ដឹងអត់ថា ម្ចាស់ក្លឹបចាស់នៅតែមានឈ្មោះក្នុងក្លឹបបឹងកេត?

2018-05-15 07:06:22
ចំនួនមតិ 0 | ចំនួនចែករំលែក 0

ចន្លោះមិនឃើញ

បឹងកេតទទួលបានម្ចាស់ភាគហ៊ុនថ្មីសម្រាប់ដំណើរការក្លឹបបន្តទៅមុខទៀត ប៉ុន្តែម្ចាស់ក្លឹបចាស់គឺលោក ស៊ីវ ថា ក៏នៅតែមានឈ្មោះជាមួយក្លឹបបឹងកេតដដែល។ នេះបើតាមការបញ្ជាក់ពីលោក បែ មករា អ្នកចាត់ការទូទៅ។

លោក បែ មករា បានប្រាប់ថា ថ្វីបើម្ចាស់ក្លឹបចាស់គឺលោក ស៊ីវ ថា បានដកខ្លួនចេញពីបឹងកេតក៏ដោយ ប៉ុន្តែក្លឹបបឹងកេតដែលមានម្ចាស់ក្លឹបថ្មីនៅតែគោរពស្រលាញ់ និងដឹងគុណដល់ម្ចាស់ក្លឹបចាស់ ព្រមទាំងរក្សាឈ្មោះរបស់លោកនៅតែជាសមាជិកកិត្តិយសរបស់ក្លឹបដដែល។

លោកពន្យល់ថា ដោយសារក្លឹបបឹងកេតមានកេរ្តិ៍ឈ្មោះល្បីល្បាញ និងជោគជ័យរហូតដល់សព្វថ្ងៃគឺដោយសារលោក ស៊ីវ ថា ដូច្នេះក្លឹបនៅតែរក្សាឈ្មោះរបស់លោកជាសមាជិកកិត្តិយស និងមិនអាចបំភ្លេចលោកបានឡើយ។

លោក ស៊ីវ ថា និងភរិយា ពេលផ្តល់បទសម្ភាសន៍កន្លងមក

កាលពីថ្ងៃទី២ ខែឧសភាកន្លងទៅនេះ លោក បែ មករា អ្នកចាត់ការទូទៅរបស់ពឹងកេតបានសរសេរលើគណនី Facebook របស់លោកដោយបានអរគុណដល់លោកប្រធានក្លឹបចាស់ ស៊ីវ ថា និងលោកស្រី ព្រមទាំងក្រុមគ្រួសារ ដែលបានលះបង់កម្លាំងកាយចិត្ត និងថវិកាយ៉ាងច្រើនដើម្បីដំណើរការក្លឹបបឹងកេតឲ្យមានឈ្មោះល្បីល្បាញរហូតដល់ថ្ងៃនេះ។ « ពួកយើងនឹងចងចាំទុកមិនមានថ្ងៃភ្លេចចំពោះការលះបង់កន្លងមក។ សូមគោរពជូនពរ ឲ្យលោក និងក្រុមគ្រួសារមានសុខភាពល្អ និងជោគជ័យគ្រប់ភារកិច្ច»។

សព្វថ្ងៃនេះបឹងកេតមានមនុស្សមួយក្រុមដែលរួមដៃគ្នាដើម្បីដំណើរការ និងអភិវឌ្ឍក្លឹបបន្តទៅមុខទៀត។ ក្នុងចំណោមមនុស្សទាំងនោះគឺមានលោកស្រី ពុទ្ធ ធីតាជាម្ចាស់ភាគហ៊ុនធំដែលចេញមុខជាប្រធានក្លឹបថ្មី លោក បែ មករា ដែលជាអ្នកចាត់ការទូទៅក៏មានភាគហ៊ុនដែរ និងមានមនុស្សមួយចំនួនទៀតដែលមានភាគហ៊ុន។ តាមការគ្រោងទុក ក្លឹបនឹងបើកដំណើរការសាងសងកីឡដ្ឋានថ្មីឲ្យរួចរាល់ក្នុងរង្វង់២ឆ្នាំខាងមុខដែលគ្រោងចំណាយជាង១លានដុល្លារអាមេរិក៕