John Cena ជិតឈានដល់ចំណុចថ្មីមួយក្នុងភាពជាតារាសម្ដែងបន្ទាប់ពីបញ្ចេញរឿងថ្មី

2018-04-09 09:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តបែបកំប្លែង "Blockers” គឺជាជំហានដ៏ធំមួយនិងត្រឹមត្រូវសម្រាប់ អតីតតារាប្រចាំកីឡាកាស WWE ដែលមានទឹកចិត្តមុះមុតក្នុងការប្រឡូកចូលវិស័យសម្ដែង និងហ៊ានធ្វើអ្វីគ្រប់យ៉ាងឲ្យទស្សនិកជនសើចក្អាកក្អាយ។

John Cena ធ្លាប់សម្ដែងជាតួរងជាច្រើនដងក្នុងរឿងបែបកំប្លែង លក្ខណៈ R-Rated (១៨ឆ្នាំឡើង) ដូចជានៅក្នុងរឿង "Trainwrek” និង "Sisters” ជាដើម ប៉ុន្តែនៅក្នុងរឿងថ្មី "Blocker” នេះកត់សម្គាល់ឃើញថា តារាកីឡាកាសរូបនេះក៏មានសមត្ថភាពក្នុងការសម្ដែងមិនធម្មតាដែរ។

ភាពយន្តរបស់ផលិតកម្ម Universal film នេះបានបញ្ចេញកាលពីថ្ងៃសុក្រ ដែលនិយាយអំពីឪពុកម្ដាយ ៣គ្រួសារខិតខំយ៉ាងណា ហាមឃាត់កូនស្រីខ្លួនកុំឲ្យបាត់បង់ព្រហ្មចារីនៅក្នុងថ្ងៃ Prom Night។ ក្នុងនោះក៏មានឈុតឆាកមិនសមរម្យ និងអាក្រាតកាយខ្លះ ប៉ុន្តែវាគឺសុទ្ធតែល្អសើច និងគួរឲ្យចាប់អារម្មណ៍។ ចំពោះការសម្ដែងនៅក្នុងរឿងនេះ John ត្រូវគេចាប់អារម្មណ៍ថា លោកក៏មានសមត្ថភាពសម្ដែងមិនចាញ់ The Rock ប៉ុន្មានទេ។

ដោយសារអ្នកទាំងពីរមានប្រភពដើមពីកីឡាកាសដូចគ្នា The Rock ពិតជាទទួលបានភាពជោគជ័យក្នុងអាជីពជាអ្នកសម្ដែងខ្លាំងនឹកស្មានមិនដល់។ ដូច្នេះហើយភាពជោគជ័យរបស់ John Cena ក្នុងរឿង "Blockers” នេះអាចជាឱកាសល្អសម្រាប់លោក ប្រែក្លាយជាតារាហូលីវូដដ៏ពូកែនិងរកចំណូលបានច្រើនម្នាក់។

គូសបញ្ជាក់ដែរថា "Blockers” រកចំណូលបាន ២១,៤លានដុល្លារនៅក្នុងសប្ដាហ៍ដំបូង ដែលជាចំនួនទឹកប្រាក់មួយល្អបំផុតសម្រាប់រឿងនេះ៕