Facebook បាន​ប្រកាស​ពី​ការ​ផ្លាស់​ប្ដូរ​ថ្មី​លើ​​ការ​កំណត់​ការ​ការពារ​ ២ តង់​ លើ​គណនី​ Facebook មួយ​ ដោយ​មាន​ភាព​ងាយ​ស្រួល​ជាង​មុន និង ​មិន​ចាំ​បាច់​ប្រើ​លេខ​ទូរសព្ទ​នោះ​ទេ។

កន្លង​មក​មុខងារ​ការពារ ២ តង់​​នេះ​​តម្រូវ​ឲ្យ​​ប្រើ​លេខ​ទូរសព្ទ​ដើម្បី​អាច​ដំណើរ​ការ​បាន។ ប៉ុន្តែ​ Facebook បាន​ផ្លាស់​ប្ដូរ​ចំណុច​នេះ ​ក្រោយ​រក​ឃើញ​បញ្ហា​មួយ​ទាក់​ទង​នឹង​​​ការ​ផ្ញើ​សារ​លេខ​កូដ​តាម​លេខ​ទូរសព្ទ​នេះ។

បច្ចុប្បន្ន​មុខងារ​ការពារ​គណនី​ ២ តង់ អាច​ដំណើរ​ការ​ជា​មួយ​កម្មវិធី​ Duo Security និង Google Authenticator។ ដើម្បី​ដំណើរ​ការ​មុខងារ​​នេះ​បាន​ត្រូវ​ដំឡើង​កម្មវិធី​ មួយ​ ក្នុង​ចំណោម​កម្មវិធី​ទាំង​ពីរ​នេះ។

• បន្ទាប់​មក​ចូល​ទៅ​កាន់​ "Settings & Privacy” ក្នុង​កម្មវិធី​ Facebook រួច​ចុច​លើ​ "Account Settings” ក្រោយ​មក​ចុច​លើ​ "Security and Login”

• អូស​ចុះ​ក្រោម​ចុច​លើ​ "Use two-factor authentication” រួច​បញ្ចូល​លេខ​សម្ងាត់​គណនី​

• បន្ទាប់​មក​ចុច​លើ​ពាក្យ​ "Get Started” ហើយ​រើស​យក​ប្រអប់​ Authentication App

• ក្រោយ​មក​យក​លេខ​កូដ​ ១៦ ខ្ទង់​ ទៅ​បញ្ចូល​ក្នុង​កម្មវិធី​ Google Authenticator ឬ Duo Security

• បើក​កម្មវិធី Google Authenticator ឬ Duo Security ​ឡើង ​ចុច​លើ​ពាក្យ​ "Begin Setup” រួច​រើស​យក​ Manual Entry ហើយ​ធ្វើ​ការ​បំពេញ​ Email និង​បញ្ចូល​លេខ​កូដ​ ១៦ ខ្ទង់

• ពេល​រួច​រាល់​អ្នក​នឹង​ឃើញ​លេខ​កូដ​ ៦ ខ្ទង់​ដែល​ប្រែ​ប្រួល​ជានិច្ច​

• ក្រោយ​មក​ត្រឡប់​ទៅ​កាន់​កម្មវិធី​ Facebook វិញ​ រួច​ចុច​ Next និង​បញ្ចូល​លេខ​កូដ ៦ ខ្ទង់​ដែល​បង្ហាញ​ក្នុង​កម្មវិធី ពេល​​រួច​រាល់​ចុច​លើ​ Finished ជា​ការ​ស្រេច

​ ក្រោយ​ពេល​កំណត់​មុខងារ​ការពារ​ ២ តង់​នេះ​ហើយ នៅ​ពេល​ដែល​មាន​នរណា​ម្នាក់​ចង់​ Log In ចូល​គណនី Facebook របស់​អ្នក លុះ​ត្រា​តែ​មាន​លេខ​កូដ​ ៦ ខ្ទង់​ពី​កម្មវិធី​សុវត្ថិភាព៕

​​​​​​​​​​​​

ប្រភព៖ The Verge   ប្រែ​សម្រួល៖ សុខហេង