ក្រសួងនឹងដាក់ឲ្យប្រើប្រាស់ Public Wifi នៅសួនចំនួនពីរក្នុងទីក្រុងភ្នំពេញ

2018-04-27 01:54:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងឲ្យដឹងថាសាជីវកម្មទូរគមនាគមន៍កូរ៉េ នៃសាធារណរដ្ឋកូរ៉េបានជួយកម្ពុជានូវគម្រោង Public Wifi និង Digital Connectivity for School ដើម្បីដំឡើងនៅក្នុងទីក្រុងភ្នំពេញចំនួនពីរកន្លែង និងនៅតាមបណ្តាខេត្តបីកន្លែងផ្សេងទៀត។

ក្នុងសេចក្តីប្រកាសព័ត៌មានមួួយចុះថ្ងៃទី២៦ ខែមេសា ឆ្នាំ២០១៨ ក្រសួងប្រៃសណីយ៍ និងទូរគមនាគមន៍កម្ពុជាបានលើកឡើងថាក្រោមកិច្ចសហការរវាងភាគីទាំងពីរ សាជីវកម្មទូរគមនាគមន៍កូរ៉េ នៃសាធារណរដ្ឋកូរ៉េ បានផ្តល់នូវជំនួយឥតសំណងគម្រោងPublic Wifi និង Digital Connectivity for School។

បើតាមក្រសួង Public Wifi នឹងដំឡើងនៅសួនច្បារសម្តេចហ៊ុន សែន និងសួនច្បារមុខព្រះបរមរាជវាំង សម្រាប់ទីក្រុងភ្នំពេញ។ សម្រាប់ទីតាំងបីទៀតគឺនៅវិទ្យាល័យហ៊ុនសែនកំពង់លែង ស្រុកកំពង់លែង និងវិទ្យាល័យហ៊ុនសែនទួលខ្ពស់ ស្រុកទឹកផុស ខេត្តកំពង់ឆ្នាំង និងនៅវិទ្យាល័យអ៊ីវ៉ាស្រង់ ស្រុកគងពិសី ខេត្តកំពង់ស្ពឺ។

សម្រាប់ Public Wifi នៅសួនទាំងពីរក្នុងរាជធានីភ្នំពេញដែលមានល្បឿន 1Gps (មួយជីហ្គាប៊ីតក្នុង១វិនាទី) ត្រូវបានដំឡើងរួចរាល់ហើយ និងត្រូវដាក់សម្ពោធឲ្យប្រើប្រាស់នៅថ្ងៃទី៩ ខែឧសភា ឆ្នាំ២០១៨ ខាងមុខនេះ។ នេះបើតាមប្រភពដដែល។

បើតាមរបាយការណ៍មួយរបស់សហរដ្ឋអាមេរិកចេញផ្សាយកាលពីដើមខែមករា ឆ្នាំ២០១៧ ឲ្យដឹងថាក្នុងចំណោមប្រជាពលរដ្ឋខ្មែរជិត១៦លាននាក់មានជាង៧លាននាក់ប្រើប្រាស់អ៊ីនធឺណេត មានជិត៥លាននាក់សកម្មក្នុងបណ្តាញសង្គម៕