ចំណាយពេលរាប់ម៉ោង ចាំថតទិដ្ឋភាពថ្ងៃរះ ថ្ងៃលិច បែរជាលទ្ធផលខកចិត្តទៅវិញ

2018-04-24 07:23:20
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកបានចំណាយពេល រង់ចាំពេលវេលាពន្លឺដ៏ល្អ សម្រាប់ទិដ្ឋភាពថ្ងៃរះ ឬលិច ថតរូបជាអនុស្សាវរីយ ក៏ដូចជាលក់ឲ្យអ្នកមានតម្រូវការ។ តែបែរជា មានការឆ្លើយតបមិនសូវល្អទាក់ទងនឹងរូបភាពអ្នកផលិត។

ហើយនេះជាហេតុផលទាំង ៥ នៅពីក្រោយរូបភាពថ្ងៃរះ ឬលិចអ្នកមើលទៅមិនសូវលេចធ្លោ។

១) មិនមានចំណុចសំខាន់

ខណៈពេលអង្គុយនៅមាត់ឆ្នេរ សម្លឹងមើលទិដ្ឋភាពថ្ងៃលិច មើលទៅមានអារម្មណ៍អស្ចារ្យ ប៉ុន្តែកាមេរ៉ាបែរជាមិនចាប់បានទិដ្ឋភាពបែបនោះ។

រូបថតថ្ងៃរះ ឬលិចដ៏ជោគជ័យភាគច្រើន មានចំណុចចាប់អារម្មណ៍មួយក្នុងទិដ្ឋភាព ជា Subject បង្ហាញចំណុចសំខាន់របស់សាច់រឿង ខណៈថ្ងៃរះ ឬលិច ផ្ដល់ពន្លឺ និងបរិយាកាស។

សាច់រឿងមិនចាំបាច់តែជាមនុស្ស ឬវត្ថុក្នុងទិដ្ឋភាពនោះទេ អាចជាទិដ្ឋភាពដ៏ស្អាត ឬការប៉ះទង្គិចរវាងរលក និងថ្ម។ ចំណុចសំខាន់គឺ មានអ្វីមួយជាធ្នាក់ចាប់អារម្មណ៍អ្នកទស្សនា។ អ្នកគួរប្រើប្រាស់បរិយាកាសថ្ងៃរះ ឬលិច បង្កើតជាប្លង់ជំនួយទិដ្ឋភាព។

២) មិនមានវត្តមានពពកច្រើនល្មម

ពពកអាចពង្រឹងគុណភាពថ្ងៃរះ ឬលិចបាន បូកផ្សំជាមួយចំណាំងពន្លឺមួយចំនួនក្នុងប្លង់ទិដ្ឋភាព ធ្វើឲ្យរូបភាពកាន់តែមើលទៅអស្ចារ្យ។

ពិតណាស់ អ្នកអាចពិបាកនឹងគ្រប់គ្រងលើការមាន ឬគ្មានពពកបង្ហាញក្នុងទិដ្ឋភាព ដែលតម្រូវសកម្មច្រើនក្នុងការផ្ដល់ចំណាប់អារម្មណ៍មួយដល់អ្នកមើល។

ការមានពពកខ្លះៗក្នុងមេឃជាការល្អ តែពពកក្រាស់ពេក នឹងធ្វើឲ្យបាត់បង់ចំណុចចាប់អារម្មណ៍។ ជារួម អ្នកចង់បានពពកខ្លះក្នុងប្លង់ មិនមែនជាទិដ្ឋភាពពពកក្រាស់ មេឃភ្លៀងនោះទេ។

៣) បង្ហាញចំណុច Highlight និង ស្រមោលមិនសូវត្រឹមត្រូវ

Highlight ជាតំបន់ពន្លឺរបស់រូបភាព ហើយស្រមោលជាតំបន់ងងឹតរបស់រូបភាព។

បញ្ហាអ្នកប្រឈម ពេលថតរូបថ្ងៃលិច ឬរះគឺមេឃភ្លឺ ហើយផ្ទៃខាងមុខនឹងងងឹត។ ដើម្បីធានាថាចំណុច Highlight និងស្រមោលបង្ហាញបានត្រឹមត្រូវ អាចប្រើ Neutral density filter ក្នុងការផ្ដល់តុល្យភាពពន្លឺតំបន់ទាំងពីរនេះ។

អ្នកក៏អាចមានបច្ចេកទេសមួយផ្សេងដូចជា Exposure bracketing ឬ AEB (មុខងារថតប្រើកម្រិតពន្លឺបីខុសគ្នា) អាចជួយអ្នកសម្រេចបានពេលកាត់ត ដោយអាចកែពន្លឺភ្លឺ ឬងងឹតក្នុងកម្មវិធីដូចជា Adobe Photoshop ឬ Lightroom ដោយប្រាកដថាចំណុច Highlight និងស្រមោលបង្ហាញមកមានភាពត្រឹមត្រូវ។

៤) រូបភាពបង្ហាញក្នុងប្លង់មិនត្រឹមត្រូវ

វិធីងាយស្រួលបំផុតគឺអនុវត្តតាមរូបភាព Rule of Thirds ដោយកំណត់ចំណុចចាប់អារម្មណ៍នៅបន្ទាត់គំនូសប្រសព្វ ដែលមើលទៅមានលក្ខណៈល្អប្រសើរជាងដាក់នៅចំណុចកណ្ដាល។

អ្នកអាចពិនិត្យក្នុងប្លង់ ក្រែងមានតំបន់មិនចាំបាច់ ឬមិនត្រូវការ ដែលអាចតម្រឹមបង្រួមតាមការគួរ។ អ្នកអាចលែងជាមួយប្លង់ទិដ្ឋភាពផ្សេងៗ រួចពិនិត្យមើល ពេលកាត់ត។

៥) មិនកែកំហុស

លើរូបភាពថ្ងៃរះ ឬលិចភាគច្រើន មានចំណុចអាចងាយស្រួលជួសជុលក្នុងពេលកាត់ត។ មិនថាអ្នកមានជំនាញខ្ពស់ក្នុងការកាត់ត ឬមិនមែន មានចំណុចធំៗពីរ អ្នកគួរដឹង៖

ប្រាកដថារូបភាពអ្នកត្រង់ ដោយបន្ទាត់តម្រឹមផ្ដេកត្រូវតែត្រង់។

ប្រាកដថាអ្នកបានកែតម្រូវ White balance សម្រាប់រូបភាព (បើអ្នកមិនទាន់បានកែ ពេលថតរូប)។ គិតពីទិដ្ឋភាព អ្នកបង្ហាញ មើលទៅមានលក្ខណៈស្រទំ ឬត្រជាក់ស្លេក រួចបង្កើនកម្រិត White balance តាមការគួរ រហូតដល់មានភាពត្រឹមត្រូវ៕