌា ដែលជាប្រភេទដែលប្រទេសនេះព្យាយាមការពារបំផុត។ ហេតុការណ៍នេះ បានកើតឡើងអំឡុងពេលលោកកំពុងថតរឿង។ ចំណែកតារាសម្ដែង ៤នាក់ផ្សេងទៀតដែល សម្ដែងក្នុងរឿងនោះជាមួយ Khan ក៏ត្រូវជាប់ទោសដែរនាពេលនោះ ប៉ុន្តែក្រោយរកឃើញថាពួកគេមិនមានជាប់ពាក់ព័ន្ធអ្វី ដូចនេះតុលាការក៏បានសម្រេចលើកលែងទោស។

ទោះជាយ៉ាងណា តារាប្រុសវ័យ ៥២ឆ្នាំរូបនេះ អាចដាក់ពាក្យតវ៉ា នឹងសាលក្រមនេះបាន នៅតុលាការជាន់ខ្ពស់។ ប៉ុន្តែ យ៉ាងហោចណាស់លោកក៏នឹងត្រូវចំណាយពេលមួយរយៈនៅក្នុងពន្ធនាគារដែរ៕

ប្រភព៖ BBC ប្រែសម្រួល៖ យី សុធារី