ប្លែកធ្លាយរឿងឪពុក គីម ជុងអ៊ុន ធ្លាប់ចាប់ជំរិតតារាសម្តែងស្រីកូរ៉េខាងត្បូងល្បីឈ្មោះម្នាក់

2018-04-20 02:47:32
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងស្រីកូរ៉េខាងត្បូង Choi Eun-hee គឺជាតារាល្បីល្បាញបំផុតម្នាក់នៅក្នុងប្រទេស ក្នុងអំឡុងឆ្នាំ ១៩៦០ និង ១៩៧០។

តារាសម្ដែងស្រីកូរ៉េខាងត្បូង Choi Eun-hee (ឆ្វេង) និង តារាសម្តែងស្រីអាមេរិក Marilyn Monroe (ស្តាំ)

តារាស្រី Choi Eun-hee បានកើតនៅក្នុងទីក្រុង Gwangju ខេត្ត Gyeonggi ក្នុងឆ្នាំ ១៩២៦ ហើយបានចាប់ផ្ដើមអាជីពជាតារាសម្ដែងនៅឆ្នាំ ១៩៤៧ ក្នុងខ្សែភាពយន្តរឿង «A New Oath»។ ក្រោយមក តារាស្រីរូបនេះបានដើរតួឯកក្នុងរឿង «The Sun Of Night» ឆ្នាំ ១៩៤៨ និង «A Hometown in Heart» ឆ្នាំ ១៩៤៩ ដែលធ្វើឲ្យអ្នកស្រីមានឈ្មោះល្បីល្បាញកាន់តែខ្លាំង។

មិនយូរប៉ុន្មាន អ្នកស្រី Choi បានក្លាយជាតារាសម្តែងស្រីល្បីឈ្មោះបំផុតម្នាក់ ក្នុងចំណោមតារាសម្ដែងស្រីល្បីឈ្មោះបំផុតទាំង ៣ ជាមួយនឹង តារាសម្ដែងស្រី Um Aing-ran និង Kim Ji-mi។

យ៉ាងណាមិញ អ្នកស្រី Choi បានទទួលការចាប់អារម្មណ៍ជាអន្តរជាតិ នៅពេលដែលបែកធ្លាយរឿងរ៉ាវត្រូវចាប់ជំរិតដោយ អតីតមេដឹកនាំកូរ៉េខាងជើង លោក Kim Jong-il ដែលត្រូវជាឪពុកបង្កើតរបស់មេដឹកនាំកូរ៉េខាងជើងបច្ចុប្បន្ន លោក គីម ជុងអ៊ុន នៅក្នុងឆ្នាំ ១៩៧៨។ រយៈពេល ៦ ខែក្រោយមក អតីតប្តីអ្នកស្រីដែលជាអ្នកដឹកនាំ និងផលិតរឿង លោក Shin Sang-ok ក៏ត្រូវបានគេចាប់ជំរិតផងដែរ។

ប្តីប្រពន្ធនេះត្រូវបានគេឲ្យរហស្សនាមថា «Brangelina of '70s South Korea» រហូតដល់ការលែងលះគ្នានៅឆ្នាំ ១៩៧៦។ (Brangelina គឺជាអតីតទំនាក់ទំនងយ៉ាងល្អូកល្អិនរវាង តារាសម្តែង Brad Pitt និង Angelina Jolie)

ក្នុងអំឡុងពេលនៃការចាប់ជំរិតនោះ ពួកគេទាំង ២ ត្រូវបានបង្ខំឲ្យផលិតរឿងនៅប្រទេសកូរ៉េខាងជើង អស់រយៈពេលជិត ១០ ឆ្នាំ។ ទោះបីជាយ៉ាងណា អ្នកស្រី Choi និង លោក Shin បានរត់គេចខ្លួនពីកណ្ដាប់ដៃមេដឹកនាំផ្ដាច់ការនោះ បន្ទាប់ពីស្វែងរកជំនួយពីស្ថានទូតអាមេរិក នៅក្នុងឆ្នាំ ១៩៨៦។

បន្ទាប់ពីរត់គេចខ្លួនបានសម្រេច ពួកគេបានទៅរស់នៅក្នុងទីក្រុង Reston រដ្ឋ Virginia រួចបន្តផ្លាស់ទៅរស់នៅក្នុងទីក្រុង Beverly Hills រដ្ឋ California សហរដ្ឋអាមេរិក និងបានវិលត្រលប់មកប្រទេសកំណើតវិញនៅក្នុងឆ្នាំ ១៩៩៩។

អ្នកស្រី Choi បានប្រាប់ឲ្យដឹងនៅក្នុងបទសម្ភាសន៍មួយ ជាមួយសារព័ត៌មាន Korea Joongan Daily កាលពីឆ្នាំ ២០១៥ ថា «ខ្ញុំនៅតែមានសុបិនអាក្រក់ អំពីការដេញប្រមាញ់របស់ភ្នាក់ងារកូរ៉េខាងជើង។ វាហាក់បីដូចជានរណាម្នាក់កំពុងតែតាមខ្ញុំអីចឹង។ អ្នកដែលមិនធ្លាប់ឆ្លងកាត់រឿងនេះ នឹងមិនយល់ពីអារម្មណ៍មួយនេះឡើយ»៕

ចុចអាន៖

ប្រភព៖ nextshark ប្រែសម្រួល៖ សេង ឡុង