តោះ! មកដឹងពីរបៀបរកប្រាក់ចំណូលរបស់ Facebook

2018-04-19 02:24:43
ចំនួនមតិ 0 | ចំនួនចែករំលែក 0

ចន្លោះមិនឃើញ

Facebook រកប្រាក់ចំណូលបានប្រមាណ ៤០ ៦៥៣ ០០០ ០០០ ដុល្លារក្នុងឆ្នាំ ២០១៧។ ហើយចំណូលធំបំផុតរបស់ Facebook បានពីការផ្សព្វផ្សាយ ដែលនាំចំណូលបានប្រមាណ ៣៩ ៩៤២ ០០០ ០០០ ដុល្លារក្នុងឆ្នាំ ២០១៧។

Google ក៏ជាក្រុមហ៊ុនយក្សរកចំណូលពីការផ្សព្វផ្សាយពាណិជ្ជកម្មផងដែរ ដោយអនុញ្ញាតឲ្យអ្នកផ្សព្វផ្សាយបង្ហាញពាណិជ្ជកម្មផ្អែកលើ Keyword បានស្រាវជ្រាវ។ រីឯតម្លៃរបស់ Facebook គឺការផ្សព្វផ្សាយចំគោលដៅ (Targeted advertising)។

ការផ្សព្វផ្សាយចំគោលដៅ

អ្នកផ្សព្វផ្សាយអាចប្រើទិន្នន័យអ្នកប្រើប្រាស់ពីប្រព័ន្ធរបស់ Facebook សម្រាប់ផ្សាយពាណិជ្ជកម្ម ដោយអាចអង្កន់តាមប្រភេទអ្នកប្រើប្រាស់ទៅតាមគោលដៅ ដូចជាបណ្ដុំមនុស្សមានប្រាក់ចំណូលណាមួយ, សាសនា និងចំណាត់ក្រុមជាច្រើនទៀត។ ឧទាហរណ៍ សេវាកម្ម Dynamic Ads របស់ Facebook អាចឲ្យអ្នកមានបំណងផ្សព្វផ្សាយ Upload ប្រភេទផលិតផលរបស់ពួកគេ ហើយកំណត់គោលដៅអតិថិជននៅកម្រិតប្រាក់ចំណូលណាមួយ។

វីដេអូ និងសារ

បើតាមក្រុមហ៊ុន ចំនួនមើល Facebook Live ប្រចាំថ្ងៃមានការកើនឡើងច្រើនជាង ៤ ដងកាលពីឆ្នាំមុន។ បណ្ដាញសង្គមយក្សមួយនេះ ក៏បានចុះកិច្ចព្រមព្រៀងជាមួយអ្នកផលិត Content ជាច្រើន ដើម្បីផ្សព្វផ្សាយវីដេអូឲ្យបានកាន់តែឆ្ងាយ។

អ្នកក៏បានឃើញដែរលើសេវាកម្ម សារអេឡិចត្រូនិក (Messager) មានបង្ហាញផ្ទាំងពាណិជ្ជកម្មមួយចំនួន។ បើតាមលោក Mark Zuckerberg មុខងារ Direct chat របស់សេវាកម្មនេះអាចឲ្យអតិថិជនផ្ញើសារជជែកផ្ទាល់នឹងម្ចាស់ពាណិជ្ជកម្ម ជាលទ្ធផលបានឃើញមានសារឆ្លើយឆ្លងគ្នាប្រមាណ ២ ពាន់លាន ក្នុងត្រីមាសទី ៤ ឆ្នាំ ២០១៧។ ហើយការទិញយកកម្មវិធី WhatsApp ឆ្នាំ ២០១៤ ក្នុងតម្លៃប្រមាណ ២១.៨ ពាន់លានដុល្លារ ជាផ្នែកមួយជំរុញវិសាលភាពសេវាកម្មរបស់ខ្លួន។

