នេះហើយជីវិត ជយលាភីលេខ២ "ពេជ្រកំពុងច្នៃ" តស៊ូខ្លាំង តាំងពីរើសអេតចាយ
- 2018-05-22 03:25:20
- ចំនួនមតិ 0 | ចំនួនចែករំលែក 0
នេះហើយជីវិត ជយលាភីលេខ២ "ពេជ្រកំពុងច្នៃ" តស៊ូខ្លាំង តាំងពីរើសអេតចាយ
ចន្លោះមិនឃើញ
ជយលាភីលេខ២កម្មវិធី "ពេជ្រកំពុងច្នៃ" ឆ្នាំ២០១៧ លោក ហេ រ៉ាយ៉ត បានឈានមកដល់ចំណុចជោគជ័យមួយក្នុងឆាកជីវិត ដោយមានទាំងមុខជំនួញផ្ទាល់ខ្លួន និងជាតារាចម្រៀងអាជីពថែមទៀត។ ប៉ុន្តែនៅប្រមាណជាង ១០ឆ្នាំមុន ពេញដោយស្នាមតស៊ូរបស់ រ៉ាយ៉ត សូម្បីតែការងាររើសអេតចាយ។
បកទៅអតីតកាលនៃការតស៊ូ ហេ រ៉ាយ៉ត បានឲ្យដឹងថា ដោយសារជីវភាពគ្រួសារក្រីក្រលំបាកពេក នាមជាកូនច្បងក្នុងចំណោមបងប្អូន៧នាក់ និងមានឪពុកម្ដាយជាកសិករ លោកក៏បានសម្រេចចិត្តចាកចេញពីស្រុកកំណើតនៅភូមិថ្មី ឃុំត្រប់ ស្រុកបាធាយ ខេត្តកំពង់ចាម ផ្សងព្រេងមកភ្នំពេញនៅខ្ទង់ឆ្នាំ ២០០៦ ដោយមកស្នាក់នៅក្នុងវត្តសន្សំកុសល។
បំណងពេលនោះ គឺដើម្បីមកច្រៀងតាមភោជនីយដ្ឋាននានា ដើម្បីរកប្រាក់ដោះស្រាយជីវភាព ក៏ដូចកសាងអនាគត។ ប៉ុន្តែរឿងដំបូងដែលលោកត្រូវប្រឈមមុនគេនាពេលនោះ គឺរកបាយហូបសិន។ ដោយមិនមានជម្រើសអ្វី រ៉ាយ៉ត ក៏បង្ខំចិត្តទៅរើសអេតចាយ ដើម្បីបានប្រាក់ទិញបាយហូប។
"ខ្ញុំដើររើសប្រមាណ២ម៉ោងនៅទួលទំពូង រើសអត់បានសោះ ដោយសារយើងមិនចេះរើស...ក្នុងពេលនោះ ខ្ញុំសម្លឹងទៅបងប្អូនអ្នករើសអេតចាយផ្សេងទៀត ឃើញពួកគាត់ពិបាក ខ្ញុំក៏មានអារម្មណ៍អាណោចអាធ័មចំពោះខ្លួនឯង ខ្ញុំគិតថា ទោះយ៉ាងណា ក៏ខ្ញុំមិនធ្វើការនេះទៀតដែរ គិតហើយ ខ្ញុំបោះថង់រើសសំរាមចោលតែម្ដង!" ។
រ៉ាយ៉ត បានទៅសុំការងារធ្វើជាអ្នករត់តុពីមួយកន្លែងទៅមួយកន្លែង បានប្រាក់ខែ ៥ ទៅ៦ម៉ឺនរៀលក្នុង១ខែ។ ក្រោយមក ដើម្បីសម្រេចក្ដីស្រមៃធ្វើជាអ្នកចម្រៀង លោកបានទៅហាត់រៀននៅក្លឹបប្រជានុភាពរយៈពេលប្រមាណ១ឆ្នាំ។ បន្ទាប់ពីដុះខាត់សំឡេងឲ្យប្រសើរជាងមុនហើយ លោកក៏បានទៅសុំគេច្រៀងនៅភោជនីយដ្ឋាន "៧២" ក្បែររង្វង់មូលផ្សារដើមគ។
“កាលណោះ ពេលទៅសុំគេច្រៀង គេថាហាងគេមានអ្នកចម្រៀងគ្រប់ហើយ អត់ត្រូវការទៀតទេ តែខ្ញុំប្រាប់ថា ខ្ញុំច្រៀងអត់យកប្រាក់ទេ ឲ្យតែបងឲ្យច្រៀង ហើយគេក៏ព្រម!"។ ចាត់ថា សំណាងចាប់ផ្ដើមមានដែរ ត្បិតថាច្រៀងមិនបានប្រាក់ ប៉ុន្តែនៅថ្ងៃទី១ រ៉ាយ៉ត ប្រាប់ថា លោកទទួលបានលុយធីបពីភ្ញៀវចំនួន ៣០០ដុល្លារ ធ្វើឲ្យលោកសប្បាយចិត្តយ៉ាងខ្លាំង។
បន្តមកយប់បន្តបន្ទាប់ ក៏លោកនៅរកបានប្រាក់ធីបច្រើនដែរ ហើយក្រោយមក ដោយមើលឃើញពីសមត្ថភាព រ៉ាយ៉ត ថៅកែក៏ផ្ដល់ថ្លៃឈ្នួលច្រៀងឲ្យ ដោយពេលនោះ ទទួលបានថ្លៃឈ្នួលពលកម្ម ១ដុល្លារក្នុងមួយយប់។ ច្រៀងនៅភោជនីយដ្ឋានខាងលើបានប្រមាណជា ៣-៤ឆ្នាំ រ៉ាយ៉ត ក៏ឈប់ហើយត្រឡប់ទៅស្រុកកំណើតវិញ ធ្វើជាតារាចម្រៀងច្រៀងតាមកម្មវិធីនានា។
បានប្រមាណជា ២-៣ឆ្នាំ ដោយសន្សំបានដើមទុនខ្លះ លោកក៏បានបង្កើតជាក្រុមអកកេះផ្ទាល់ខ្លួន ដើរលេងនៅតាមខេត្តនានា។ ជាមួយគ្នា លោកក៏បានដាក់ពាក្យចូលក្នុងកម្មវិធីប្រឡងចម្រៀងនានាដែរ ប៉ុន្តែមិនទទួលបានលទ្ធផលល្អទេ។ មិនបាក់ទឹកចិត្តចំពោះបរាជ័យរបស់លោក នៅឆ្នាំ ២០១៨នេះ រ៉ាយ៉ត ក៏បានដាក់ពាក្យប្រឡងក្នុងកម្មវិធី "ពេជ្រកំពុងច្នៃ" របស់ទូរទស្សន៍អាស៊ីអាគ្នេយ៍ទៀត។
ជាលទ្ធផល លោកបានទទួលជយលាភីលេខ២ ក្នុងចំណោមបេក្ខជនរាប់រយនាក់។ ក្រោយជោគជ័យលើការប្រឡង យុវជននិយមច្រៀងបទ "ឆាយ វីរៈយុទ្ធ" រូបនេះ ទើបតែបានចូលច្រៀងក្នុងផលិតកម្ម 2B ទៀត ដែលលោកអះអាងថា បទចម្រៀងប្រភេទ Original Song ដំបូងរបស់លោកត្រៀមនឹងចេញឆាប់ៗនេះហើយ៕
រូបភាព៖ ផ្ដល់ដោយ រ៉ាយ៉ត