មកដឹង តារា៥ដួង ធ្លាប់ឆ្អែតចិត្តព្រោះរងសម្ពាធផ្លូវចិត្តធ្ងន់ធ្ងរពេក

2018-05-22 00:25:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពីក្រោយភាពសើចសប្បាយ រាំច្រៀង ក្នុងជីវិតយ៉ាងហ៊ឺហា តារា៥ដួងបានទម្លាយការឈឺចាប់របស់ខ្លួនក្នុងអាជីពសិល្បៈថារងសម្ពាធយ៉ាងខ្លាំង។ តារាមួយចំនួនក៏បន្តតស៊ូមិនចុះចាញ់ ហើយតារាមួយចំនួនឆ្អែតចិត្តមិនអាចទ្រទ្រាំបានតទៅទៀត ក៏សម្រេចដើរចេញពីសិល្បៈ។ ក្នុងនោះ Sabay សូមលើកយកតារា៥ដួង ដូចខាងក្រោម៖

១. ប៊ុត សីហា

ក្រោយរងព័ត៌មានពាក់ព័ន្ធនឹងថ្នាំញៀន ជីវិតអតីតម្ចាស់ពាន The Voice Cambodia រដូវកាលទី១ប្រៀបដូចពពកខ្មៅ ធ្វើឲ្យលោករងសម្ពាធផ្លូវចិត្តធ្ងន់ធ្ងរ។ រឿងរ៉ាវអាក្រក់ៗជាច្រើនបានចាក់ស្រោចមកលើតារាមានស្រុកកំណើតមកពីខេត្តកំពង់ស្ពឺ រហូតប៊ុត សីហា សម្រេចចាកចេញពីសិល្បៈ។បន្ថែមពីនេះម្ចាស់បទ "កូនខុសហើយម៉ែ" អំពាវនាវដល់អ្នកគាំទ្រទាំងក្នុង និងក្រៅសិល្បៈឲ្យឈប់ស្អប់ ហើយតិះដៀលមកលើរូបលោកតទៅទៀត ព្រោះលោកទទួលរងភាពអាម៉ាស់គ្រប់គ្រាន់ហើយ។

២. ស៊ូ ស៊ីរីកា

តារាចម្រៀងរូបនេះសម្រេចចាកចេញពីសិល្បៈ បន្ទាប់ពីទម្លាយថា អាជីពមួយនេះគួរឲ្យខ្លាចនិងតស៊ូគ្មានបានប្រយោជន៍តទៅទៀត។ ម្ចាស់បទ "ស្រលាញ់បងលើសហើយ" ក៏រងសម្ពាធផ្លូវចិត្តផងដែរ នៅពេលខ្លួនបានខំប្រឹងតស៊ូលើវិស័យសិល្បៈយ៉ាងខ្លាំង បែរជាទទួលបានតែការឈឺចាប់និងការមិនផ្ដល់តម្លៃ។

៣. ម៉ៅ ហាជី

អំឡុងពេលមានភាពរកាំរកូសរឿងកុងត្រារវាងផលិតកម្មហង្សមាស តារាចម្រៀងរូបនេះរងព័ត៌មានមិនល្អជាច្រើន រហូតខ្លួនធ្លាប់ទម្លាយថា រងសម្ពាធផ្លូវចិត្តស្ទើរតែដើរចេញពីសិល្បៈ។ ទោះយ៉ាងណា ក្រោយរឿងរ៉ាងកុងត្រានោះចប់ អតីតបេក្ខភាព Cambodian Idol រដូវកាលទី១ មិនចុះចាញ់នោះទេ ដោយបានបន្តអាជីពរបស់ខ្លួន ព្រមទាំងចុះកុងត្រាជាតារាចម្រៀងពេញសិទ្ធនៅថោនទៀតផង។

៤. ហា សីហា

ថ្មីៗនេះអ្នកគាំទ្របានភ្ញាក់ផ្អើលនឹងការប្រកាសដកខ្លួនចេញពីផលិតកម្ម M របស់តារាចម្រៀង ហា សីហា។ អំឡុង៣ឆ្នាំមកនេះ ម្ចាស់បទ "អូនអ្ហើយនៅទីណា" ទម្លាយមកកាន់ Sabay ថា ព្រោះតែគ្មានពេលគ្រប់គ្រាន់ គួបផ្សំការអាក់អន់ចិត្តនិងរងសម្ពាធផ្លូវចិត្តក្នុងការធ្វើជាតារាចម្រៀងកុងត្រា។ លោកថា ក្រោយឆ្លងកាត់បទពិសោធន៍នេះ លោកឆ្អែតចិត្តនិងមិនចង់ចូលផលិតកម្មណាទាំងអស់ ។

៥. ឆៃលី ដាឡែន

បើរំលឹកកាលពីជាង៧ឆ្នាំមុន តារាសម្ដែងរូបនេះត្រូវបានក្រសួងផ្អាកការងារសិល្បៈរបស់ខ្លួនទាំងស្រុង ដោយសារតែស្លៀកពាក់ស៊ិចស៊ីមិនប្រណៃដៃ ពេលសម្ដែងនៅក្រៅប្រទេស។ ពេលវិលមកការងារសិល្បៈវិញ ឆៃលី ដាឡែនបានបង្ហាញអារម្មណ៍ឈឺចាប់ក្នុងកម្មវិធី "តុបំភ្លឺ" ថា ពេលនោះខ្លួនពិតជារងសម្ពាធផ្លូវចិត្តធ្ងន់ធ្ងរណាស់ ព្រោះមិនអាចចេញទៅណាបាន សំងំតែក្នុងផ្ទះលួចយំម្នាក់ឯង។ សូម្បីបងប្ងូនសាច់ញាតិរបស់ខ្លួនក៏រងភាពអាម៉ាសពីអ្នកជិតខាងដោយសារតែកំហុសមួយពេលរបស់ឆៃលី ដាឡែនកាលគ្រានោះដែរ៕

អត្ថបទ៖ លឹម សុនា