ចាន់ វឌ្ឍនាកា បង្ហាញអារម្មណ៍ពិត ក្រោយចេញពី Pahang FA
- 2018-05-09 11:52:07
- ចំនួនមតិ 0 | ចំនួនចែករំលែក 0
ចាន់ វឌ្ឍនាកា បង្ហាញអារម្មណ៍ពិត ក្រោយចេញពី Pahang FA
ចន្លោះមិនឃើញ
បន្ទាប់ពីត្រូវក្លឹប Pahang FA បញ្ចប់កុងត្រានៅពាក់កណ្តាលរដូវកាលពីយប់មិញ ចាន់ វឌ្ឍនាកា បានបង្ហាញចំណាប់ពិតរបស់ខ្លួនពាក់ព័ន្ធបញ្ហានេះ ក៏ដូចជាការប្តេជ្ញាចិត្តសម្រាប់អាជីពបាល់ទាត់នាពេលខាងមុខ។
កីឡាករជម្រើសជាតិកម្ពុជាបានសរសេរលើផេកផ្លូវការរបស់ខ្លួនមុននេះបន្តិចថា ៖«វាមិនមានអ្វីចម្លែកទេនៅក្នុងពិភពបាល់ទាត់ វាតែងតែកើតមានរឿងនេះ តែអ្វីដែលសប្បាយចិត្តគឺខ្ញុំបានបំពេញការងារដែលខ្ញុំត្រូវធ្វើរួចហើយ អ្វីដែលត្រូវធ្វើបន្តរទៀតគឺមានតែការមិនបោះបង់ប៉ុណ្ណោះ។ ថ្វីបើខ្ញុំនៅទីនេះត្រឹមរយៈពេលប៉ុន្មានខែមែន តែទីនេះពិតណាស់ជាកន្លែងដែលធ្វើអោយខ្ញុំស្គាល់បាល់ទាត់បន្ថែមទៀត ជាបទពិសោធថ្មីមួយទៀតសម្រាប់ជីវិត និងវិថីដែលខ្ញុំចង់ដើរ ខ្ញុំនឹងដើរ ដើរហូតមិនឈប់។ ខ្ញុំមិនចុះចាញ់ ព្រោះខ្ញុំចង់ឈ្នះ ខ្ញុំហត់ តែខ្ញុំទ្រាំ។ ជាចុងក្រោយខ្ញុំមានតែពាក្យអរគុណអ្នកទាំងអស់គ្នាដែលតែងតែគាំទ្រ និង លើកទឹកចិត្តខ្ញុំ និង បារម្ភពីខ្ញុំ អរគុណខ្លាំងណាស់»។
ចាន់ វឌ្ឍនាកា បានចុះកុងត្រាមួយរដូវកាលជាមួយក្លឹបលីគកំពូលម៉ាឡេស៊ី Pahang FA បន្ទាប់ពីចេញពីក្លឹបលីគលំដាប់ទី៣របស់ជប៉ុនដែលនៅទីនោះមិនបានបង្ហាញខ្លួនសោះ។ យ៉ាងណាសម្រាប់ប៉ុន្មានខែនៅលីគម៉ាឡេស៊ី កីឡាករកម្ពុជារូបនេះបានលេងជាញឹកញាប់ និងជាប់ជម្រើស១១នាក់ដំបូងរហូតគិតចាប់តាំងពីសប្តាហ៍ទី១រហូតដល់សប្តាហ៍ទី៩។
ក្រៅពីលេងក្នុងលីគ ចាន់ វឌ្ឍនាកា ក៏បានបង្ហាញខ្លួនបានមួយប្រកួតក្នុងពានរង្វាន់ FA Cup របស់ម៉ាឡេស៊ីដែលជាការប្រកួតក្នុងវគ្គដ៏សំខាន់។ ពេលនោះកីឡាករកម្ពុជារូបនេះក៏ជាតួដ៏សំខាន់ម្នាក់ជួយ Pahang យកឈ្នះក្រុមខ្លាំង Johor Darul Tazim ដោយលទ្ធផល ៣-០ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ៕