នៅមានបច្ចេកវិទ្យាជាច្រើនដែលបានបំពាក់លើ Facebook ដូចជា Virtual reality និងការនាំអ៊ីនធឺណិតទៅកាន់មនុស្សរាប់ពាន់លានអ្នក ដែលមិនទាន់បាន Online។ នេះសុទ្ធជាមធ្យោបាយពន្លាចេញជាប្រាក់ចំណូល មានន័យថាអ៊ីនធឺណិតប្រើប្រាស់កាន់តែទូលំទូលាយ កំណើនប្រើប្រាស់ និងប្រាក់ចំណូលក៏ឡើងកប់ដែរ។

រឿងអាស្រូវពាក់ព័ន្ធនឹង Cambridge Analytica

Cambridge Analytica ដែលបានបង្ហាញទិន្នន័យអ្នកប្រើប្រាស់ប្រមាណ ៨៧ លាននាក់ទៅកាន់ក្រុម Hackers ត្រូវបានលាតត្រដាងនៅខែ ០៣ ឆ្នាំ ២០១៨។ នេះត្រូវបានគេរំពឹងថា នឹងធ្វើឲ្យប៉ះពាល់ដល់ប្រាក់ចំណូលយ៉ាងខ្លាំងរបស់ Facebook។

លោក Mark Zuckerberg លើកឡើងថា ក្រុមហ៊ុនកំពុងបង្កើតបច្ចេកវិទ្យាថ្មី និងបង្កើនការវិនិយោគលើផ្នែកសុវត្ថិភាពនៅពីលើការវិនិយោគផ្សេងៗទៀត ដែលនេះនឹងប៉ះពាល់ដល់ប្រាក់ចំណេញរបស់ក្រុមហ៊ុន។

ប្រាក់ចំណូលរបស់ Facebook បានពីទីផ្សារធំបំផុតពីរ អាមេរិកខាងជើង និងអឺរ៉ុប ត្រូវរំពឹងថានឹងប៉ះពាល់ ពាក់ព័ន្ធនឹងបញ្ហាជាមួយ Cambridge Analytica។ កាលឆ្នាំ ២០១៧ ក្រុមហ៊ុន Facebook រកបានជាមធ្យម ៨៤.៤១ ដុល្លារពីអ្នកប្រើប្រាស់ម្នាក់ៗក្នុងអាមេរិកខាងជើង និង ២៧.២៦ដុល្លារពីអ្នកប្រើប្រាស់ម្នាក់ៗក្នុងអឺរ៉ុប។ ខណៈនៅអាស៊ីរកបានប្រមាណ ៧.៦១ ដុល្លារពីអ្នកប្រើប្រាស់ម្នាក់ៗដែរ។

ការប៉ះពាល់ដល់ប្រាក់ចំណូល Facebook ពីទីផ្សារធំបំផុតទាំងពីរអាចមានពីរផ្លូវ។ ទីមួយ ការព្រួយបារម្ភរបស់អ្នកវិនិយោគអាចដកពាណិជ្ជកម្មខ្លួនចេញពីគម្រោងរបស់ Facebook។ ទីពីរ ប្រាក់ចំណូលរបស់បណ្ដាញសង្គមអាចប៉ះទង្គិចខ្លាំងនៅអឺរ៉ុប ដោយសារបទបញ្ញត្តិថ្មី ដែលតម្រូវឲ្យ Facebook ទទួលបានទិន្នន័យអ្នកប្រើប្រាស់លុះត្រាតែមានការយល់ព្រម ហើយលទ្ធផលអាចនឹងធ្លាក់ចុះ ៧% នៃប្រាក់ចំណូលរបស់ខ្លួន។

ដំណឹងល្អសម្រាប់វិនិយោគិន Facebook ដោយក្រុមហ៊ុនកំពុងដើរចូលទីផ្សារថ្មី ដូចជា អាហ្វ្រិក និងអាស៊ី ត្បិតប្រាក់ចំណូលប្រហែលជាមិនច្រើនខ្លាំង តែនេះក៏ជាជំហានមួយពង្រីកសក្ដានុពលរបស់ក្រុមហ៊ុនដែរ៕